കൊച്ചി: വട്ടിയൂർക്കാവ് എംഎൽഎ വികെ പ്രശാന്തിൻ്റെ ഓഫീസ് മുറിയുമായി ബന്ധപ്പെട്ട വിവാദത്തിനിടെ വാടക അലവൻസ് ആനുകൂല്യത്തെക്കുറിച്ച് നിരവധി ചർച്ചകളാണ് സോഷ്യൽ മീഡിയയിൽ നടന്നത്. എംഎൽഎ ഓഫീസിന് 25,000 രൂപ വാടക അലവൻസ് എഴുതിയെടുക്കുന്ന എന്ന വാദമാണ് ഇതിൽ പ്രധാനപ്പെട്ടത്. ബിജെപി പ്രവർത്തകർ ഉൾപ്പടെ ഇത് വ്യാപകമായി പ്രചരിപ്പിക്കുകയുമുണ്ടായി. എന്നാൽ എന്താണ് ഇതിൻ്റെ യാഥാർഥ്യം. എന്ന് വിശദമാക്കി മന്ത്രിമാരുൾപ്പെടെയുള്ള എംഎൽമാർ രംഗത്തെത്തിയിട്ടുണ്ട്.

എംഎൽഎ ഓഫീസിനായി എംഎൽഎമാർക്ക് 25000 രൂപ അലവൻസ് പ്രതിമാസം അനുവദിക്കുന്നുണ്ടെന്ന പ്രചരണം തെറ്റാണെന്ന് മന്ത്രി പി രാജീവ് പ്രതികരിച്ചു. സംഘപരിവാറിൻ്റെ നുണഫാക്ടറിയിൽ നിന്ന് പ്രചരിപ്പിക്കുന്നതാണ് ഈ കള്ളം. സത്യത്തിൽ അങ്ങനൊരു അലവൻസ് എംഎൽഎമാർക്കില്ല. ഇന്ത്യയിലെ തന്നെ ഏറ്റവും കുറഞ്ഞ ശമ്പളവും അലവൻസും എംഎൽഎമാർക്ക് നൽകുന്ന നാടുകളിലൊന്ന് കേരളമാണ് മന്ത്രി പറഞ്ഞു.

മാസ അലവൻസും മണ്ഡലം അലവൻസും യാത്രാ അലവൻസും ടെലിഫോൺ അലവൻസും ഇൻഫർമേഷൻ അലവൻസും മറ്റ് അലവൻസുകളും ചേർത്ത് 70000 രൂപയാണ് ഇവർക്ക് ലഭിക്കുക. ഇതുവച്ചാണ് മണ്ഡലത്തിലെ എല്ലാ പരിപാടികൾക്കും പങ്കെടുക്കുന്നതും ചെറിയ സഹായങ്ങൾ ഉറപ്പ് വരുത്തുന്നതും ജീവിതച്ചിലവ് വഹിക്കുന്നതും ഓഫീസുൾപ്പെടെ നടത്തിക്കൊണ്ടുപോകുന്നതും. എന്നാൽ ബിജെപി ഫാക്ടറിയിൽ നിന്ന് മുട്ടയിട്ട നുണകൾ പെറ്റുപെരുകിക്കൊണ്ടേയിരിക്കുകയാണ്. അവർക്ക് സത്യം പറഞ്ഞുള്ള ജീവിതം അസാധ്യമാണെന്നും പി രാജീവ് പ്രതികരിച്ചു.

എംഎൽഎ ഓഫീസിന് 25,000 രൂപ വാടക അലവൻസ് ഉണ്ട് എന്നത് നുണ ഫാക്ടറിയിലെ പുതിയ സൃഷ്ടിയാണെന്നാണ് നെയ്യാറ്റിൻകര എംഎൽഎ കെ ആൻസലൻ പറയുന്നത്. ‘എംഎൽഎ ഓഫീസും കള്ള പ്രചാരവേലകളും’ എന്നപേരിൽ എഴുതിയ കുറിപ്പിലാണ് എംഎൽഎയുടെ പ്രതികരണം.

ആൻസലൻ എംഎൽഎയുടെ പോസ്റ്റ്

എംഎൽഎ ഓഫീസും കള്ള പ്രചാരവേലകളും
പോൾ ജോസഫ് ഗീബൽസ് – നുണകൾ ആവർത്തിച്ച് പറഞ്ഞ് സത്യമാണെന്ന തോന്നൽ ജനിപ്പിക്കുന്ന രീതിയുടെ സ്രഷ്ടാവ്. ഹിറ്റ്ലറുടെ മന്ത്രിസഭയിൽ രണ്ടാമൻ. ഇന്ന് ബിജെപി നുണ ഫാക്ടറികൾ കള്ള പ്രചാരണങ്ങൾ ഒന്നിന് പുറമെ ഒന്നായി മെനഞ്ഞ് ഇതേ തന്ത്രം പയറ്റുകയാണ്. “MLA ഓഫീസിന് 25,000 രൂപ വാടക അലവൻസ് ഉണ്ട്” എന്നതാണ് ഈ നുണ ഫാക്ടറിയിലെ പുതിയ സൃഷ്ടി. അങ്ങനെ ഒരു അലവൻസ് ലഭിക്കുന്നില്ല എന്നത് യാഥാർത്ഥ്യം. MLA ക്ക് നിലവിൽ ലഭിക്കുന്ന ശമ്പളവും അലവൻസുമായി ലഭിക്കുന്നത് മാസം ഏകദേശം 70,000 രൂപയാണ്

  • മാസ അലവൻസ് – 2,000 രൂപ
  • മണ്ഡലം അലവൻസ് – 25,000 രൂപ
  • യാത്ര അലവൻസ് – 20,000 രൂപ
  • ടെലിഫോൺ അലവൻസ് – 11,000 രൂപ
  • ഇൻഫർമേഷൻ അലവൻസ് – 4,000 രൂപ
  • മറ്റ് അലവൻസുകൾ – 8,000 രൂപ

എന്നിങ്ങനെയാണ് 70,000 രൂപ പ്രതിമാസം ലഭിക്കുന്നത്. ഇതിൽ നിന്നുമാണ് എംഎൽഎയുടെ വാഹനത്തിൻ്റെ മെയിൻ്റനൻസ്, ഓഫീസ് നടത്തിക്കൊണ്ട് പോകുന്നത് ഉൾപ്പെടെയുള്ള ചെലവുകൾക്ക് തുക കണ്ടെത്തേണ്ടത്. അത് കൊണ്ട് തന്നെ എംഎൽഎ ആയി തെരഞ്ഞെടുക്കപ്പെട്ട സമയത്ത് പാർട്ടി ഏരിയ കമ്മറ്റി ഓഫീസിലെ ഒരു മുറിയാണ് എംഎൽഎ ഓഫീസ് ആയി പ്രവർത്തിച്ചിരുന്നത്. ഇതര രാഷ്ട്രീയ പ്രവർത്തകർക്ക് ഉൾപ്പെടെ വന്ന് പരാതികളും ആവശ്യങ്ങളും അറിയിക്കാനുള്ള സൗകര്യം ഉണ്ടാകണം എന്ന അഭിപ്രായം പൊതുവിൽ ഉയർന്ന് വന്നതോടെയാണ് ടിബി ജങ്ഷനിലേക്ക് ഓഫീസ് മാറ്റിയത്.

രാവിലെയും വൈകുന്നേരവും എംഎൽഎയെ നേരിൽ കാണുന്നതിന് നിരവധി പേർ ഓഫീസിൽ എത്തുന്നുണ്ട്. ഈ സത്യാനന്തര കാലത്തിൽ സത്യം ചെരുപ്പിടുമ്പോഴേക്കും നുണ ലോകം ചുറ്റി കഴിഞ്ഞിട്ടുണ്ടാകും. അതോടൊപ്പം നൂറു കണക്കിന് നുണകളെ പ്രസവിച്ചിട്ടുമുണ്ടാകും. നുണകളോട് അകലം പ്രാപിക്കാം. സത്യം ഉറക്കെ വിളിച്ച് പറയാം. നവ ഫാസിസത്തെ തടഞ്ഞ് നിർത്തുക എന്ന കാലഘട്ടത്തിൻ്റെ കടമ നിർവഹിക്കാം.