മാസങ്ങൾ നീണ്ട യുദ്ധം അവസാനിപ്പിക്കാൻ ഇറാൻ താനുമായി ചർച്ചകൾക്ക് തയ്യാറെടുക്കുകയാണെന്ന അസാധാരണ അവകാശവാദവുമായി അമേരിക്കൻ പ്രസിഡന്റ് ഡൊണാൾഡ് ട്രംപ്. ഇറാന്റെ അടുത്ത പരമോന്നത നേതാവാകാൻ അവർ തന്നെ ക്ഷണിച്ചുവെന്നും എന്നാൽ താൻ അത് നിരസിച്ചുവെന്നും ട്രംപ് പരിഹാസരൂപേണ പറഞ്ഞു. എന്നാൽ അമേരിക്കയുമായി യാതൊരുവിധ ചർച്ചകളും നടക്കുന്നില്ലെന്ന് ഇറാൻ ഔദ്യോഗികമായി വ്യക്തമാക്കി.
റിപ്പബ്ലിക്കൻ പാർട്ടി സംഘടിപ്പിച്ച എൻആർസിസി (NRCC) വിരുന്നിൽ സംസാരിക്കവെയാണ് ട്രംപ് ഈ വിവാദപരമായ വെളിപ്പെടുത്തൽ നടത്തിയത്. യുദ്ധം അവസാനിപ്പിക്കാനുള്ള ചർച്ചകൾക്കിടെ ഇറാന്റെ നേതൃത്വം തന്നെ അടുത്ത പരമോന്നത നേതാവാക്കാമെന്ന നിർദ്ദേശം അനൗദ്യോഗികമായി മുന്നോട്ട് വെച്ചതായാണ് ട്രംപ് അവകാശപ്പെടുന്നത്. എന്നാൽ താൻ ആ വാഗ്ദാനം നിരസിച്ചുവെന്ന് അദ്ദേഹം കൂട്ടിചേർത്തു.
