പശ്ചിമേഷ്യൻ യുദ്ധം അതീവ വിനാശകരമായ ഘട്ടത്തിലേക്ക് നീങ്ങുന്നതിനിടെ മാധ്യമപ്രവർത്തകർക്ക് നേരെ ഇസ്രായേല് സൈന്യം നടത്തുന്ന ക്രൂരതകൾ തുടരുന്നു. ലബനനിൽ ഇസ്രായേല് നടത്തിയ വ്യോമാക്രമണങ്ങളിൽ രണ്ട് പ്രമുഖ മാധ്യമപ്രവർത്തകർ കൊല്ലപ്പെട്ടു. അൽ-മനാർ ടിവി റിപ്പോർട്ടർ സുസാൻ ഖലീൽ, സൗത്ത് അൽ-ഫറ റേഡിയോ നെറ്റ്വർക്ക് റിപ്പോർട്ടർ ഗാദ അൽ-ദൈഖ് എന്നിവരാണ് ഇസ്റാഈൽ മിസൈലുകൾക്ക് ഇരയായത്. ലബനനിലെ അലൈ ജില്ലയിലെ കെയ്ഫൂണിലും ദക്ഷിണ ലബനനിലെ ടയറിലുമാണ് ആക്രമണങ്ങൾ നടന്നത്. വെടിനിർത്തൽ ചർച്ചകൾ പുരോഗമിക്കെ ഇസ്രായേല് ലബനനിൽ ആക്രമണം കടുപ്പിച്ചത് വലിയ പ്രതിഷേധത്തിന് കാരണമായിട്ടുണ്ട്.
ലബനന് പിന്നാലെ ഗസ്സയിലും ഇസ്രായേല് മാധ്യമപ്രവർത്തകനെ വേട്ടയാടി. ഗസ്സ സിറ്റിയിലെ തീരദേശ പാതയിലൂടെ കാറിൽ സഞ്ചരിക്കുകയായിരുന്ന അൽ ജസീറ മുബാഷർ റിപ്പോർട്ടർ മുഹമ്മദ് സമീർ വഷാഹിന് നേരെയാണ് ഇസ്രായേല് ഡ്രോൺ ആക്രമണം നടത്തിയത്. ഷെയ്ഖ് അജ്ലിൻ മേഖലയിൽ നടന്ന ഈ ആക്രമണത്തിൽ മുഹമ്മദ് വഷാഹ് തൽക്ഷണം കൊല്ലപ്പെട്ടു. മിസൈൽ പ്രഹരത്തിൽ കാർ പൂർണ്ണമായും കത്തിയമർന്ന നിലയിലായിരുന്നു. മാധ്യമപ്രവർത്തകരെ ആസൂത്രിതമായി ലക്ഷ്യം വെച്ച് കൊലപ്പെടുത്തുന്നത് ഇസ്രായേലിന്റെ സ്ഥിരം ശൈലിയായി മാറിയിരിക്കുകയാണെന്ന് റിപ്പോർട്ടുകൾ സൂചിപ്പിക്കുന്നു.
മാധ്യമപ്രവർത്തകരുടെ കൊലപാതകത്തെ ഫലസ്തീൻ മാധ്യമപ്രവർത്തകരുടെ സംഘടന കടുത്ത ഭാഷയിൽ അപലപിച്ചു. ഇത് മാധ്യമങ്ങൾക്കും സത്യത്തിനും നേരെയുള്ള തുറന്ന യുദ്ധമാണെന്ന് അവർ പ്രസ്താവനയിൽ പറഞ്ഞു. സത്യം വിളിച്ചുപറയുന്ന മാധ്യമപ്രവർത്തകരെ നിശബ്ദമാക്കാനാണ് ഇസ്രായേല് ശ്രമിക്കുന്നത്. ഗസ്സയിൽ മാത്രം 2023 ഒക്ടോബറിന് ശേഷം കൊല്ലപ്പെട്ട മാധ്യമപ്രവർത്തകരുടെ എണ്ണം ഇതോടെ 262 ആയി ഉയർന്നുവെന്നത് അന്താരാഷ്ട്ര സമൂഹത്തെ ഞെട്ടിക്കുന്ന കണക്കാണ്. ജനവാസ കേന്ദ്രങ്ങളിലും മാധ്യമപ്രവർത്തകർ താമസിക്കുന്ന കെട്ടിടങ്ങളിലും ബോംബ് വർഷിക്കുന്നത് ഇസ്രായേല് തുടരുകയാണ്.
കൊല്ലപ്പെട്ട ഗാദ അൽ-ദൈഖ് 37 വർഷമായി സൗത്ത് അൽ-ഫറ റേഡിയോയിൽ പ്രവർത്തിച്ചിരുന്ന മുതിർന്ന റിപ്പോർട്ടറാണ്. മാധ്യമപ്രവർത്തകരെ വേട്ടയാടുന്ന ഇസ്രായേല് നടപടിക്കെതിരെ കമ്മറ്റി ടു പ്രൊട്ടക്ട് ജേണലിസ്റ്റ്സ് (CPJ) ഉൾപ്പെടെയുള്ള അന്താരാഷ്ട്ര സംഘടനകൾ രംഗത്തെത്തി. ഇസ്രായേലിന്റെ ഈ ക്രൂരതകൾക്കെതിരെ അന്താരാഷ്ട്ര നീതിന്യായ കോടതിയിൽ പരാതി നൽകാൻ മാധ്യമ സംഘടനകൾ തീരുമാനിച്ചിട്ടുണ്ട്. സമാധാന ഉടമ്പടി നിലനിൽക്കെ ലബനനിൽ നടന്ന ആക്രമണങ്ങൾ കരാറിന്റെ നഗ്നമായ ലംഘനമാണെന്ന് ഇറാൻ ഭരണകൂടവും വ്യക്തമാക്കി.
