യു.എസ്. സിറ്റിസൺഷിപ്പ് ആൻഡ് ഇമിഗ്രേഷൻ സർവീസസ് (യു.എസ്.സി.ഐ.എസ്.) ഓഫീസുകളിലെ ഗ്രീൻ കാർഡ് അഭിമുഖത്തിനിടെ യു.എസ്. പൗരന്മാരുടെ പങ്കാളികൾ ഉൾപ്പെടെയുള്ളവരെ യു.എസ്. ഫെഡറൽ ഏജൻസികൾ തടങ്കലിൽ വെക്കുന്നതായി റിപ്പോർട്ട്.
സാൻ ഡീഗോയിലെ യു.എസ്.സി.ഐ.എസ്. ഓഫീസുകളിലാണ് സംഭവമെന്ന് യു.എസ്. മാധ്യമങ്ങൾ റിപ്പോർട്ട് ചെയ്തു. ഗ്രീൻ കാർഡ് അഭിമുഖത്തിനായി ഹാജരായ തൻ്റെ കക്ഷിയെ തടങ്കലിൽ വെക്കുകയും കൈവിലങ്ങ് വെക്കുകയും ചെയ്തെന്ന് ഒരു അഭിഭാഷകൻ അവകാശപ്പെട്ടു.
അഭിമുഖത്തിനിടെ വിസ കാലാവധി കഴിഞ്ഞവരെ (വിസ ഓവർസ്റ്റേ) ഫെഡറൽ ഏജൻസികൾ അറസ്റ്റ് ചെയ്യാൻ തുടങ്ങിയതായി ഇമിഗ്രേഷൻ അറ്റോർണി സമൻ നസേരി പറഞ്ഞു. സ്ഥിര താമസത്തിനായി ആവശ്യമായ നടപടികൾ തങ്ങൾ പൂർത്തിയാക്കിയവരാണ് അറസ്റ്റിലായ ചില ദമ്പതികളും അവരുടെ അഭിഭാഷകരും ന്യൂയോർക്ക് ടൈംസിനോട് പറഞ്ഞു.
“നിലവിൽ ഐ.സി.ഇ. (ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെൻ്റ്) യു.എസ്.സി.ഐ.എസ്. ഓഫീസുകളിൽ ഗ്രീൻ കാർഡ് അഭിമുഖങ്ങൾക്കിടെ അറസ്റ്റ് നടപ്പിലാക്കാൻ തുടങ്ങിയിരിക്കുന്നു. വിസ കാലാവധി കഴിഞ്ഞവരെയാണ് അവർ അറസ്റ്റ് ചെയ്യുന്നത്,” സമൻ നസേരിയെ ഉദ്ധരിച്ച് സി.ബി.എസ്. 8 റിപ്പോർട്ട് ചെയ്തു.
കഴിഞ്ഞ ആഴ്ച മാത്രം തൻ്റെ അഞ്ച് കക്ഷികളെ ഗ്രീൻ കാർഡ് അഭിമുഖത്തിനിടെ കസ്റ്റഡിയിൽ എടുത്തതായി നസേരി പറഞ്ഞു. അവർക്ക് ക്രിമിനൽ പശ്ചാത്തലമോ മുൻപ് അറസ്റ്റ് ചെയ്യപ്പെട്ട ചരിത്രമോ ഇല്ലെന്നും അദ്ദേഹം കൂട്ടിച്ചേർത്തു.
“ഈ സാഹചര്യത്തിലുള്ള എൻ്റെ കക്ഷികളിൽ ആർക്കും അറസ്റ്റ് ചെയ്യപ്പെട്ട ചരിത്രമോ ക്രിമിനൽ പശ്ചാത്തലമോ ഇല്ല. നിയമപരമായി രാജ്യത്തേക്ക് പ്രവേശിക്കുകയും എന്നാൽ വിസയുടെ കാലാവധി കഴിഞ്ഞവരുമാണ് ഇവർ. നിലവിൽ എൻ്റെ കക്ഷികൾ എല്ലാവരും യു.എസ്. പൗരന്മാരെ വിവാഹം ചെയ്തവരാണ്. സാധാരണ നടപടികളിലൂടെ കടന്നുപോവുന്ന യു.എസ്. പൗരന്മാരുടെ പങ്കാളികളെയാണ് കസ്റ്റഡിയിൽ എടുക്കുന്നത്,” നസേരി കൂട്ടിച്ചേർത്തു.
മറ്റൊരു അഭിഭാഷകനായ ഹബീബ് ഹസ്ബിനിയും തൻ്റെ കക്ഷികൾക്ക് സമാനമായ അനുഭവങ്ങൾ നേരിട്ടതായി സ്ഥിരീകരിച്ചു. “നവംബർ 12-നായിരുന്നു ആദ്യത്തെ സംഭവം, ഐ.സി.ഇ.യുടെ മെമ്മോ വരുന്നതിന് തലേദിവസം. അതിനുശേഷം നാല് കേസുകൾ കൂടി ഉണ്ടായി. കൂടാതെ അതേ സൗകര്യത്തിൽ നിന്ന് അറസ്റ്റ് ചെയ്യപ്പെട്ട നിരവധി ആളുകളുടെ ഫോൺ വിളികൾ എനിക്ക് ലഭിച്ചു,” ഹസ്ബിനി സി.ബി.എസ്. 8-നോട് പറഞ്ഞു.
ഇതുവരെ ഈ തടങ്കലുകൾ സാൻ ഡീഗോയിലെ യു.എസ്.സി.ഐ.എസ്. ഓഫീസിൽ മാത്രമായി ഒതുങ്ങി നിൽക്കുന്നതായി അഭിഭാഷകൻ ഹബീബ് ഹസ്ബിനി നിരീക്ഷിച്ചു.
ഗ്രീൻ കാർഡ് അഭിമുഖത്തിനായി ഷെഡ്യൂൾ ചെയ്തിട്ടുള്ളവർ ഇപ്പോഴും അഭിമുഖത്തിൽ പങ്കെടുക്കണമെന്നും, അതേസമയം, മുൻകരുതലെടുക്കണമെന്നും സാധ്യമായ തടങ്കലിനായി തയ്യാറെടുക്കണമെന്നും ഹസ്ബിനി ശുപാർശ ചെയ്തു.
