തിരുവനന്തപുരം: വിനോദ സഞ്ചാരത്തിനെത്തിയ ഇതര സംസ്ഥാന തൊഴിലാളികളുടെ 17 അംഗ സംഘത്തിലെ ഒരാളെ കാണാനില്ല. ആഴിമലയിലെത്തിയ സംഘത്തിലെ മിഥുൻ ദാസി(29)നെയാണ് കാണാതായത്. കോതമംഗലത്തെ പ്ലൈവുഡ് ഫാക്‌ടറിയിലെ തൊഴിലാളിയാണ് ആസാം സ്വദേശിയായ മിഥുൻ ദാസ്.
സംഭവത്തിൽ ഒപ്പമുണ്ടായിരുന്നവർ വിഴിഞ്ഞം പോലീസിൽ പരാതി നൽകി. കഴിഞ്ഞ ഞായറാഴ്ചയാണ് സംഘം സ്ഥലത്തെത്തിയത്. 16നാണ് ഇവർ വിനോദ സഞ്ചാരത്തിന്‍റെ ഭാഗമായി ആഴിമല എത്തിയത്. തിരികെ പോകാൻ സമയം മിഥുനെ കാണാത്തതിനെതുടർന്ന് പരിസരത്തു തെരഞ്ഞെങ്കിലും കണ്ടെത്താനായില്ല.
തിരികെ ജോലിസ്ഥലത്ത് എത്തുമെന്നു കരുതി തങ്ങൾ മടങ്ങിയെന്നാണ് സംഘം പോലീസിന് നൽകിയ മൊഴി. കോതമംഗലത്ത് എത്തിയിട്ടും മിഥുൻ എത്താത്തതിനാലാണ് പരാതി നൽകിയതെന്ന് വിഴിഞ്ഞം പോലീസ് പറയുന്നത്.
യുവാവിനെ ക്ഷേത്ര പരിസരത്തുനിന്നു കാണാതായെന്നാണ് സംഘം പറയുന്നത്. അതേസമയം ദിവസം ആഴിമല കടലിൽ ഒരാൾ വീഴുന്നതു കണ്ടുവെന്ന ദൃക്സാക്ഷികളിൽ നിന്നുള്ള വിവരത്തെതുടർന്ന് മൂന്ന് ദിവസങ്ങളായി കോസ്റ്റൽ പോലീസ് ഉൾപ്പെടെ തെരച്ചിൽ നടത്തിവരുകയാണ്. ഇത് മിഥുൻ ആണോയെന്നാണ് സംശയം.
