കർണാടകയിലെ നേതൃത്വത്തർക്കം ശക്തമാകുന്നതിനിടെ, പാർട്ടി ഹൈക്കമാൻഡിൻ്റെ നിർദ്ദേശപ്രകാരംമുഖ്യമന്ത്രി സിദ്ധരാമയ്യയും ഉപമുഖ്യമന്ത്രി ഡി.കെ. ശിവകുമാറും ഇന്ന് പ്രഭാതഭക്ഷണത്തിനായി കൂടിക്കാഴ്ച നടത്തി. ബെംഗളൂരുവിലെ മുഖ്യമന്ത്രിയുടെ വസതിയിൽ വെച്ചായിരുന്നു കൂടിക്കാഴ്ച. ഉപ്പുമാവ്, ഇഡ്ഡലി, സാമ്പാർ എന്നിവ ഉൾപ്പെടെയുള്ള വിഭവങ്ങളോടെ ശ്രദ്ധാപൂർവം ക്രമീകരിച്ച ഈ കൂടിക്കാഴ്ച സംസ്ഥാനത്തെ തർക്കങ്ങൾ അവസാനിപ്പിക്കാനും ഐക്യം പ്രഖ്യാപിക്കാനുമായിരുന്നു. 2028-ലെ തിരഞ്ഞെടുപ്പ് തന്ത്രങ്ങളെക്കുറിച്ചും ഇരുവരും ചർച്ച ചെയ്തു.

ഭക്ഷണത്തിന് ശേഷം, രാഷ്ട്രീയ കോലാഹലങ്ങൾ അവസാനിപ്പിച്ച്, ഇരുനേതാക്കൾക്കുമിടയിൽ ഭിന്നതകളില്ല എന്നും ഭാവിയിൽ ഉണ്ടാകില്ലെന്നും സിദ്ധരാമയ്യ ഉറപ്പിച്ചു പറഞ്ഞു.

“2028-ലെ തിരഞ്ഞെടുപ്പാണ് ഞങ്ങളുടെ അജണ്ട. തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പുകൾ പ്രധാനമാണ്. ഞങ്ങൾ അവ ചർച്ച ചെയ്തു. 2028-ലെ തിരഞ്ഞെടുപ്പിൽ കോൺഗ്രസിനെ തിരികെ കൊണ്ടുവരുന്നതിനെക്കുറിച്ചും ഞങ്ങൾ ചർച്ച ചെയ്തു. ഒരുമിച്ച് മുന്നോട്ട് പോകാൻ ഞങ്ങൾ തീരുമാനിച്ചു. ഞങ്ങൾക്കിടയിൽ ഭിന്നതകളില്ല, ഭാവിയിലും ഉണ്ടാകില്ല,” മുഖ്യമന്ത്രി വാർത്താ സമ്മേളനത്തിൽ പറഞ്ഞു.

നേതൃത്വത്തെച്ചൊല്ലിയുള്ള വിഷയത്തിൽ കോൺഗ്രസ് ഹൈക്കമാൻഡ് എടുക്കുന്ന തീരുമാനം താൻ അനുസരിക്കുമെന്നും സിദ്ധരാമയ്യ ആവർത്തിച്ചു.

“ഹൈക്കമാൻഡ് പറയുന്നത് എന്താണോ അത് പിന്തുടരാൻ ഞങ്ങൾ തീരുമാനിച്ചു. നാളെ മുതൽ ഒരു ആശയക്കുഴപ്പവും ഉണ്ടാകില്ല. ഇപ്പോഴും ആശയക്കുഴപ്പമില്ല. ചില മാധ്യമ റിപ്പോർട്ടർമാരാണ് ആശയക്കുഴപ്പം സൃഷ്ടിച്ചത്,” അദ്ദേഹം പറഞ്ഞു.

അധികാരത്തിന് വെല്ലുവിളിയാകാൻ സാധ്യതയുണ്ടെന്ന് പ്രതിപക്ഷമായ ബി.ജെ.പി. മുന്നറിയിപ്പ് നൽകിയ അവിശ്വാസ പ്രമേയ നീക്കത്തെയും മുഖ്യമന്ത്രി തള്ളിക്കളഞ്ഞു.

“തെറ്റായ ആരോപണങ്ങൾ ഉന്നയിക്കുന്നത് ബി.ജെ.പി.യുടെയും ജെ.ഡി.എസിൻ്റെയും ശീലമാണ്. അവർ അവിശ്വാസ പ്രമേയം കൊണ്ടുവരുമെന്ന് പറഞ്ഞു. അവർ 60-ഉം 18-ഉം മാത്രമാണ്. ഞങ്ങൾ 140 പേരുണ്ട്. ഇത് ഒരു നിഷ്ഫലമായ ശ്രമമാണ്. അവരുടെ തെറ്റായ ആരോപണങ്ങളെ ഞങ്ങൾ നേരിടും,” അദ്ദേഹം കൂട്ടിച്ചേർത്തു.

പാർട്ടിക്ക് ഐക്യം നിർണായകമാണെന്ന് ഊന്നിപ്പറഞ്ഞുകൊണ്ട്, പ്രശ്നങ്ങൾ ഒന്നിച്ചിരുന്ന് ചർച്ച ചെയ്യാനും അഭിപ്രായ വ്യത്യാസങ്ങൾ പരിഹരിക്കാനും കോൺഗ്രസ് ജനറൽ സെക്രട്ടറി കെ.സി. വേണുഗോപാൽ ഇരുനേതാക്കളോടും ആവശ്യപ്പെട്ടതായി വൃത്തങ്ങൾ അറിയിച്ചു. ഡൽഹിയിലേക്ക് യാത്ര പുറപ്പെടുന്നതിന് മുൻപ് തർക്കങ്ങൾ പരിഹരിക്കാൻ അദ്ദേഹം നിർദ്ദേശിച്ചു. ഇരുനേതാക്കളെയും ഉടൻ ദേശീയ തലസ്ഥാനത്തേക്ക് വിളിപ്പിക്കാൻ സാധ്യതയുണ്ട്.

“ഓർക്കുക, അന്തിമ തീരുമാനം കോൺഗ്രസ് ഹൈക്കമാൻഡിൻ്റേതാണ്. അത് ഞങ്ങൾക്ക് വിട്ടേക്കുക. തമ്മിൽ കലഹിക്കരുത്,” വേണുഗോപാൽ മുന്നറിയിപ്പ് നൽകി. സോഷ്യൽ മീഡിയയിൽ പരസ്പരം വിഴുപ്പലക്കരുതെന്നും ഇത്തരം പെരുമാറ്റം പാർട്ടിയുടെ ധാർമ്മികതയ്ക്ക് എതിരാണെന്നും അദ്ദേഹം മുന്നറിയിപ്പ് നൽകി.