തൃശൂർ മണ്ണുത്തിയിൽ വൻ കവർച്ച. ബൈപ്പാസ് ജംഗ്ഷന് സമീപം കാറിലെത്തിയ സംഘം ചായക്കടയിലിരിക്കുകയായിരുന്ന ആളുടെ 75ലക്ഷം രൂപ കവർന്നു. എടപ്പാൾ സ്വദേശി മുബാറക്കിന്റെ പണമാണ് മോഷണം പോയത്. അദ്ദേഹത്തിന്റെ പണം അടങ്ങിയ ബാഗ് സംഘം മോഷ്ടിച്ചു. മെഡിക്കൽ ഷോപ്പിന്റെ വശത്തായി പണമടങ്ങിയ ബാഗ് വച്ചതിന് ശേഷം ശുചിമുറിയിലേക്ക് പോയ സമയത്ത് ഒരാൾ വന്ന് ബാഗ് എടുക്കുകയായിരുന്നു.
മുബാറക് ഓടിവന്ന് മോഷണ ശ്രമം തടയാൻ ശ്രമിച്ചെങ്കിലും പണമടങ്ങിയ ബാഗുമായി സംഘം കടന്നുകളയുകയുമായിരുന്നു. ഇന്നോവ കാറിലെത്തിയ സംഘമാണ് കവർച്ച നടത്തിയത്. സംഭവത്തിൽ സംശയമുണ്ടെന്നും കുഴൽപ്പണ സാധ്യതയടക്കം തേടുന്നുണ്ടെന്നും പൊലീസ് അറിയിച്ചു. ഇന്ന് പുലർച്ചെ 4.30നാണ് സംഭവം നടക്കുന്നത്.
