ക്ലാസ്മുറിക്കുള്ളിൽ വെച്ച് വിദ്യാർത്ഥികളുടെ മുഖത്ത് ആഞ്ഞടിക്കുന്ന അധ്യാപികയുടെ ദൃശ്യങ്ങൾ ഉൾപ്പെടുന്ന വീഡിയോ വൈറലായതിനെ തുടർന്ന് ഉത്തർപ്രദേശിൽ വൻ പ്രതിഷേധം. ഏഴ് മുതൽ പത്ത് വയസ് വരെ പ്രായം തോന്നിക്കുന്ന കുട്ടികളെ ക്ലാസ്മുറിയിൽ നിർത്തി ക്രൂരമായി മർദിക്കുന്നതിന്റെ ദൃശ്യങ്ങളാണ് സമൂഹമാധ്യമങ്ങളിൽ പ്രചരിക്കുന്നത്. യുപിയിലെ ജൗൻപൂരിലാണ് ഈ സംഭവം അരങ്ങേറിയത്.
ബദ്‌ലാപൂർ പൊലീസ് സ്റ്റേഷൻ പരിധിയിലുളള ഭ്‌ലുവാഹിനിലെ എൽബിഎസ് പബ്ലിക് സ്‌കൂളിലാണ് കുട്ടികൾക്ക് നേരെയുണ്ടായ അതിക്രമം നടന്നതെന്ന് ബ്ലോക്ക് വിദ്യാഭ്യാസ ഓഫീസർ അരവിന്ദ് കുമാർ പാണ്ഡെ സ്ഥിരീകരിച്ചിട്ടുണ്ട്. ‘എല്ലാ ഉത്തരവാദിത്തവും എന്റേതാണോ’ എന്ന് ആക്രോശിച്ചാണ് അധ്യാപിക കുട്ടികളുടെ മുഖത്ത് മർദനം നടത്തിയതെന്നാണ് പുറത്തുവന്ന ദൃശ്യങ്ങളിൽ നിന്ന് വ്യക്തമാക്കുന്നത്.
സംഭവവുമായി ബന്ധപ്പെട്ട് അധ്യാപിക നൽകിയ വിശദീകരണം, പഠിക്കാത്തതിന്റെ പേരിലാണ് കുട്ടികളെ മർദിച്ചതെന്നാണ്. വിദ്യാർത്ഥികളെ ക്രൂരമായി മർദിക്കുന്ന വീഡിയോ സമൂഹമാധ്യമങ്ങളിൽ വൈറലായതോടെ അധ്യാപികയ്‌ക്കെതിരെ ഉചിതമായ നടപടി സ്വീകരിക്കണമെന്ന് ആവശ്യപ്പെട്ട് നിരവധി പേരാണ് രംഗത്തെത്തിയിട്ടുള്ളത്.
സംഭവം ശ്രദ്ധയിൽപ്പെട്ടതായി വ്യക്തമാക്കിയ ബ്ലോക്ക് വിദ്യാഭ്യാസ ഓഫീസർ അരവിന്ദ് കുമാർ പാണ്ഡെ, സ്‌കൂൾ അധികൃതരോട് വിശദീകരണം തേടിയിട്ടുണ്ടെന്ന് അറിയിച്ചു. തുടർന്ന് ഉചിതമായ നടപടി സ്വീകരിക്കുമെന്നും അദ്ദേഹം വ്യക്തമാക്കി. വീഡിയോ വ്യാപകമായതോടെ നിരവധി രക്ഷിതാക്കൾ സ്‌കൂളിലേക്ക് സംഘടിച്ചെത്തി പ്രതിഷേധിച്ചു. കുട്ടികളെ ക്രൂരമായി മർദിക്കാൻ അധ്യാപികയ്ക്ക് യാതൊരു അവകാശവുമില്ലെന്ന് ചൂണ്ടിക്കാട്ടി സമൂഹമാധ്യമങ്ങളിലും പ്രതിഷേധം ശക്തമാണ്. ‘അധ്യാപികയ്ക്ക് സ്വന്തം ദേഷ്യം നിയന്ത്രിക്കാൻ കഴിയുന്നില്ലെങ്കിൽ അവർ ജോലി നിർത്തി പോകണം’ എന്ന തരത്തിലുള്ള പ്രതികരണങ്ങളാണ് വീഡിയോയ്ക്ക് താഴെ വരുന്നത്.
