പതിറ്റാണ്ടുകളുടെ നിയമ തർക്കങ്ങൾക്കും കാലതാമസങ്ങൾക്കും പരസ്പരവിരുദ്ധമായ അവകാശവാദങ്ങൾക്കും ശേഷം, ഉക്രൈനിലെ റോമൻ കത്തോലിക്കാ സമൂഹത്തിന് അടുത്ത 50 വർഷത്തേക്ക് കീവിലെ ചരിത്രപ്രസിദ്ധമായ സെന്റ് നിക്കോളാസ് ദൈവാലയം ഉപയോഗിക്കാനുള്ള അവകാശം ലഭിച്ചു. സർക്കാരുമായി ഉടമ്പടി ഒപ്പുവെച്ചതിൻപ്രകാരമാണ് പള്ളിയുടെ അവകാശം തിരികെ ലഭിച്ചത്.
സോവിയറ്റ് കാലഘട്ടത്തിൽ കണ്ടുകെട്ടിയ ദേശീയ സാംസ്കാരിക സ്മാരകമായ ഈ പള്ളി ഇപ്പോഴും സർക്കാർ ഉടമസ്ഥതയിലാണ്. എന്നാൽ ഇത് ഒരു ഇടവകാ ദൈവാലയം കൂടിയാണ്. കീവിലെ ഏറ്റവും അറിയപ്പെടുന്ന പള്ളികളിലൊന്നായ സെന്റ് നിക്കോളാസിന്റെ ചരിത്രത്തിലെ ഏറ്റവും പ്രധാനപ്പെട്ട ചുവടുവയ്പ്പാണ് ഈ കരാർ. എന്നാൽ അടുത്ത 50 വർഷത്തേക്കാണ് ഈ കരാർ എന്നതും ഒരു പ്രത്യേകതയാണ്.
നിയോ-ഗോഥിക് ശൈലിയിൽ നിർമ്മിച്ച പള്ളി
1899 നും 1909 നും ഇടയിൽ നിയോ-ഗോഥിക് ശൈലിയിൽ വാസ്തുശില്പിയായ വ്ലാഡിസ്ലാവ് ഹൊറോഡെറ്റ്സ്കി നിർമ്മിച്ച സെന്റ് നിക്കോളാസ് ചർച്ച്, 1917 ന് മുമ്പ്, നഗരം റഷ്യൻ സാമ്രാജ്യത്തിന്റെ ഭാഗമായിരുന്നപ്പോഴും, സോവിയറ്റ് റിപ്പബ്ലിക്കുകളിൽ ഒന്നായി ഉക്രെയ്നെ വിഴുങ്ങിയ 1917 ഒക്ടോബർ വിപ്ലവത്തിനും മുമ്പ്, കീവിലെ രണ്ട് റോമൻ കത്തോലിക്കാ പള്ളികളിൽ ഒന്നാണ്.
1938-ൽ സോവിയറ്റ് അധികാരികൾ അടച്ചുപൂട്ടി കണ്ടുകെട്ടിയ ഈ പള്ളി പിന്നീട് ഒരു കച്ചേരി ഹാളാക്കി മാറ്റി സംസ്ഥാന ഭരണത്തിന് കീഴിലാക്കി. 1991-ൽ സ്വാതന്ത്ര്യം വീണ്ടെടുത്തതിനുശേഷം, പതിറ്റാണ്ടുകളായി, ഉക്രെയ്നിലെ പരിഹരിക്കപ്പെടാത്ത പള്ളി സ്വത്ത് തർക്കങ്ങളുടെ ഏറ്റവും ദൃശ്യമായ പ്രതീകങ്ങളിലൊന്നായി ഇത് തുടർന്നു.
2009 മുതൽ പള്ളി കേടുപാടുകൾ നേരിടുന്നു. 2021-ൽ ഉണ്ടായ ഒരു തീപിടുത്തം അതിനെ കൂടുതൽ നശിപ്പിച്ചു. 2024 ഡിസംബർ 20-ന് ഉക്രേനിയൻ തലസ്ഥാനത്ത് നടന്ന റഷ്യൻ റോക്കറ്റ് ആക്രമണത്തോടെ പള്ളിക്ക് കേടുപാടുകൾ വർധിച്ചു. പള്ളി തദ്ദേശീയ വിശ്വാസികൾക്ക് കൈമാറുമെന്ന് സാംസ്കാരിക മന്ത്രാലയം വാഗ്ദാനം ചെയ്തിരുന്നെങ്കിലും, വർഷങ്ങളായി അത് നടന്നിട്ടില്ല. നിലവിൽ വൈദ്യുതിയോ ഹീറ്റർ സംവിധാനങ്ങളോ പള്ളിക്കെട്ടിടത്തിലില്ല. അതുകൊണ്ട് തന്നെ ഇപ്പോൾ ഇടവകക്കാർ തണുത്തുറഞ്ഞ താപനിലയിൽ തിരുക്കർമ്മങ്ങൾ അനുഷ്ഠിക്കാൻ നിർബന്ധിതരാകുന്നു.
മേൽക്കൂരയുടെയും ജനാലകളുടെയും അറ്റകുറ്റപ്പണികൾ ഏറ്റവും അടിയന്തിര ആവശ്യങ്ങളിൽ ഒന്നാണ്. എന്നിരുന്നാലും കെട്ടിടത്തിന് ആത്യന്തികമായി അടിത്തറ മുതൽ മേൽക്കൂര വരെ പൂർണ്ണമായ നവീകരണം ആവശ്യമാണെന്ന് പള്ളി അധികാരികൾ പറയുന്നു.
