വിശുദ്ധ ഫ്രാൻസിസ് അസീസിയുടെ മരണത്തിന്റെ 800-ാം വാർഷികത്തോടനുബന്ധിച്ച് അദ്ദേഹത്തിന്റെ ഭൗതികാവശിഷ്ടങ്ങൾ ചരിത്രത്തിലാദ്യമായി പൊതുദർശനത്തിന് വെച്ചു. 2026 ഫെബ്രുവരി 21 ശനിയാഴ്ചയാണ് അസീസിയിലെ ബസിലിക്കയിൽ വിശ്വാസികൾക്കായി ഈ അപൂർവ്വ അവസരം ഒരുക്കിയത്.
എട്ടു നൂറ്റാണ്ടുകൾക്ക് മുൻപ് അന്തരിച്ച വിശുദ്ധന്റെ ഭൗതികാവശിഷ്ടങ്ങൾ ഇതിനുമുമ്പ് ശാസ്ത്രീയ പരിശോധനകൾക്കായി പുറത്തെടുത്തിട്ടുണ്ടെങ്കിലും, പൊതുജനങ്ങൾക്ക് വണങ്ങാനായി പ്രദർശിപ്പിക്കുന്നത് ഇതാദ്യമായാണ്. ലെയോ പതിനാലാമൻ മാർപാപ്പയുടെ പ്രത്യേക അനുമതിയോടെയാണ് ഈ തിരുശേഷിപ്പ് പ്രദർശനം നടക്കുന്നത്.
ഫെബ്രുവരി 22 മുതൽ മാർച്ച് 22 വരെ ഒരു മാസക്കാലമാണ് വിശുദ്ധന്റെ ഭൗതികാവശിഷ്ടങ്ങൾ പൊതുദർശനത്തിന് വെക്കുന്നത്. വലിയ നോമ്പുകാലത്ത് വിശ്വാസികൾക്ക് ഇതൊരു വലിയ ആത്മീയ അനുഭവം നൽകും. അസീസിയിലെ ലോവർ ബസിലിക്കയിലുള്ള പേപ്പൽ പീഠത്തിന് താഴെ പ്രത്യേകമായി തയ്യാറാക്കിയ സുരക്ഷിതമായ ചില്ലുപേടകത്തിലാണ് ഭൗതികാവശിഷ്ടങ്ങൾ സ്ഥാപിച്ചിരിക്കുന്നത്.
പ്രദർശനത്തിന്റെ ആദ്യ ഘട്ടത്തിൽത്തന്നെ ഏകദേശം 4,00,000-ത്തിലധികം പേർ സന്ദർശനത്തിനായി രജിസ്റ്റർ ചെയ്തുകഴിഞ്ഞു. ഒരു മാസത്തിനുള്ളിൽ അഞ്ചു ലക്ഷത്തിലധികം പേർ എത്തുമെന്നാണ് പ്രതീക്ഷിക്കുന്നത്.
കാലപ്പഴക്കം ചെന്ന വിശുദ്ധന്റെ അസ്ഥികളും അവശിഷ്ടങ്ങളും ഉൾപ്പെടുന്ന ചിത്രങ്ങൾ വത്തിക്കാൻ പുറത്തുവിട്ടിട്ടുണ്ട്. ഇത് വെറും അസ്ഥികളല്ല, മറിച്ച് എല്ലാം ദൈവത്തിനായി സമർപ്പിച്ച ഒരു ജീവിതത്തിന്റെ അടയാളമാണെന്ന് സഭാ അധികൃതർ പറഞ്ഞു.
1226-ൽ അന്തരിച്ച വിശുദ്ധന്റെ ശരീരം പ്രൊഫനേഷൻ (അപവിത്രമാക്കൽ) ഒഴിവാക്കാനായി നൂറ്റാണ്ടുകളോളം രഹസ്യമായിട്ടാണ് സൂക്ഷിച്ചിരുന്നത്. 1818-ലാണ് ഇവ വീണ്ടും കണ്ടെത്തുന്നത്. വിശുദ്ധ ഫ്രാൻസിസ് അസീസിയുടെ ലാളിത്യവും ദാരിദ്ര്യവും ഉയർത്തിപ്പിടിക്കുന്ന ഈ തിരുശേഷിപ്പ് പ്രദർശനം ലോകമെമ്പാടുമുള്ള വിശ്വാസികൾക്ക് വലിയൊരു ആത്മീയ ഉണർവാണ് നൽകുന്നത്. ഈ വർഷം ഒക്ടോബർ 4-ന് ഇറ്റലിയിൽ വലിയ ആഘോഷങ്ങളോടെയാണ് 800-ാം വാർഷികം സമാപിക്കുന്നത്.
