സാമ്പത്തിക പ്രതിസന്ധിയിൽ ഉഴലുന്ന ഇന്ത്യയുടെ ബജറ്റ് എയർലൈനായ സ്പൈസ് ജെറ്റിന് വീണ്ടും തിരിച്ചടി. ലാൻഡിങ് ഫീസ്, പാർക്കിങ് ചാർജുകൾ, നാവിഗേഷൻ ഫീസ് എന്നിവയുമായി ബന്ധപ്പെട്ട വലിയ തുകയുടെ കുടിശിക അടച്ചുതീർക്കുന്നതിൽ പരാജയപ്പെട്ടതിനെത്തുടർന്ന് ബംഗ്ലാദേശ് സ്പൈസ് ജെറ്റിന് വ്യോമാതിർത്തി വിലക്കി. ഇതോടെ സ്പൈസ് ജെറ്റ് വിമാനങ്ങൾക്ക് ഇനി മുതൽ ബംഗ്ലാദേശ് ആകാശം ഉപയോഗിക്കാൻ കഴിയില്ല.
ബംഗ്ലാദേശ് വ്യോമാതിർത്തി നിഷേധിക്കപ്പെട്ടതോടെ സ്പൈസ് ജെറ്റ് വിമാനങ്ങൾക്ക് ഇനി ദീർഘദൂര റൂട്ടുകൾ സ്വീകരിക്കേണ്ടി വരും. ഇത് വിമാനങ്ങളുടെ യാത്രാ സമയം വർദ്ധിപ്പിക്കുക മാത്രമല്ല, കമ്പനിയുടെ ഇന്ധനച്ചെലവിൽ വലിയ വർദ്ധനവുണ്ടാക്കുകയും ചെയ്യും. നിലവിൽ തന്നെ സാമ്പത്തിക തകർച്ച നേരിടുന്ന കമ്പനിക്ക് ഇത് കനത്ത ആഘാതമാകും. 2025 ഡിസംബറിലെ കണക്കുകൾ പ്രകാരം, സ്പൈസ് ജെറ്റ് 269.27 കോടി രൂപയുടെ അറ്റനഷ്ടത്തിലാണ്.
നിലവിലെ പ്രശ്നങ്ങൾ വ്യവസായ മേഖലയിൽ പതിവാണെന്നും, ബംഗ്ലാദേശ് അധികൃതരുമായി ചർച്ചകൾ നടത്തി വരികയാണെന്നും സ്പൈസ് ജെറ്റ് വക്താവ് അറിയിച്ചു. എത്രയും വേഗം പ്രശ്നം പരിഹരിക്കാൻ ശ്രമിക്കുകയാണെന്നും അവർ വ്യക്തമാക്കി. നിലവിൽ സർവീസുകൾ മുടങ്ങിയതായി റിപ്പോർട്ടുകളില്ലെങ്കിലും, ഇന്ധനച്ചെലവ് വർദ്ധിക്കുന്നത് വരും ദിവസങ്ങളിൽ ടിക്കറ്റ് നിരക്കിനെയോ സർവീസുകളുടെ എണ്ണത്തെയോ ബാധിച്ചേക്കാം.
