മിഡില് ഈസ്റ്റിലെ എണ്ണക്കപ്പലുകള്ക്ക് നേരെയുള്ള ഇറാനിയന് ആക്രമണങ്ങള് ഭയന്ന് ട്രാക്കിംഗ് സംവിധാനങ്ങള് സ്വിച്ച് ഓഫ് ചെയ്ത് ഹോര്മുസ് കടലിടുക്ക് കടന്ന് മൂന്ന് വമ്പന് എണ്ണക്കപ്പലുകള്. മേഖലയിലെ സംഘര്ഷങ്ങള്ക്കിടയിലും എണ്ണ കയറ്റുമതി സുരക്ഷിതമായി തുടരുന്നതിനായി കപ്പലുകള് സ്വീകരിക്കുന്ന പുതിയ രീതിയാണിതെന്ന് റോയിട്ടേഴ്സ് റിപ്പോര്ട്ട് ചെയ്യുന്നു.
അജിയോസ് ഫനോറിയോസ് I (Agios Fanourios I), കിയാര എം (Kiara M) എന്നീ രണ്ട് വലിയ ക്രൂഡ് ഓയില് എന്നീ രണ്ട് സൂപ്പര് ടാങ്കറുകള് ഞായറാഴ്ചയാണ് കടലിടുക്ക് കടന്നത്. ഇവയോരോന്നിലും 20 ലക്ഷം ബാരല് ഇറാഖി ക്രൂഡ് ഓയില് വീതമുണ്ട്. അജിയോസ് ഫനോറിയോസ് I മെയ് 26-ഓടെ വിയറ്റ്നാമിലെ റിഫൈനറിയില് എണ്ണ എത്തിക്കും. മുന്പ് രണ്ട് തവണ ഈ കപ്പല് കടലിടുക്ക് കടക്കാന് ശ്രമിച്ചെങ്കിലും പരാജയപ്പെട്ടിരുന്നു. അബുദാബിയില് നിന്ന് 20 ലക്ഷം ബാരല് എണ്ണയുമായി മെയ് ആറിന് പുറപ്പെട്ട ‘Basrah Energy’ എന്ന കപ്പല് മെയ് എട്ടിന് ഫുജൈറയില് സുരക്ഷിതമായി എണ്ണ എത്തിച്ചു.
മിഡില് ഈസ്റ്റ് സംഘര്ഷത്തെത്തുടര്ന്ന് ഗള്ഫ് മേഖലയില് കുടുങ്ങിക്കിടക്കുന്ന എണ്ണ പുറത്തെത്തിക്കാന് അബുദാബി നാഷണല് ഓയില് കമ്പനിയും (ADNOC) മറ്റ് എണ്ണ വ്യാപാരികളും അതീവ രഹസ്യമായിട്ടാണ് ഇത്തരം നീക്കങ്ങള് നടത്തുന്നത്. എണ്ണ വിപണിയിലെ തടസങ്ങള് ഒഴിവാക്കാന് ഷിപ്പിംഗ് കമ്പനികള് സ്വീകരിക്കുന്ന ഈ ‘സൈലന്റ് ട്രാഫിക്’ രീതി അന്താരാഷ്ട്ര തലത്തില് ശ്രദ്ധിക്കപ്പെടുന്നുണ്ട്.
എന്തുകൊണ്ടാണ് ഈ മാറ്റം?
മിഡില് ഈസ്റ്റിലെ രാഷ്ട്രീയ സാഹചര്യങ്ങള് കൂടുതല് കടുപ്പമേറിയതാകുന്നത് ആഗോള എണ്ണ വിപണിയെ സാരമായി ബാധിക്കുന്നുണ്ട്. ഹോര്മുസ് കടലിടുക്ക് വഴി ലോകത്തിലെ മൊത്തം എണ്ണ ഉപഭോഗത്തിന്റെ ഏകദേശം 20 ശതമാനം കടന്നുപോകുന്നു എന്നതിനാല് ഈ റൂട്ടിന്റെ സുരക്ഷ വളരെ പ്രധാനമാണ്.
സുരക്ഷാ മുന്കരുതല്: തങ്ങളുടെ ലൊക്കേഷന് ശത്രുക്കള്ക്ക് ലഭിക്കാതിരിക്കാനാണ് കപ്പലുകള് ട്രാന്സ്പോണ്ടറുകള് ഓഫ് ചെയ്യുന്നത്. ഇത് ‘ഡാര്ക്ക് ലിങ്ക്’ എന്നറിയപ്പെടുന്നു.
വിതരണ ശൃംഖല: ഇത്രയധികം എണ്ണ വഹിക്കുന്ന കപ്പലുകള് സുരക്ഷിതമായി ലക്ഷ്യസ്ഥാനത്ത് എത്തേണ്ടത് അന്താരാഷ്ട്ര വിപണിയില് എണ്ണവില വര്ദ്ധിക്കാതിരിക്കാന് അത്യാവശ്യമാണ്.
ഇത് മേഖലയിലെ സുരക്ഷാ ഭീഷണികള്ക്കിടയിലും എണ്ണ കയറ്റുമതി തടസ്സമില്ലാതെ മുന്നോട്ട് കൊണ്ടുപോകാനുള്ള പുതിയൊരു തന്ത്രമായിട്ടാണ് വിദഗ്ധര് വിലയിരുത്തുന്നത്.
