ലോകമെമ്പാടുമുള്ള കുടിവെള്ള ക്ഷാമവും ശുചിമുറികളുടെ കുറവും ഏറ്റവും കൂടുതൽ ബാധിക്കുന്നത് സ്ത്രീകളെയും പെൺകുട്ടികളെയും ആണെന്ന് ഐക്യരാഷ്ട്രസഭ. വികസ്വര രാജ്യങ്ങളിലെ ഗ്രാമപ്രദേശങ്ങളിൽ വെള്ളം ശേഖരിക്കുന്ന ജോലി എഴുപത് ശതമാനത്തിലധികം വീടുകളിലും സ്ത്രീകൾ തന്നെയാണ് ചെയ്യുന്നത്. ഇതിനായി ഓരോ ദിവസവും ദശലക്ഷക്കണക്കിന് മണിക്കൂറുകളാണ് ഇവർ ചിലവഴിക്കുന്നത്.
വെള്ളം തേടിയുള്ള ഈ നീണ്ട യാത്രകൾ സ്ത്രീകളുടെ ആരോഗ്യത്തെയും പെൺകുട്ടികളുടെ വിദ്യാഭ്യാസത്തെയും മോശമായി ബാധിക്കുന്നുണ്ട്. ആവശ്യത്തിന് ശുചിമുറികൾ ഇല്ലാത്തതിനാൽ ലക്ഷക്കണക്കിന് പെൺകുട്ടികൾക്ക് സ്കൂളിൽ പോകാൻ കഴിയാത്ത അവസ്ഥയാണുള്ളത്. കാലാവസ്ഥാ വ്യതിയാനം കാരണം ചൂട് വർധിക്കുന്നത് ഈ പ്രതിസന്ധി ഇരട്ടിയാക്കുന്നുവെന്നും റിപ്പോർട്ടിൽ പറയുന്നു.
കുടിവെള്ള വിതരണവുമായി ബന്ധപ്പെട്ട തീരുമാനങ്ങൾ എടുക്കുന്നതിൽ സ്ത്രീകൾക്ക് തുല്യപങ്കാളിത്തം നൽകിയാൽ മാത്രമേ ഈ പ്രശ്നത്തിന് പരിഹാരമാകൂ എന്ന് അധികൃതർ ചൂണ്ടിക്കാട്ടുന്നു. സ്ത്രീകൾക്ക് സുരക്ഷിതമായി വെള്ളം ലഭിക്കുന്നത് കുടുംബത്തിന്റെ സാമ്പത്തിക ഭദ്രതയ്ക്കും കുട്ടികളുടെ ആരോഗ്യത്തിനും വലിയ ഗുണം ചെയ്യും. കുടിവെള്ളം ഒരു ആഡംബരമല്ലെന്നും അത് ഓരോ മനുഷ്യന്റെയും അവകാശമാണെന്നും ഐക്യരാഷ്ട്രസഭ ഓർമ്മിപ്പിച്ചു.
