ഓപ്പൺഎ.ഐയുടെ ചീഫ് എക്സിക്യൂട്ടീവ് ഓഫീസറായ സാം ആൾട്ട്മാൻ, പുതിയ ആർട്ടിഫിഷ്യൽ ഇന്റലിജൻസ് (എ.ഐ) മോഡലുകൾ പൊതുജനങ്ങൾക്ക് ലഭ്യമാക്കുന്നതിന് മുമ്പ് സർക്കാർ അനുമതി നിർബന്ധമാക്കരുതെന്ന് അമേരിക്കൻ നിയമനിർമാതാക്കളോട് ആവശ്യപ്പെടാനൊരുങ്ങുന്നതായി റിപ്പോർട്ട്.
ഈ ആഴ്ച വാഷിങ്ടണിലെത്തിയ ആൾട്ട്മാൻ, എ.ഐ സാങ്കേതികവിദ്യയെ സംബന്ധിച്ച നിയമനിർമാണ ചർച്ചകളിൽ പങ്കെടുത്ത് കമ്പനിയുടെ നിലപാട് അവതരിപ്പിക്കും എന്നാണ് ലഭിക്കുന്ന വിവരം. അതോടൊപ്പം, അമേരിക്കൻ വാണിജ്യ വകുപ്പിന് കീഴിലുള്ള എ.ഐ പരിശോധനാ പദ്ധതികൾക്ക് കൂടുതൽ ധനസഹായം നൽകണമെന്നും അദ്ദേഹം കോൺഗ്രസിനോട് ആവശ്യപ്പെടും. നിലവിൽ ഓപ്പൺഎ.ഐ, ആന്ത്രോപിക് തുടങ്ങിയ കമ്പനികളുമായി ചേർന്ന് വാണിജ്യ വകുപ്പ് എ.ഐ മോഡലുകളുടെ സുരക്ഷയും പ്രവർത്തനക്ഷമതയും പരിശോധിക്കുന്നുണ്ട്.
ഈ പദ്ധതി കൂടുതൽ വിപുലീകരിക്കണമെന്നും സൈബർ സുരക്ഷ, ജൈവായുധ ഭീഷണികൾ, ദേശീയ സുരക്ഷ തുടങ്ങിയ മേഖലകളിൽ വിദഗ്ധരായ ശാസ്ത്രജ്ഞരെ ഉൾപ്പെടുത്തണമെന്നും ഓപ്പൺഎ.ഐ ആവശ്യപ്പെടുന്നു.
സാം ആൾട്ട്മാന്റെ വാഷിങ്ടൺ സന്ദർശനം കമ്പനിക്കും എ.ഐ മേഖലയ്ക്കും നിർണായക സമയത്താണ് നടക്കുന്നത്. ഓപ്പൺഎ.ഐ ഓഹരി വിപണിയിലേക്ക് പ്രവേശിക്കുന്നതിനുള്ള പ്രാരംഭ നടപടികൾ രഹസ്യമായി ആരംഭിച്ചിട്ടുണ്ടെന്നാണ് റിപ്പോർട്ടുകൾ. അതേസമയം, ക്ലോഡ് എന്ന എ.ഐ മോഡൽ വികസിപ്പിച്ച ആന്ത്രോപിക് കമ്പനിയും ഈ ആഴ്ച അമേരിക്കൻ ഓഹരി വിപണിയിലേക്കുള്ള രഹസ്യ അപേക്ഷ സമർപ്പിച്ചിട്ടുണ്ട്.
പുതിയ എ.ഐ മോഡലുകൾ പുറത്തിറക്കുന്നതിന് മുമ്പ് സർക്കാർ അനുമതി നിർബന്ധമാക്കിയാൽ, അത് കമ്പനികളുടെ പ്രവർത്തന വേഗത കുറയ്ക്കുകയും ലാഭത്തെ ബാധിക്കുകയും ചെയ്യുമെന്ന് വ്യവസായ രംഗം ആശങ്കപ്പെടുന്നു. സുരക്ഷാ ആശങ്കകൾ പരിഹരിക്കാൻ ഉൽപ്പന്നങ്ങളുടെ പ്രവർത്തനരീതിയിൽ വലിയ മാറ്റങ്ങൾ വരുത്തേണ്ട സാഹചര്യം ഉണ്ടാകുമെന്നും കമ്പനികൾ ചൂണ്ടിക്കാട്ടുന്നു.
