വാഷിങ്ടൺ: അമേരിക്കയിൽ വാൾമാർട്ട് സ്റ്റോറുകൾ അടക്കുകയാണോ? ഗവൺമെൻ്റ് ഷട്ട്ഡൗണിനെ തുടർന്ന് ഫെഡറൽ സർക്കാരിൻ്റെ സപ്ലിമെൻ്റൽ ന്യൂട്രീഷ്യൻ അസിസ്റ്റൻസ് പ്രോഗ്രാം (SNAP) എന്നറിയപ്പെടുന്ന ഭക്ഷ്യസഹായ പദ്ധതിയുടെ ആനുകൂല്യം മുടങ്ങുമെന്ന ആശങ്കയുടെ പശ്ചാത്തലത്തിൽ വാൾമാർട്ട് സ്റ്റോറുകൾ അടയ്ക്കുകയാണെന്ന പ്രചാരണം നടക്കുകയാണ്. സോഷ്യൽ മീഡിയ പ്ലാറ്റ്ഫോമായ ടിക്ക് ടോക്കിലൂടെ നടക്കുന്ന പ്രചാരണത്തിൽ, നവംബർ ഒന്നിന് എല്ലാ വാൾമാർട്ട് സ്റ്റോറുകളും അടയ്ക്കുമെന്നും ഓൺലൈനിൽ ഓർഡർ ചെയ്യാനുള്ള സൗകര്യം മാത്രമേ ഉപഭോക്താക്കൾക്ക് ഉണ്ടാകുകയെന്നും പറയുന്നു. എന്നാൽ ഇതിൻ്റെ സത്യാവസ്ഥ എന്താണ്?
ഫെഡറൽ ഭക്ഷ്യസഹായം മുടങ്ങിയാൽ സ്റ്റോറുകളിൽ കവർച്ച നടക്കുന്ന മുന്നറിയിപ്പിൻ്റെ പശ്ചാത്തലത്തിൽ വാൾമാർട്ട് അടച്ചുപൂട്ടൽ നടപടി സ്വീകരിക്കുകയാണെന്നാണ് പ്രചാരണം. ടിക്ക് ടോക്കിൽ പ്രചരിക്കുന്ന ഒരു വീഡിയോയിൽ, വാൾമാർട്ട് നവംബർ ഒന്നിന് എല്ലാ സ്റ്റോറുകളും അടയ്ക്കുമെന്നും ഓൺലൈനിൽ മാത്രമേ ഓർഡർ ചെയ്യാൻ സാധിക്കൂ എന്നും അവകാശപ്പെടുന്നു. സപ്ലിമെൻ്റൽ ന്യൂട്രീഷ്യൻ അസിസ്റ്റൻസ് പ്രോഗ്രാം ആനുകൂല്യങ്ങൾ നിർത്തിവെച്ചാൽ ഉണ്ടാകാനിടയുള്ള സംഭവങ്ങളുമായി ബന്ധപ്പെട്ട ആശങ്കകൾ കാരണമാണ് കമ്പനി ഈ തീരുമാനമെടുത്തതെന്നും വീഡിയോയിൽ ആരോപിക്കുന്നു. ലക്ഷക്കണക്കിന് പേർ കണ്ട വീഡിയോയ്ക്ക് പതിനായിരക്കണക്കിന് പേർ ലൈക്കും ചെയ്തിട്ടുണ്ട്.
എന്നാൽ, സോഷ്യൽ മീഡിയ പ്രചാരണം വ്യാജമാണെന്ന് ചൂണ്ടിക്കാട്ടി വാൾമാർട്ട് തന്നെ രംഗത്തെത്തി. കടകൾ അടച്ചിടുമെന്നും ഓൺലൈനിൽ മാത്രം ഓർഡർ ചെയ്യാൻ സാധിക്കുമെന്നും പ്രചരിക്കുന്ന വാർത്തകൾ അടിസ്ഥാനരഹിതമാണെന്ന് കമ്പനി വക്താവ് അറിയിച്ചതായി ഫോക്സ് ബിസിനസ് റിപ്പോർട്ട് ചെയ്തു. ഈ അവകാശവാദങ്ങൾ തെറ്റാണെന്നും വാൾമാർട്ട് ബിസിനസ് തുടരുമെന്നും കമ്പനി വക്താവ് പറഞ്ഞു. തെറ്റായ വിവരങ്ങൾ പ്രചരിപ്പിക്കുന്ന വീഡിയോകൾ നീക്കം ചെയ്തതായി ടിക്ക് ടോക്കും അറിയിച്ചു.
ഭക്ഷ്യസഹായ ആനുകൂല്യങ്ങൾ മുടങ്ങിയാൽ വാൾമാർട്ടും മറ്റ് ഗ്രോസറി സ്റ്റോറുകളും കൂട്ടക്കവർച്ചാ ഭീഷണി നേരിടുന്നുണ്ടെന്ന് ന്യൂയോർക്ക് നിയമ നിർവഹണ വൃത്തങ്ങളെ ഉദ്ധരിച്ചു ന്യൂയോർക്ക് പോസ്റ്റ് റിപ്പോർട്ട് ചെയ്തിരുന്നു. 40 ദശലക്ഷത്തിലധികം അമേരിക്കക്കാർക്ക് ഭക്ഷ്യസഹായം നൽകുന്ന സപ്ലിമെൻ്റൽ ന്യൂട്രീഷ്യൻ അസിസ്റ്റൻസ് പ്രോഗ്രാം മുടങ്ങുന്നത് വലിയ പ്രതിസന്ധിക്ക് വഴിവെച്ചേക്കാം. നവംബർ ഒന്നിന് യാതൊരു ആനുകൂല്യങ്ങളും വിതരണം ചെയ്യില്ലെന്ന് യുഎസ് ഡിപ്പാർട്ട്മെൻ്റ് ഓഫ് അഗ്രിക്കൾച്ചർ അറിയിച്ചിട്ടുണ്ട്.
60 വർഷത്തെ ചരിത്രമുള്ള സപ്ലിമെൻ്റൽ ന്യൂട്രീഷ്യൻ അസിസ്റ്റൻസ് പ്രോഗ്രാം താഴ്ന്ന വരുമാനമുള്ള കുടുംബങ്ങൾക്ക് ഒരു പ്രധാന സഹായമായിരുന്നു. പദ്ധതി നടത്തിപ്പിനായി ഫണ്ടില്ലാത്തതാണ് പ്രതിസന്ധി സൃഷ്ടിക്കുന്നത്. ഷട്ട്ഡൗൺ കാരണം ഖജനാവ് കാലിയായെന്ന് സൂചിപ്പിച്ചു ഡിപ്പാർട്ട്മെൻ്റ് ഓഫ് അഗ്രിക്കൾച്ചർ അധികൃതർ രംഗത്തെത്തിയിരുന്നു. കൂടാതെ, കരുതൽ ഫണ്ട് ഉപയോഗിക്കില്ലെന്നും ഡിപ്പാർട്ട്മെൻ്റ് നിലപാടെടുത്തിട്ടുണ്ട്.
സപ്ലിമെൻ്റൽ ന്യൂട്രീഷ്യൻ അസിസ്റ്റൻസ് പ്രോഗ്രാം ഗുണഭോക്താക്കളുടെ പക്കലുള്ള ഇലക്ട്രോണിക് ബെനിഫിറ്റ് ട്രാൻസ്ഫർ (EBT) കാർഡിൽ പ്രതിമാസം ശരാശരി 187 ഡോളർ ആണ് സർക്കാർ വിതരണം ചെയ്യുന്നത്. ഇതുപയോഗിച്ചു ഗുണഭോക്താക്കൾക്ക് അംഗീകൃത സ്റ്റോറുകളിൽ നിന്നും കർഷക വിപണികളിൽ നിന്നും പഴങ്ങൾ, മാംസം, പാൽ ഉൽപന്നങ്ങൾ, മറ്റ് ഭക്ഷ്യവസ്തുക്കൾ തുടങ്ങിയവ വാങ്ങാം. അതേസമയം നവംബറിൽ ആനുകൂല്യം ലഭിച്ചില്ലെങ്കിലും ഇബിടി കാർഡുകളിലെ നിലവിലുള്ള ഫണ്ടുകൾ ഉപയോഗിച്ച് സാധനങ്ങൾ വാങ്ങാൻ കഴിയും. എന്നാൽ നവംബർ ആദ്യം മുതൽ പലയിടത്തും സ്റ്റോറുകളിൽ തിരക്ക് കൂടാനും സാധനങ്ങൾ തീർന്നുപോകാനും സാധ്യതയുണ്ടെന്ന റിപ്പോർട്ടുകൾ പുറത്തുവന്നിരുന്നു.
ഭക്ഷ്യസഹായ പദ്ധതി മുടങ്ങാതിരിക്കാനുള്ള നടപടികൾ ചില സംസ്ഥാനങ്ങൾ ആരംഭിച്ചിട്ടുണ്ട്. ലൂസിയാന, വെർമോണ്ട്, ന്യൂയോർക്ക്, കണക്റ്റിക്കട്ട്, ഹവായി, അയവ, മിനസോട്ട, ന്യൂ ഹാംഷെയർ, നെവാഡ, ന്യൂ മെക്സിക്കോ, റോഡ് ഐലൻഡ്, സൗത്ത് കരോലിന, വെർജീനിയ, വാഷിങ്ടൺ തുടങ്ങിയ സംസ്ഥാനങ്ങളാണ് ഗുണഭോക്താക്കളെ സഹായിക്കാനായി നടപടികൾ പ്രഖ്യാപിച്ചത്. ഭക്ഷ്യസഹായ വിതരണത്തിന് കരുതൽ ഫണ്ട് ഉപയോഗിക്കില്ലെന്ന തീരുമാനത്തിൽ ഇടപെടുമെന്ന് ബോസ്റ്റണിലെ ഒരു ഫെഡറൽ ജഡ്ജി സൂചിപ്പിച്ചിട്ടുണ്ട്.
