ഫെബ്രുവരി 14, ഇന്ത്യയെ സംബന്ധിച്ചിടത്തോളം കേവലം പ്രണയദിനം മാത്രമല്ല, രാജ്യം കണ്ണീരോടെ സ്മരിക്കുന്ന ഒരു കറുത്ത ദിനം (Black Day) കൂടിയാണ്. 2019 ഫെബ്രുവരി 14-ന് പുൽവാമയിൽ നടന്ന ഭീകരാക്രമണത്തിൽ വീരമൃത്യു വരിച്ച 40 സിആർപിഎഫ് (CRPF) ജവാന്മാരുടെ സ്മരണയ്ക്കായി രാജ്യം ഇന്ന് ആദരാഞ്ജലികൾ അർപ്പിക്കുന്നു. ‘പുൽവാമ ബ്ലാക്ക് ഡേ’ എന്ന പേരിൽ ഓരോ വർഷവും ഫെബ്രുവരി 14ന് വീരജവാന്മാരെ രാജ്യം അനുസ്മരിക്കുന്നു.
ഈ ആക്രമണത്തിന്റെ ഉത്തരവാദിത്വം പാകിസ്ഥാനിൽ ആസ്ഥാനമായുള്ള ഭീകരസംഘടനയായ ജെയ്ഷെ മുഹമ്മദ് ഏറ്റെടുത്തു. സംഭവത്തിന് പിന്നാലെ രാജ്യത്ത് ശക്തമായ പ്രതിഷേധം ഉയർന്നു. ഇന്ത്യ-പാകിസ്ഥാൻ ബന്ധങ്ങൾ വഷളായി, അതിർത്തിയിൽ സംഘർഷാവസ്ഥ ശക്തമായി. പുൽവാമ ആക്രമണത്തിന് പിന്നാലെ ഇന്ത്യ ശക്തമായ നയതന്ത്ര-സൈനിക നടപടികൾ സ്വീകരിച്ചു. രാജ്യവ്യാപകമായി അനുസ്മരണ ചടങ്ങുകളും പ്രതിഷേധങ്ങളും നടന്നു. വീരമൃത്യു വരിച്ച ജവാന്മാരുടെ കുടുംബങ്ങൾക്ക് പിന്തുണയായി രാജ്യം ഒന്നായി നിന്നു.
രാജ്യത്തിന്റെ ഐക്യവും സുരക്ഷയും കാക്കാൻ ജീവൻ സമർപ്പിച്ച ജവാന്മാരുടെ ത്യാഗം ഇന്ത്യയുടെ ചരിത്രത്തിൽ സ്വർണക്ഷരങ്ങളിൽ എഴുതപ്പെട്ടിരിക്കുന്നു. അവരുടെ കുടുംബങ്ങളുടെ വേദനയിൽ പങ്കുചേരുകയും, രാജ്യസ്നേഹവും ഐക്യവും നിലനിർത്തുകയും ചെയ്യുന്നത് ഓരോ പൗരന്റെയും കടമയാണ്.
