ലാത്വിയൻ രാജ്യത്തുനിന്നും റോമിലേക്ക് ഔദ്യോഗികമായി നടത്തിയ തീർത്ഥാടനത്തിന്റെ നൂറാം വാർഷികത്തിൽ, പ്രത്യാശയുടെ ജൂബിലി വർഷതീർത്ഥാടനത്തിനായി, ഒരിക്കൽ കൂടി തീർത്ഥാടകർ റോമിലെത്തി. രാജ്യത്തിൻറെ പ്രധാനമന്ത്രി, എവിക സിലിനായും, തീർത്ഥാടകർക്കൊപ്പം റോമിൽ എത്തിച്ചേർന്നു. തീർത്ഥാടകരെ, ലിയോ പതിനാലാമൻ പാപ്പാ, നവംബർ മാസം, ഇരുപത്തിനാലാം തീയതി വത്തിക്കാനിൽ സ്വീകരിക്കുകയും, അവരുമായി കൂടിക്കാഴ്ച നടത്തി, സന്ദേശം നൽകുകയും ചെയ്തു.
പൂർവ്വികരുടെ വിശ്വാസ പാരമ്പര്യം പിന്തുടർന്നുകൊണ്ട്, തീർത്ഥാടനത്തിനായി റോമിലെത്തിയ ലാത്വിയൻ തീർത്ഥാടകരെ കണ്ടുമുട്ടുന്നതിൽ തനിക്കുള്ള അതിയായ സന്തോഷം പാപ്പാ, സന്ദേശത്തിൽ എടുത്തു പറഞ്ഞു. അപ്പസ്തോലന്മാരായ പത്രോസും പൗലോസും രക്തസാക്ഷികളായി സുവിശേഷത്തിന് പരമോന്നത സാക്ഷ്യം നൽകിയ ഇടമെന്ന നിലയിൽ, റോം എല്ലാ ക്രിസ്ത്യാനികളുടെയും ഭവനമാണെന്നും, ഈ ഭവനത്തിൽ ലാത്വിയൻ തീർത്ഥാടകരുടെ സാന്നിധ്യത്തിന് താൻ നന്ദിയർപ്പിക്കുന്നുവെന്നും പാപ്പാ പറഞ്ഞു.
ഈ ഇരു അപ്പസ്തോലന്മാരുടെയും, റോമിലെ മറ്റു വിശുദ്ധരുടെയും ജീവിതത്തിൽ നിന്നും പ്രചോദനം ഉൾക്കൊള്ളുവാനും പാപ്പാ ഏവരെയും ആഹ്വാനം ചെയ്തു. സാഹചര്യങ്ങളുടെ അനിശ്ചിതത്വവും, വെല്ലുവിളികളും ഏറെ ഉണ്ടായിരുന്നിട്ടും, അവരുടെ ജീവിതം വഴിയായി, പ്രത്യാശ നമ്മെ നിരാശരാക്കുന്നില്ലെന്നു അവർ സാക്ഷ്യപ്പെടുത്തുന്നതും പാപ്പാ ചൂണ്ടിക്കാട്ടി.
ഇന്ന് രാജ്യം നേരിടുന്ന പ്രശ്നങ്ങൾ, കഴിഞ്ഞകാലങ്ങളിൽ നേരിട്ട വെല്ലുവിളികളെ ഓർമ്മപ്പെടുത്തുന്നുവെങ്കിലും, ഈ അവസ്ഥകളിലും ദൈവത്തിങ്കലേക്കു തിരിയുവാനും, അവന്റെ കൃപയാൽ ശക്തിപ്പെടുവാനും പാപ്പാ ഏവരെയും ക്ഷണിച്ചു. രാഷ്ട്രത്തിന്റെ സ്വാതന്ത്ര്യ ശതാബ്ദിവേളയിൽ ഫ്രാൻസിസ് പാപ്പാ നടത്തിയ സന്ദർശനവും, ലിയോ പതിനാലാമൻ പാപ്പാ അനുസ്മരിച്ചു.
ഈ വർഷത്തെ ജൂബിലിയുടെ കേന്ദ്ര വിഷയമായ ‘പ്രത്യാശ’ എല്ലാ ചോദ്യങ്ങൾക്കും ഉത്തരം നൽകുന്നുവെന്ന് അർത്ഥമാക്കുന്നില്ലായെന്നും, മറിച്ച് ദൈവത്തിൽ ആശ്രയിക്കാനും ക്രിസ്തുവിനെ കൂടുതൽ അടുത്ത് പിന്തുടരാനും അത് നമ്മോട് ആവശ്യപ്പെടുന്നുവെന്നും പാപ്പാ പറഞ്ഞു.
രാജ്യത്തിന്റെ ചരിത്രത്തിൽ ക്രിസ്തീയ വിശ്വാസം വഹിച്ച സുപ്രധാന പങ്കിനെക്കുറിച്ച് ഫ്രാൻസിസ് പാപ്പാ സംസാരിച്ചതും പാപ്പാ അനുസ്മരിച്ചു. ഇക്കാരണത്താൽ, കഴിഞ്ഞ കുറച്ച് വർഷങ്ങളായി ലാത്വിയയും പരിശുദ്ധ സിംഹാസനവും തമ്മിലുള്ള ബന്ധം കൂടുതൽ അടുത്തതിൽ താൻ ഏറെ കൃതാർത്ഥനാണെന്നും പാപ്പാ പറഞ്ഞു.
പ്രത്യാശയാൽ നാം പ്രോത്സാഹിപ്പിക്കപ്പെടുമ്പോൾ, അതേ സമയം, വർത്തമാനകാലത്തിൽ നമ്മുടെ ദൃഷ്ടികൾ ഉറപ്പിക്കുന്നതിനും, ദൈവം ഇവിടെയും, ഇപ്പോഴും നമ്മെ അനുഗ്രഹിക്കുന്ന നിരവധി വഴികൾ കാണുന്നതിനും നാം അതിനെ വിശ്വാസത്തിന്റെ പുണ്യവുമായി ഒന്നിപ്പിക്കണമെന്നും പാപ്പാ പറഞ്ഞു. തീർത്ഥാടനത്തിന് നമ്മുടെ വിശ്വാസ ജീവിതത്തിൽ ഒരു പ്രധാന പങ്കുണ്ടെന്നും, കാരണം അത് ദൈവത്തെ കൂടുതൽ ആഴത്തിൽ കണ്ടുമുട്ടാനുള്ള സ്ഥലവും, സമയവും ഒരുക്കുന്നുവെന്നും പറഞ്ഞ പാപ്പാ, ഇത് ദൈനംദിന ജീവിതത്തിന്റെ ദിനചര്യയിൽ നിന്നും ശബ്ദത്തിൽ നിന്നും നമ്മെ അകറ്റുകയും ദൈവത്തിന്റെ ശബ്ദം കൂടുതൽ വ്യക്തമായി കേൾക്കാനുള്ള സ്ഥലവും നിശബ്ദതയും വാഗ്ദാനം ചെയ്യുന്നുവെന്നും കൂട്ടിച്ചേർത്തു.
