വികസന പദ്ധതികളുടെ ഉദ്ഘാടനത്തിനും എൻഡിഎയുടെ തിരഞ്ഞെടുപ്പ് പ്രചാരണത്തിനും ആവേശം പകരാൻ പ്രധാനമന്ത്രി നരേന്ദ്ര മോദി ബുധനാഴ്ച കൊച്ചിയിലെത്തും. പതിനായിരം പ്രവർത്തകർ അണിനിരക്കുന്ന ഗംഭീരമായ റോഡ് ഷോയോടെയാണ് എൻഡിഎ പ്രധാനമന്ത്രിയെ സ്വീകരിക്കുക.
എറണാകുളം, തൃശൂർ ജില്ലകളിൽ നിന്നായി അര ലക്ഷത്തോളം പ്രവർത്തകർ കൊച്ചിയിലെ തിരഞ്ഞെടുപ്പ് പ്രചാരണ ഉദ്ഘാടന ചടങ്ങിൽ പങ്കെടുക്കും. ബിഡിജെഎസ്, ട്വന്റി 20, നാഷനലിസ്റ്റ് കേരള കോൺഗ്രസ് തുടങ്ങി എൻഡിഎയിലെ പന്ത്രണ്ടോളം സഖ്യകക്ഷികളുടെ നേതാക്കളും പ്രവർത്തകരും ചടങ്ങിൽ അണിനിരക്കും. വരാനിരിക്കുന്ന തിരഞ്ഞെടുപ്പിലെ നിർണ്ണായകമായ പാർട്ടി നിലപാടുകളും നീക്കങ്ങളും പ്രധാനമന്ത്രി ഈ വേദിയിൽ പ്രഖ്യാപിക്കുമെന്ന് ബിജെപി നേതൃത്വം അറിയിച്ചു.
