2026-ലെ ടി20 ലോകകപ്പിൽ ഫെബ്രുവരി 15-ന് നടക്കേണ്ട ഇന്ത്യ-പാകിസ്ഥാൻ മത്സരവുമായി ബന്ധപ്പെട്ട അനിശ്ചിതത്വം 24 മണിക്കൂറിനുള്ളിൽ അവസാനിച്ചേക്കും. ലാഹോറിലെ ഗദ്ദാഫി സ്റ്റേഡിയത്തിൽ ഐസിസി (ICC) ഉന്നത ഉദ്യോഗസ്ഥരും പാകിസ്ഥാൻ ക്രിക്കറ്റ് ബോർഡ് (PCB) അധികൃതരും തമ്മിൽ അഞ്ച് മണിക്കൂർ നീണ്ട മാരത്തൺ ചർച്ചകൾ പൂർത്തിയായി.
പാകിസ്ഥാൻ ഉയർത്തിയ ബഹിഷ്കരണ ഭീഷണിയിൽ നിന്ന് പിന്മാറുന്ന കാര്യത്തിൽ ഫെഡറൽ സർക്കാരുമായി ചർച്ച ചെയ്ത ശേഷം പിസിബി ചെയർമാൻ മൊഹ്സിൻ നഖ്വി അന്തിമ നിലപാട് വ്യക്തമാക്കും.
ഐസിസി ഡെപ്യൂട്ടി ചെയർമാൻ ഇമ്രാൻ ഖ്വാജയുടെ നേതൃത്വത്തിലുള്ള സംഘമാണ് ലാഹോറിലെത്തിയത്. ചർച്ചയിൽ പിസിബി ചെയർമാൻ മൊഹ്സിൻ നഖ്വിക്ക് പുറമെ ബംഗ്ലാദേശ് ക്രിക്കറ്റ് ബോർഡ് (BCB) പ്രസിഡന്റ് അമിനുൽ ഇസ്ലാമും പങ്കെടുത്തു.
പൗരത്വ നിയമവുമായി ബന്ധപ്പെട്ട സുരക്ഷാ പ്രശ്നങ്ങളെ തുടർന്ന് ഇന്ത്യയിൽ കളിക്കാൻ വിസമ്മതിച്ച ബംഗ്ലാദേശിനെ ലോകകപ്പിൽ നിന്ന് ഒഴിവാക്കി പകരം സ്കോട്ട്ലൻഡിനെ ഉൾപ്പെടുത്തിയതിലുള്ള പ്രതിഷേധമായാണ് പാകിസ്ഥാൻ ഇന്ത്യക്കെതിരായ മത്സരം ബഹിഷ്കരിക്കുമെന്ന് പ്രഖ്യാപിച്ചത്. ബംഗ്ലാദേശിനോടുള്ള ഐക്യദാർഢ്യം പ്രകടിപ്പിക്കാൻ പാക് സർക്കാർ നൽകിയ നിർദ്ദേശമായിരുന്നു ഇതിന് പിന്നിൽ.
ഐസിസിയുടെ മുന്നറിയിപ്പ്
ഇന്ത്യ-പാകിസ്ഥാൻ മത്സരം ബഹിഷ്കരിച്ചാൽ ഉണ്ടാകാവുന്ന കടുത്ത സാമ്പത്തിക-നിയമ പ്രത്യാഘാതങ്ങളെക്കുറിച്ച് ഐസിസി പിസിബിക്ക് മുന്നറിയിപ്പ് നൽകിയിട്ടുണ്ട്. മത്സരത്തിൽ നിന്ന് പിന്മാറിയാൽ പാകിസ്ഥാന് വൻതുക പിഴയായി നൽകേണ്ടി വരും.
കൂടാതെ ഭാവിയിലെ ഐസിസി ടൂർണമെന്റുകളുടെ ആതിഥേയത്വം വഹിക്കാനുള്ള അവകാശവും പോയിന്റുകളും നഷ്ടപ്പെട്ടേക്കാം. ഏകദേശം 2200 കോടി രൂപയുടെ വരുമാന നഷ്ടമാണ് ഈ ഒരൊറ്റ മത്സരം നടക്കാതിരുന്നാൽ ഐസിസിക്ക് ഉണ്ടാവുക. ഇതോടെ പാകിസ്ഥാൻ തങ്ങളുടെ കർക്കശ നിലപാടിൽ അയവ് വരുത്തിയതായാണ് റിപ്പോർട്ടുകൾ.
പിസിബിയുടെ ഉപാധികൾ
ബഹിഷ്കരണത്തിൽ നിന്ന് പിന്മാറാൻ ചില ഉപാധികൾ പിസിബി ഐസിസിക്ക് മുന്നിൽ വെച്ചിട്ടുണ്ട്. ടൂർണമെന്റിൽ നിന്ന് പുറത്തായ ബംഗ്ലാദേശിന് അർഹമായ നഷ്ടപരിഹാരം നൽകുക, ഭാവിയിലെ ഐസിസി ടൂർണമെന്റുകളുടെ വേദി നിശ്ചയിക്കുമ്പോൾ പരിഗണന നൽകുക എന്നിവയാണ് പ്രധാന ആവശ്യങ്ങൾ. കൂടാതെ ഇന്ത്യയുമായുള്ള ഉഭയകക്ഷി പരമ്പരകൾ പുനരാരംഭിക്കാൻ ഐസിസി ഇടപെടണമെന്നും പിസിബി ആവശ്യപ്പെട്ടിട്ടുണ്ട്.
ഫെബ്രുവരി 15-ന് കൊളംബോയിലെ പ്രേമദാസ സ്റ്റേഡിയത്തിലാണ് ഇന്ത്യ-പാകിസ്ഥാൻ പോരാട്ടം നിശ്ചയിച്ചിരിക്കുന്നത്. പാക് പ്രധാനമന്ത്രി ഷെഹ്ബാസ് ഷെരീഫുമായി മൊഹ്സിൻ നഖ്വി ഇന്ന് കൂടിക്കാഴ്ച നടത്തും. ഇതിന് ശേഷമായിരിക്കും ലോകം കാത്തിരിക്കുന്ന ക്രിക്കറ്റ് മത്സരത്തിന്റെ ഭാവി തീരുമാനിക്കപ്പെടുക. നിലവിൽ മത്സരം നടക്കാനുള്ള സാധ്യത 99 ശതമാനമാണെന്ന് പിസിബി വൃത്തങ്ങൾ സൂചന നൽകുന്നു.
