തൊടുപുഴ: കേരള കോണ്ഗ്രസ് ചെയര്മാനും മുന്മന്ത്രിയുമായ പി.ജെ. ജോസഫ് വീണ്ടും മല്സരത്തിനിറങ്ങിയാല് അതു ചരിത്രമാകും.
അങ്ങനെയെങ്കില് തൊടുപുഴ നിയോജക മണ്ഡലത്തില് നിന്നു 12-ാമത്തെ മല്സരത്തിനാകും അദ്ദേഹം രംഗത്തിറങ്ങുക. ഒരുമണ്ഡലത്തില് നിന്ന് ഇത്രയും തവണ മല്സരിച്ചുവിജയിച്ച നേതാക്കള് വിരളമാണ്.
1970ലാണ് തൊടുപുഴയില് നിന്നും നിയമസഭയിലേക്ക് കന്നിയങ്കത്തിനിറങ്ങി വിജയക്കൊടി പാറിച്ചത്. ഇതുവരെ 11 തവണ മല്സരിച്ചതില് 2001ല് മാത്രമാണ് പരാജയം രുചിച്ചത്.
അന്നു എല്ഡിഎഫ് പക്ഷത്തായിരുന്ന പി.ജെ. കോണ്ഗ്രസിലെ പി.ടി.തോമസിനോട് 6,125 വോട്ടുകള്ക്കാണ് പരാജയപ്പെട്ടത്.
ഇതൊഴിച്ചാല് മറ്റു തെരഞ്ഞെടുപ്പുകളില് തോല്വിയറിയാത്ത നേതാവായാണ് പി.ജെയെ ഇരുമുന്നണികളും കാണുന്നത്.
2016ലെ തെരഞ്ഞെടുപ്പില് സംസ്ഥാനത്തെ ഏറ്റവും വലിയ ഭൂരിപക്ഷവും ഇദ്ദേഹത്തിനായിരുന്നു. 45,823 വോട്ടുകള്ക്കാണ് അന്നുവിജയിച്ചത്.
മണ്ഡലത്തില് സജീവമായ ഇദ്ദേഹം ഇക്കുറി തൊടുപുഴയില്നിന്നു വീണ്ടും മല്സരിക്കുമോയെന്ന കാര്യത്തില് അന്തിമ തീരുമാനം ഇതുവരെയുമായിട്ടില്ല.
