മുഖ്യമന്ത്രിയായി വി.ഡി സതീശനെ തിരഞ്ഞെടുത്ത എഐസിസി തീരുമാനത്തെ സ്വാഗതം ചെയ്ത് മുസ്ലിം ലീഗ്. കോൺഗ്രസ് ഹൈക്കമാൻഡിന്റെ തീരുമാനത്തെ പാർട്ടി പൂർണ്ണമായും പിന്തുണയ്ക്കുന്നുവെന്ന് ലീഗ് സംസ്ഥാന പ്രസിഡന്റ് പാണക്കാട് സാദിഖലി ശിഹാബ് തങ്ങൾ മലപ്പുറത്ത് മാധ്യമപ്രവർത്തകരോട് പറഞ്ഞു. തീരുമാനത്തിൽ വളരെയധികം സന്തോഷമുണ്ടെന്നും നല്ലൊരു ഭരണം കാഴ്ചവയ്ക്കാൻ സതീശന് കഴിയട്ടെയെന്നും അദ്ദേഹം പറഞ്ഞു.
കേരളത്തിലെ ജനങ്ങൾ ആഗ്രഹിച്ച കാര്യമാണ് ഹൈക്കമാൻഡ് പ്രഖ്യാപിച്ചിരിക്കുന്നത്. നിയമസഭാ തിരഞ്ഞെടുപ്പ് വേളയിൽ സതീശൻ മുന്നോട്ടുവെച്ച ടീം യുഡിഎഫ് എന്ന ആശയത്തിന്റെ ഭാഗമായി തന്നെ ലീഗ് പ്രവർത്തിക്കുമെന്നും ഇതൊരു ടീം യു.ഡി.എഫ് സർക്കാരായിരിക്കുമെന്നും അദ്ദേഹം കൂട്ടിച്ചേർത്തു. മുഖ്യമന്ത്രിയെ തിരഞ്ഞെടുക്കുന്നതിൽ ജനാധിപത്യപരമായ നടപടിക്രമങ്ങൾ പാലിച്ചതിൽ ദേശീയ കോൺഗ്രസ് നേതൃത്വത്തെ തങ്ങൾ പ്രശംസിച്ചു.
