ഒന്നാം നിഖ്യാ കൗൺസിലിന്റെ 1700-ാം വാർഷികം ആഘോഷിച്ച വേളയിൽ, ഭിന്നതകൾ മറികടക്കാൻ ക്രൈസ്തവരോട് ആഹ്വാനം ചെയ്ത് ലെയോ പതിനാലാമൻ മാർപാപ്പ. ഇസ്താംബൂളിനു തെക്കുകിഴക്കായി ഇസ്നിക് തടാകത്തിന്റെ തീരത്തുള്ള പുരാതന സെന്റ് നിയോഫൈറ്റോസ് ബസിലിക്കയിലെ ആർക്കിയോളജിക്കൽ സൈറ്റിൽ നടന്ന ഒരു എക്യുമെനിക്കൽ പ്രാർഥനാശുശ്രൂഷയിലാണ് പാപ്പ ഇപ്രകാരം പറഞ്ഞത്.
എക്യുമെനിക്കൽ, മതാന്തരബന്ധങ്ങളിൽ വളരെയധികം ശ്രദ്ധ കേന്ദ്രീകരിച്ച, തുർക്കിയിലേക്കുള്ള ലെയോ പാപ്പയുടെ അപ്പസ്തോലിക സന്ദർശനത്തിന്റെ ഏറ്റവും പ്രതീകാത്മക നിമിഷങ്ങളിലൊന്നായിരുന്നു ഈ ഒത്തുചേരൽ. ലെയോ മാർപാപ്പയെയും ബർത്തലോമിയോ ഒന്നാമൻ പാത്രിയാർക്കീസിനെയും രണ്ട് മുതിർന്ന ഓർത്തഡോക്സ് ബിഷപ്പുമാർ സ്വാഗതം ചെയ്തു. രണ്ടു നേതാക്കളും ക്രിസ്തുവിന്റെയും കൗൺസിലിന്റെയും പ്രതിരൂപങ്ങൾക്കു മുൻപിൽ നിന്നുകൊണ്ട് ഒരുമിച്ച് മെഴുകുതിരികൾ കത്തിച്ചു.
