ഇന്ത്യൻ നാവികസേനയുടെ കരുത്തും പോരാട്ട ശേഷിയും വിളിച്ചോതുന്ന മെഗാ ഓപ്പറേഷണൽ പ്രകടനം ഇന്ന് (ബുധനാഴ്ച) നടക്കും. നാവികസേനാ ദിനാഘോഷങ്ങളുടെ ഭാഗമായാണ് ഈ പ്രദർശനം സംഘടിപ്പിക്കുന്നത്. തിരുവനന്തപുരത്തെ ശംഖുമുഖം കടൽത്തീരത്ത് നടക്കുന്ന പരിപാടിയിൽ രാഷ്ട്രപതി ദ്രൗപദി മുർമു മുഖ്യാതിഥിയായി പങ്കെടുക്കും.
ഇന്ത്യയുടെ തദ്ദേശീയ വിമാനവാഹിനിക്കപ്പലായ ഐ.എൻ.എസ്. വിക്രാന്ത് ഉൾപ്പെടെ 19 പ്രധാന യുദ്ധക്കപ്പലുകൾ, ഒരു അന്തർവാഹിനി, നാല് അതിവേഗ ബോട്ടുകൾ, 32 വിമാനങ്ങൾ (ഫൈറ്റർ ജെറ്റുകൾ, നിരീക്ഷണ വിമാനങ്ങൾ, ഹെലികോപ്റ്ററുകൾ) എന്നിവ പ്രദർശനത്തിന്റെ ഭാഗമാവുമെന്ന് ഒരു ഉന്നത നാവിക ഉദ്യോഗസ്ഥൻ അറിയിച്ചു.
നാവികസേനയുടെ വിവിധ പ്രവർത്തനങ്ങൾ, സാങ്കേതിക മികവ്, പ്രവർത്തന സജ്ജത, രാജ്യത്തിന്റെ വളരുന്ന സമുദ്രശക്തി, സ്വാശ്രയത്വം എന്നിവ പൗരന്മാർക്ക് നേരിട്ട് കാണാനും അതുവഴി സമുദ്ര അവബോധം വർദ്ധിപ്പിക്കാനും ഈ മെഗാ ഇവൻ്റ് അവസരം നൽകുമെന്ന് അധികൃതർ പറഞ്ഞു.
