കഴിഞ്ഞ 15 വര്‍ഷമായി ചെങ്ങന്നൂർ തിരുവന്‍വണ്ടൂര്‍ പഞ്ചായത്തില്‍ ബിജെപി അംഗമായിരുന്ന മനു തെക്കേടത്തിനെ ബിജെപിയുടെ പ്രാഥമിക അംഗത്വത്തില്‍ നിന്നും സസ്‌പെന്‍ഡ് ചെയ്തു. പഞ്ചായത്ത് ഒന്‍പതാം വാര്‍ഡായ കല്ലിശ്ശേരിയില്‍ ബിജെപി സ്ഥാനാര്‍ത്ഥിയ്‌ക്കെതിരെ സ്വതന്ത്ര്യ സ്ഥാനാര്‍ത്ഥിയായി മത്സരിക്കാന്‍ തീരുമാനിച്ചതോടെയാണ് സംസ്ഥാന പ്രസിഡന്റ് സസ്‌പെന്‍ഡു ചെയ്തതായി ജില്ല പ്രസിഡന്റ് സന്ദീപ് വചസ്പതി അറിയിച്ചത്.
മൂന്നു തവണ പഞ്ചായത്തംഗമായ മനു കഴിഞ്ഞ ഭരണ സമിതി സ്ഥിരം സമിതി അധ്യക്ഷനായിരുന്നു. കഴിഞ്ഞ തവണ മനു വിജയിച്ച ഏഴാം വാര്‍ഡ് വനിത സംവരണമായതിനെ തുടര്‍ന്ന് ബിജെപി നേതൃത്വം മനുവിന്സീ റ്റ് നിഷേധിച്ചിരുന്നു. ഇതിനെ തുടര്‍ന്നാണ് മനു ഒന്‍പതാം വാര്‍ഡില്‍ പത്രിക നല്‍കിയത്. ഏഴാം വാര്‍ഡില്‍ മനുവിന്റെ അമ്മ രത്‌നകുമാരി സ്വതന്ത്ര സ്ഥാനാര്‍ത്ഥിയായി മത്സരിക്കുന്നുണ്ട്.
