മക്കയിലെ മസ്ജിദുൽ ഹറമിലും മദീനയിലെ മസ്ജിദുന്നബവിയിലുമെത്തുന്ന വിശ്വാസികൾക്കായി ഇരു ഹറം കാര്യങ്ങളുടെ ജനറൽ അതോറിറ്റി പുതിയ ഡിജിറ്റൽ ‘പ്രാർത്ഥനാ ഗൈഡ്’ പുറത്തിറക്കി. തീർത്ഥാടകരുടെ ആത്മീയ യാത്ര സുഗമമാക്കുന്നതിനും ആരാധനാകർമങ്ങൾ കൂടുതൽ കാര്യക്ഷമമായി നിർവഹിക്കുന്നതിനും സഹായിക്കുന്ന വിധത്തിലാണ് ഈ സമഗ്ര ഡിജിറ്റൽ സംവിധാനം രൂപകൽപ്പന ചെയ്തിരിക്കുന്നത്. ലോകത്തിന്റെ വിവിധ ഭാഗങ്ങളിൽ നിന്നുള്ള ദശലക്ഷക്കണക്കിന് വിശ്വാസികൾക്ക് ഏറെ പ്രയോജനകരമാകുന്ന രീതിയിൽ ഏഴ് ഭാഷകളിലാണ് ഈ സേവനം ലഭ്യമാക്കിയിരിക്കുന്നത്.
ഇരു ഹറം പള്ളികളിലെയും പ്രാർത്ഥനാ മേഖലകളിൽ സ്ഥാപിച്ചിട്ടുള്ള പ്രത്യേക ക്യുആർ (QR) കോഡുകൾ സ്കാൻ ചെയ്തുകൊണ്ട് വിശ്വാസികൾക്ക് ഈ സംവേദനാത്മക വെബ്സൈറ്റ് നേരിട്ട് ആക്സസ് ചെയ്യാം. അറബിക്, ഇംഗ്ലീഷ്, ഫ്രഞ്ച്, ഇന്തോനേഷ്യൻ, മലായ്, ടർക്കിഷ്, ഉറുദു എന്നീ ഭാഷകളിൽ സേവനം ലഭ്യമാണ്. കൂടാതെ musaliyaat.alharamain.gov.sa എന്ന വെബ് ലിങ്ക് വഴിയും തീർത്ഥാടകർക്ക് ഈ പ്ലാറ്റ്ഫോമിലെ വിവരങ്ങൾ ഉപയോഗിക്കാവുന്നതാണ്.
വിശ്വാസികൾക്ക് ആവശ്യമായ ഖുർആൻ വചനങ്ങൾ, പ്രവാചക വചനങ്ങൾ, വിവിധ പ്രാർത്ഥനകൾ, ഇസ്ലാമിക വിഷയങ്ങളിലുള്ള പഠനങ്ങൾ എന്നിവ ഇതിൽ ഉൾപ്പെടുത്തിയിട്ടുണ്ട്. ആരാധനാ കർമങ്ങൾ പിഴവുകളില്ലാതെ നിർവഹിക്കാൻ സഹായിക്കുന്ന ലളിതമായ മാർഗനിർദേശ വീഡിയോകളും ഈ പ്ലാറ്റ്ഫോമിന്റെ സവിശേഷതയാണ്. ആധുനിക സാങ്കേതികവിദ്യ പ്രയോജനപ്പെടുത്തി തീർത്ഥാടകർക്ക് ലോകോത്തര നിലവാരത്തിലുള്ള സേവനം ഉറപ്പാക്കുകയാണ് ഇതിലൂടെ ലക്ഷ്യമിടുന്നതെന്ന് അതോറിറ്റി വ്യക്തമാക്കി.
