കോട്ടയം: പൊൻകുന്നത്ത് സ്വകാര്യബസ് സ്റ്റാൻഡിലൂടെ നടന്നു പോയ സ്ത്രീയുടെ കാലിലൂടെ കെഎസ്ആർടിസി ബസ് കയറിയിറങ്ങി. ചിറക്കടവ് ഗ്രാമദീപം ഐക്കരപറമ്പ് കെ.സി. ബാബുവിന്റെ ഭാര്യ വിജയമ്മയുടെ കാൽ പാദത്തിലൂടെയാണ് ബസിന്റെ മുൻവശത്തെ ടയർ കയറിയിറങ്ങിയത്.
രാവിലെ 8.35 ഓടെയായിരുന്നു അപകടം. ഗുരുതരമായി പരിക്കേറ്റ ഇവരെ ആദ്യം കാഞ്ഞിരപ്പള്ളി താലൂക്ക് ആശുപത്രിയിലും പിന്നീട് കോട്ടയം മെഡിക്കൽ കോളജിലും പ്രവേശിപ്പിച്ചു.
കോട്ടയത്തുനിന്നു കുമളിക്കു പോയ ബസാണ് അപകടത്തിൽപെട്ടത്. പൊൻകുന്നം പോലീസ് സ്ഥലത്തെത്തി മേൽനടപടികൾ സ്വീകരിച്ചു.
