മുൻ സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്റെ മരണശേഷം കുടുംബത്തെ പാർട്ടി നേതൃത്വം പൂർണ്ണമായും അവഗണിച്ചുവെന്ന ഗുരുതര ആരോപണവുമായി ഭാര്യ വിനോദിനി കോടിയേരി. സിപിഎമ്മിന്റെ ഉന്നത നേതൃത്വത്തിൽ നിന്നും വളരെ ക്രൂരമായ അവഗണനയാണ് തങ്ങൾക്ക് നേരിടേണ്ടി വന്നതെന്ന് അവർ ആരോപിച്ചു. ഡിസി ബുക്സ് പ്രസിദ്ധീകരിക്കുന്ന ‘പച്ചക്കുതിര’ എന്ന മാസികയ്ക്ക് നൽകിയ പ്രത്യേക അഭിമുഖത്തിലാണ് വിനോദിനി കോടിയേരി പാർട്ടി നേതൃത്വത്തിനെതിരെ തുറന്നടിച്ചത്.
സംസ്ഥാനത്ത് പ്രധാന പദവി വഹിക്കുന്ന ഒരു പോളിറ്റ് ബ്യൂറോ അംഗം ആവശ്യത്തിന് വിളിച്ചാൽ ഫോണെടുക്കാറില്ലെന്നാണ് വിനോദിനി കോടിയേരി ഉന്നയിക്കുന്ന പ്രധാന ആരോപണം. നിലവിലെ സിപിഎം സംസ്ഥാന സെക്രട്ടറി എം വി ഗോവിന്ദന് നേരെയും ശക്തമായ പരോക്ഷ വിമർശനങ്ങൾ അഭിമുഖത്തിൽ ഉന്നയിച്ചിട്ടുണ്ട്. കോടിയേരി ബാലകൃഷ്ണൻ മരിച്ചതിന് ശേഷം കഴിഞ്ഞ നാല് വർഷത്തിനിടെ ഒരിക്കൽ പോലും നേതാക്കൾ കുടുംബത്തിന്റെ സൗഖ്യം അന്വേഷിക്കുകയോ തിരിഞ്ഞുനോക്കുകയോ ചെയ്തിട്ടില്ലെന്നും അവർ പറഞ്ഞു.
പാർട്ടിക്കുവേണ്ടി ജീവിതം സമർപ്പിച്ച ഒരു നേതാവിന്റെ കുടുംബത്തോട് നേതൃത്വം കാണിക്കുന്ന അനീതിയാണ് ഇതെന്നാണ് വിനോദിനി വ്യക്തമാക്കുന്നത്. ‘പച്ചക്കുതിര’ മാസികയിലൂടെ ഈ വിവരങ്ങൾ പുറത്തുവന്നതോടെ രാഷ്ട്രീയ കേരളത്തിൽ ഇത് വലിയ ചർച്ചയായി മാറിയിട്ടുണ്ട്. പാർട്ടിയിലെ ഉന്നത നേതാക്കൾക്കെതിരെ കോടിയേരിയുടെ ഭാര്യ തന്നെ നേരിട്ട് ആരോപണങ്ങൾ ഉന്നയിച്ചത് വരുംദിവസങ്ങളിൽ വലിയ രാഷ്ട്രീയ വിവാദങ്ങൾക്ക് വഴിയൊരുക്കുമെന്നാണ് സൂചന.
