വാഷിംഗ്ടൺ പോസ്റ്റ് പത്രപ്രവർത്തകൻ ജമാൽ ഖഷോഗ്ഗിയുടെ കൊലപാതകത്തെക്കുറിച്ച് സൗദി കിരീടാവകാശി മുഹമ്മദ് ബിൻ സൽമാന് (എംബിഎസ്) യാതൊരു അറിവും ഇല്ലായിരുന്നുവെന്ന് യുഎസ് പ്രസിഡൻ്റ് ഡൊണാൾഡ് ട്രംപ്. യുഎസിൻ്റെ സ്വന്തം ഇൻ്റലിജൻസ് റിപ്പോർട്ടുകൾ പോലും തള്ളിക്കളഞ്ഞുകൊണ്ടാണ് ഓവൽ ഓഫീസിലെ കൂടിക്കാഴ്ചയ്ക്കിടെ സൗദി രാജകുമാരന് അനുകൂലമായി ട്രംപ് സംസാരിച്ചത്.
2018-ലെ കൊലപാതകത്തിന് മുഹമ്മദ് ബിൻ സൽമാൻ അനുമതി നൽകിയെന്ന് യുഎസ് ഏജൻസികൾ കണ്ടെത്തിയ സാഹചര്യത്തിൽ, എന്തുകൊണ്ടാണ് അമേരിക്കക്കാർ കിരീടാവകാശിയെ വിശ്വസിക്കേണ്ടതെന്ന് എബിസി ന്യൂസ് റിപ്പോർട്ടർ ചോദിച്ചപ്പോഴായിരുന്നു ട്രംപിൻ്റെ പ്രതികരണം.
ട്രംപ് ഉടൻ തന്നെ റിപ്പോർട്ടറെ തടസ്സപ്പെടുത്തി. നിങ്ങൾ വ്യാജ വാർത്തയാണ് എന്ന് പറഞ്ഞ ശേഷം അദ്ദേഹം തൻ്റെ അതിഥിയെ സംരക്ഷിക്കുന്നതിലേക്ക് തിരിഞ്ഞു.
