എഐ ചിത്രം പ്രചരിക്കുന്നതിൽ ആശങ്ക പ്രകടിപ്പിച്ച് നടി കീർത്തി സുരേഷ്. തൻ്റെ മോർഫ് ചെയ്ത ചിത്രങ്ങൾ സമൂഹമാധ്യമങ്ങളിൽ പ്രചരിക്കുന്നത് കണ്ടെത്തിയതിനെ തുടർന്ന് പ്രതികരിക്കുകയായിരുന്നു അവർ. എഐ സാങ്കേതികവിദ്യ ഉപയോഗിച്ച് തൻ്റെ ഫോട്ടോകൾ മാറ്റം വരുത്തുന്നത് കാണുന്നതിൻ്റെ വൈകാരിക ആഘാതത്തെക്കുറിച്ച് നടി വിവരിച്ചു. ഇത് താരങ്ങൾക്കും പൊതുജനങ്ങൾക്കും ഒരുപോലെ വർധിച്ചുവരുന്ന ഒരു പ്രശ്നമായി മാറിയിരിക്കുന്നുവെന്ന് അവർ പറഞ്ഞു.
എഐ ഒരു വലിയ പ്രശ്നമായി മാറിയിരിക്കുന്നുവെന്ന് അവർ പറഞ്ഞു. അതൊരു അനുഗ്രഹവും ശാപവുമാണ്. മനുഷ്യർ സാങ്കേതികവിദ്യ കണ്ടുപിടിച്ചു, പക്ഷേ നമുക്ക് അതിൻ്റെ നിയന്ത്രണം നഷ്ടപ്പെടുന്നുവെന്നും കീർത്തി അഭിപ്രായപ്പെട്ടു.
“സമൂഹമാധ്യമങ്ങളിൽ, അനുചിതമായ വസ്ത്രം ധരിച്ചുള്ള എൻ്റെ ചിത്രം കാണുമ്പോൾ ഞാൻ ഞെട്ടിപ്പോകാറുണ്ട്. അത് യഥാർത്ഥമാണെന്ന് കാണുന്ന ആർക്കും തോന്നും. ഞാനാണോ അങ്ങനെയൊരു വസ്ത്രം ധരിച്ചതെന്ന് അത്ഭുതപ്പെട്ടുപോവും.
അടുത്തിടെ, ഒരു സിനിമയുടെ പൂജയ്ക്ക് ഞാൻ ധരിച്ച വസ്ത്രം മറ്റൊരു ആംഗിളിൽ നിന്ന് മോശമായ രീതിയിൽ മാറ്റം വരുത്തിയിരുന്നു. ഒരു നിമിഷം ഞാൻ സംശയിച്ചുപോയി, പിന്നീടാണ് അത്തരമൊരു രീതിയിൽ ഞാൻ പോസ് ചെയ്തിട്ടില്ലെന്ന് മനസ്സിലായത്. ഇത് തീർച്ചയായും അസ്വസ്ഥതയുണ്ടാക്കുന്നതാണ്..” കീർത്തി പറഞ്ഞു.
