മലയാള സിനിമ-ടെലിവിഷൻ രംഗത്തെ ശ്രദ്ധേയനായ നടൻ കമൽ റോയ് അന്തരിച്ചു. പ്രശസ്ത നടിമാരായ ഉർവശി, കൽപ്പന, കലാരഞ്ജിനി എന്നിവരുടെ സഹോദരനാണ് കമൽ റോയ്. ചവറ വി.പി. നായരുടെയും വിജയലക്ഷ്മിയുടെയും മകനായ കമൽ റോയ്, പരേതനായ നടൻ നന്ദുവിന്റെ സഹോദരനുമാണ്.
‘സായൂജ്യം’, ‘കോളിളക്കം’, ‘മഞ്ഞ്’, ‘കിങ്ങിണി’, ‘കല്യാണസൗഗന്ധികം’, ‘വാചാലം’, ‘ശോഭനം’, ‘ദ് കിങ് മേക്കർ’, ‘ലീഡർ’ തുടങ്ങിയ നിരവധി ചിത്രങ്ങളിൽ അദ്ദേഹം അഭിനയിച്ചു. ‘യുവജനോത്സവം’ എന്ന സിനിമയിലെ ‘ഇന്നും എന്റെ കണ്ണുനീരിൽ’ എന്ന ഗാനരംഗത്തിലെ പ്രകടനം ശ്രദ്ധേയമായിരുന്നു. വിനയൻ സംവിധാനം ചെയ്ത ‘കല്യാണസൗഗന്ധികം’ എന്ന ചിത്രത്തിലെ വില്ലൻ വേഷം കമൽ റോയിയുടെ അഭിനയജീവിതത്തിലെ പ്രധാന മൈൽസ്റ്റോണായി.ടെലിവിഷൻ രംഗത്തും സാന്നിധ്യം അറിയിച്ച കമൽ റോയ്, നടി വിനയ പ്രസാദ് അവതരിപ്പിച്ച ശാരദ എന്ന പരമ്പരയിൽ ശ്രദ്ധേയമായ കഥാപാത്രമായി എത്തി.
സംവിധായകൻ വിനയൻ കമൽ റോയിയെ അനുസ്മരിച്ചു. ‘നടൻ കമൽ റോയ് അന്തരിച്ചു. ആദരാഞ്ജലികൾ. കല്യാണ സൗഗന്ധികം എന്ന എന്റെ സിനിമയിൽ ദിലീപിന്റെ വില്ലനായിട്ട് അഭിനയിച്ചിരുന്നു. നടി ഉർവശിയുടെയും കൽപ്പനയുടെയും കലാരഞ്ജിനിയുടെയും സഹോദരനാണ് കമൽ. സുകുമാരിച്ചേച്ചി ആയിരുന്നു അന്ന് കമലിനെ കുറിച്ച് എന്നോടു പറഞ്ഞതെന്ന കാര്യം ഓർക്കുന്നു.’ വിനയൻ എഴുതി.
