ലൈംഗിക ആരോപണം നേരിടുന്ന രാഹുൽ മാങ്കൂട്ടത്തിലിനെ പിന്തുണച്ച കെ. സുധാകരനെ പരോക്ഷമായി തള്ളിപ്പറഞ്ഞ് കെ. മുരളീധരൻ. രാഹുൽ മാങ്കൂട്ടത്തിൽ നിലവിൽ സസ്‌പെൻഷനിലായതിനാൽ, അദ്ദേഹത്തിന് പാർട്ടി നേതാക്കളോടൊപ്പം വേദി പങ്കിടാനോ പാർട്ടി നടപടിക്രമങ്ങളിൽ പങ്കെടുക്കാനോ അവകാശമില്ലെന്ന് കെ. മുരളീധരൻ വ്യക്തമാക്കി. രാഹുലിനെതിരായ ആരോപണങ്ങളിൽ നിലവിൽ അന്വേഷണം നടക്കുകയാണ്. അന്വേഷണം പൂർത്തിയാക്കി റിപ്പോർട്ട് ലഭിച്ചശേഷം പാർട്ടി നടപടിയെടുക്കുമെന്നും അദ്ദേഹം കൂട്ടിച്ചേർത്തു.
സർക്കാർ അന്വേഷണം അനിശ്ചിതമായി നീട്ടിക്കൊണ്ടുപോകുന്നത് ശരിയല്ലെന്ന് മുരളീധരൻ അഭിപ്രായപ്പെട്ടു. അന്വേഷണം നീണ്ടുപോകുകയാണെങ്കിൽ, നിശ്ചിത സമയപരിധിക്കുള്ളിൽ അന്വേഷണം പൂർത്തിയാക്കണമെന്ന് ആവശ്യപ്പെട്ട് രാഹുൽ മാങ്കൂട്ടത്തിലിന് കോടതിയെ സമീപിക്കാവുന്നതാണ്. ജനപ്രതിനിധി എന്ന നിലയിൽ, ഈ ‘പുകമറ’ കാരണം തന്റെ പ്രവർത്തനങ്ങൾക്ക് ബുദ്ധിമുട്ടുണ്ടെന്നും, അതിനാൽ നിരപരാധിത്വം തെളിയിക്കാൻ എത്രയും പെട്ടെന്ന് അന്വേഷണം പൂർത്തിയാക്കാൻ നിർദ്ദേശം നൽകണമെന്ന് ആവശ്യപ്പെട്ട് കോടതിയെ സമീപിക്കാൻ രാഹുലിന് കഴിയുമെന്നും അദ്ദേഹം പറഞ്ഞു. ഇതെല്ലാം നിയമത്തിന്റെ വഴിക്ക് നടക്കട്ടെ. അതേസമയം, പാർട്ടിയെ സംബന്ധിച്ചിടത്തോളം രാഹുൽ ഇപ്പോൾ പാർട്ടിക്ക് പുറത്താണ് നിൽക്കുന്നത്. അതിനാൽ രാഹുലിനെതിരെ കൂടുതൽ നടപടി സ്വീകരിക്കേണ്ട സാഹചര്യം നിലവിലില്ലെന്ന് മുരളീധരൻ വ്യക്തമാക്കി.
എന്നാൽ, സ്ഥാനാർത്ഥികൾക്ക് വേണ്ടി വോട്ട് പിടിക്കാൻ ആർക്കും അവകാശമുണ്ട്. തദ്ദേശ തിരഞ്ഞെടുപ്പുകളിൽ വ്യക്തിപരമായ ബന്ധമുള്ള നിരവധി പേർ വോട്ട് തേടി ഇറങ്ങാറുണ്ട്. മുൻ അസംബ്ലി തിരഞ്ഞെടുപ്പിൽ സഹായിച്ചവർ ഇപ്പോൾ ഇലക്ഷനിൽ മത്സരിക്കുമ്പോൾ, അവർക്ക് വേണ്ടി രാഹുൽ മാങ്കൂട്ടത്തിൽ വീടുകളിൽ പോയി പ്രചാരണം നടത്തുന്നതിൽ തെറ്റില്ലെന്നും, അത് പാർട്ടിപരമായ ഒരു കാര്യമല്ലെന്നും കെ. മുരളീധരൻ വിശദീകരിച്ചു.
കൂടാതെ, തെറ്റ് ആരു ചെയ്താലും ശിക്ഷിക്കപ്പെടണം എന്ന നിലപാടാണ് തനിക്കുള്ളതെന്നും അദ്ദേഹം പറഞ്ഞു. പെൺകുട്ടി ധൈര്യമായി പരാതി എഴുതിക്കൊടുക്കണം. സമൂഹത്തിന്റെ എല്ലാ സംരക്ഷണവും ആ കുട്ടിക്ക് ഉണ്ടാകും. ആരാണെങ്കിലും പുകമറയിൽ നിർത്തുന്നത് ശരിയല്ല. ആളെ പുറത്തുകാണിക്കാതെ ആരോപണങ്ങൾ മാത്രം ഉന്നയിക്കുന്നത് നല്ല രീതിയല്ലെന്നും, ധൈര്യമായി പരാതിയുമായി മുന്നോട്ട് പോയാൽ സമൂഹം എല്ലാ പിന്തുണയും നൽകുമെന്നും കെ. മുരളീധരൻ കൂട്ടിച്ചേർത്തു.
