പശ്ചിമേഷ്യയിൽ ആഗോള എണ്ണ വിതരണത്തെ ബാധിച്ച ഹോർമുസ് കടലിടുക്കിലെ പ്രതിസന്ധിക്ക് നേരിയ അയവ് വരുത്തിക്കൊണ്ട് ഇറാൻ പുതിയ പ്രഖ്യാപനം നടത്തി. തങ്ങളോട് ശത്രുത പുലർത്താത്ത രാജ്യങ്ങളുടെ കപ്പലുകൾക്ക് ഹോർമുസ് കടലിടുക്കിലൂടെ സഞ്ചരിക്കാമെന്ന് ഇറാൻ ഐക്യരാഷ്ട്ര സഭയെ അറിയിച്ചു. എന്നാൽ അമേരിക്ക, ഇസ്രായേൽ എന്നീ രാജ്യങ്ങളുടെയോ അവരെ പിന്തുണയ്ക്കുന്നവരുടെയോ കപ്പലുകൾക്ക് ഈ പാതയിലൂടെ പ്രവേശനം അനുവദിക്കില്ലെന്ന് ഇറാൻ വ്യക്തമാക്കി.
യുഎൻ സുരക്ഷാ കൗൺസിലിനും ഇന്റർനാഷണൽ മാരിടൈം ഓർഗനൈസേഷനും (IMO) നൽകിയ കത്തിലാണ് ഇറാൻ തങ്ങളുടെ നിലപാട് വ്യക്തമാക്കിയത്. ഇറാന്റെ സുരക്ഷാ നിബന്ധനകൾ പാലിക്കുകയും മുൻകൂട്ടി അനുമതി വാങ്ങുകയും ചെയ്യുന്ന കപ്പലുകൾക്ക് സുരക്ഷിതമായ യാത്ര ഉറപ്പാക്കും.
എന്നാൽ ഇറാനെതിരായ സൈനിക നടപടികളിൽ പങ്കാളികളാകുന്ന കപ്പലുകൾക്ക് ഈ ആനുകൂല്യം ലഭിക്കില്ല. ശത്രുരാജ്യങ്ങളുടെ കപ്പലുകളെ പ്രതിരോധിക്കാൻ ആവശ്യമായ മുൻകരുതലുകൾ സ്വീകരിച്ചിട്ടുണ്ടെന്നും ഇറാൻ വിദേശകാര്യ മന്ത്രാലയം അയച്ച കത്തിൽ പറയുന്നു.
ലോകത്തെ എണ്ണ, പ്രകൃതിവാതക വിതരണത്തിന്റെ അഞ്ചിലൊന്ന് ഭാഗവും കടന്നുപോകുന്ന തന്ത്രപ്രധാനമായ പാതയാണ് ഹോർമുസ് കടലിടുക്ക്. അമേരിക്കയും ഇസ്രായേലും ഇറാനും തമ്മിലുള്ള യുദ്ധം രൂക്ഷമായതോടെ കഴിഞ്ഞ ഏതാനും ആഴ്ചകളായി ഈ പാതയിലൂടെയുള്ള ഗതാഗതം പൂർണ്ണമായും തടസ്സപ്പെട്ടിരുന്നു. ഇത് ആഗോള വിപണിയിൽ ഇന്ധനക്ഷാമത്തിനും വിലക്കയറ്റത്തിനും കാരണമായി. ഈ സാഹചര്യത്തിലാണ് കർശനമായ ഉപാധികളോടെ പാത ഭാഗികമായി തുറന്നുനൽകാൻ ഇറാൻ തയ്യാറായത്.
ഇറാന്റെ ഈ നീക്കം ആഗോള എണ്ണ വിപണിയിൽ നേരിയ ആശ്വാസം നൽകുമെങ്കിലും അമേരിക്കയെയും ഇസ്രായേലിനെയും പൂർണ്ണമായും ഒഴിവാക്കിയത് സംഘർഷം തുടരാൻ കാരണമായേക്കുമെന്ന് രാഷ്ട്രീയ നിരീക്ഷകർ കരുതുന്നു. യുഎൻ സെക്രട്ടറി ജനറൽ അന്റോണിയോ ഗുട്ടെറസിനും അയച്ച കത്തിന്റെ പകർപ്പ് ഇന്റർനാഷണൽ മാരിടൈം ഓർഗനൈസേഷനിലെ അംഗരാജ്യങ്ങൾക്കിടയിൽ വിതരണം ചെയ്തിട്ടുണ്ട്.
ഹോർമുസ് കടലിടുക്കിലെ പുതിയ നിയന്ത്രണങ്ങൾ ഇന്ത്യയുൾപ്പെടെയുള്ള രാജ്യങ്ങളിലേക്കുള്ള എണ്ണ വിതരണത്തെ എങ്ങനെ ബാധിക്കുമെന്ന് വരും ദിവസങ്ങളിൽ വ്യക്തമാകും.
