ഇന്ത്യൻ ബാഡ്മിന്റണിന്റെ വിപ്ലവനായികയും മുൻ ലോക ഒന്നാം നമ്പർ താരവുമായ സൈന നെഹ്വാൾ ബാഡ്മിന്റണിൽ നിന്ന് വിരമിക്കൽ സ്ഥിരീകരിച്ചു. തന്റെ ശരീരം ഇനി കായിക രംഗത്തെ കടുത്ത സമ്മർദ്ദങ്ങൾ താങ്ങില്ലെന്ന് വ്യക്തമാക്കിയാണ് താരം റാക്കറ്റ് താഴെ വെക്കുന്നത്. കഴിഞ്ഞ രണ്ട് വർഷമായി മത്സരരംഗത്ത് നിന്ന് വിട്ടുനിൽക്കുകയായിരുന്നു സൈന. 2023-ലെ സിംഗപ്പൂർ ഓപ്പണിലാണ് താരം അവസാനമായി മത്സരിച്ചത്.
തന്റെ കരിയർ അവസാനിപ്പിക്കാൻ ഒരു ഔദ്യോഗിക പ്രഖ്യാപനത്തിന്റെ ആവശ്യമില്ലെന്ന് സൈന വ്യക്തമാക്കി. ഒരു പോഡ്കാസ്റ്റിൽ സംസാരിക്കവെയാണ് താരം വിരമിക്കൽ തീരുമാനം പരസ്യമാക്കിയത്.
“ഞാൻ രണ്ട് വർഷം മുമ്പ് തന്നെ കളി നിർത്തിയതാണ്. സ്വന്തം ഇഷ്ടപ്രകാരം കരിയർ തുടങ്ങുകയും അവസാനിപ്പിക്കുകയും ചെയ്യുക എന്നതായിരുന്നു എന്റെ രീതി. അതിനാൽ പ്രത്യേകിച്ച് ഒരു പ്രഖ്യാപനത്തിന്റെ ആവശ്യമില്ലെന്ന് കരുതി. ഇനി കളിക്കാൻ കഴിയില്ലെങ്കിൽ കരിയർ അവസാനിച്ചു എന്ന് തന്നെയാണല്ലോ അർത്ഥം,” സൈന പറഞ്ഞു.
