114 റഫേൽ യുദ്ധവിമാനങ്ങൾ വാങ്ങാനുള്ള സുപ്രധാന നിർദ്ദേശത്തിന് പ്രതിരോധ സംഭരണ കൗൺസിൽ (DAC) അനുമതി നൽകിയേക്കുമെന്ന് റിപ്പോർട്ടുകൾ. ഫ്രഞ്ച് പ്രസിഡന്റ് ഇമ്മാനുവൽ മാക്രോണിന്റെ ഈ മാസത്തെ സന്ദർശനത്തിന് മുന്നോടിയായാണ് ഈ തീരുമാനമെന്ന് പ്രതിരോധ വൃത്തങ്ങൾ ഇന്ത്യ ടുഡേ ടി.വിയോട് പറഞ്ഞു.
കേന്ദ്ര പ്രതിരോധ മന്ത്രി രാജ്നാഥ് സിംഗ് അധ്യക്ഷനായ ഡിഎസി ഉടൻ യോഗം ചേർന്ന് ഈ വൻകിട പദ്ധതിക്ക് ‘ആവശ്യകതയുടെ അംഗീകാരം’ (Acceptance of Necessity – AoN) നൽകുമെന്നാണ് കരുതപ്പെടുന്നത്. പ്രതിരോധ സെക്രട്ടറിയുടെ നേതൃത്വത്തിലുള്ള പ്രതിരോധ സംഭരണ ബോർഡ് കഴിഞ്ഞ മാസം റഫേൽ ഏറ്റെടുക്കൽ നിർദ്ദേശത്തിന് അംഗീകാരം നൽകിയിരുന്നു.
ഏകദേശം 3.25 ലക്ഷം കോടി രൂപ മൂല്യം വരുന്ന ഈ കരാർ ഇന്ത്യയുടെ ഏറ്റവും വലിയ യുദ്ധവിമാന പദ്ധതികളിൽ ഒന്നായിരിക്കും. നിലവിൽ ഇന്ത്യൻ വ്യോമസേന നേരിടുന്ന സ്ക്വാഡ്രണുകളുടെ കുറവ് പരിഹരിക്കാനാണ് ഈ നീക്കം. അനുവദനീയമായ 42 സ്ക്വാഡ്രണുകൾക്ക് പകരം വെറും 29 എണ്ണം മാത്രമാണ് ഇപ്പോൾ വ്യോമസേനയ്ക്കുള്ളത്. പടിഞ്ഞാറൻ, വടക്കൻ അതിർത്തികളിൽ ഭീഷണി വർദ്ധിക്കുന്ന സാഹചര്യത്തിൽ ഈ കരാർ ഏറെ നിർണ്ണായകമാണെന്ന് വിലയിരുത്തപ്പെടുന്നു.
ഇന്ത്യയിൽ നിർമാണം ലക്ഷ്യം
ആകെ 114 റഫേൽ വിമാനങ്ങളിൽ 18 എണ്ണം നേരിട്ട് ഫ്രാൻസിൽ നിന്ന് വാങ്ങും. ബാക്കിയുള്ളവ ഇന്ത്യയിൽ നിർമ്മിക്കുമെന്നാണ് കരുതപ്പെടുന്നത്. മൊത്തം വിമാനങ്ങളുടെ 80 ശതമാനത്തോളം ഇന്ത്യയിൽ നിർമ്മിക്കാനാണ് ലക്ഷ്യമിടുന്നത്.
‘മേക്ക് ഇൻ ഇന്ത്യ’ പദ്ധതിക്ക് കീഴിൽ 60 ശതമാനം തദ്ദേശീയ ഘടകങ്ങൾ ഉൾപ്പെടുത്താൻ സാധ്യതയുണ്ട്. നിർദ്ദിഷ്ട കരാർ പ്രകാരം 88 ഒറ്റ സീറ്റുള്ള വിമാനങ്ങളും 26 ഇരട്ട സീറ്റുള്ള വിമാനങ്ങളുമായിരിക്കും വ്യോമസേനയ്ക്ക് ലഭിക്കുക. വിമാനങ്ങൾ പ്രാദേശികമായി നിർമ്മിക്കുന്നതിനും അസംബിൾ ചെയ്യുന്നതിനും ഫ്രഞ്ച് കമ്പനിയായ Dassault ഏവിയേഷൻ ഇന്ത്യൻ സ്വകാര്യ കമ്പനികളുമായി സഹകരിച്ചേക്കും.
വ്യോമസേനയുടെ കരുത്ത് കൂട്ടും
റഫേൽ വിമാനങ്ങൾ ഇന്ത്യൻ വ്യോമസേനയുടെ കരുത്ത് ഇരട്ടിയാക്കുമെന്നാണ് വിലയിരുത്തൽ. മീറ്റിയോർ (Meteor) മിസൈൽ, സ്കാൽപ് (SCALP) ക്രൂയിസ് മിസൈൽ എന്നിവ വഹിക്കാനുള്ള ശേഷി റഫാലിന്റെ ആക്രമണ വീര്യം വർദ്ധിപ്പിക്കുന്നു.
പാകിസ്ഥാനും ചൈനയും തമ്മിലുള്ള സൈനിക ഏകോപനം വർദ്ധിച്ചുവരുന്നത് കണക്കിലെടുത്താണ് ഈ കരാർ വേഗത്തിലാക്കാൻ ഇന്ത്യ തീരുമാനിച്ചത്. ഡിഎസി അംഗീകാരം നൽകിക്കഴിഞ്ഞാൽ സാങ്കേതികവും വാണിജ്യപരവുമായ ചർച്ചകളിലേക്ക് കടക്കും.
