കഴിഞ്ഞ നവംബറിൽ ഹോങ്കോംഗിലുണ്ടായ ദശാബ്ദങ്ങളിലെ ഏറ്റവും വലിയ തീപിടുത്തത്തിൽ വീട് നഷ്ടപ്പെട്ട ആയിരക്കണക്കിന് ആളുകൾക്കായി സർക്കാർ ശനിയാഴ്ച പുനരധിവാസ പദ്ധതി പ്രഖ്യാപിച്ചു. ഇരകളുടെ ഉടമസ്ഥാവകാശം സർക്കാർ തിരികെ വാങ്ങാനാണ് നിർദ്ദേശിച്ചിരിക്കുന്നത്. 2025 നവംബർ 26-നുണ്ടായ ഈ തീപിടുത്തത്തിൽ 168 പേർക്കാണ് ജീവൻ നഷ്ടപ്പെട്ടിരുന്നത്.
വാങ് ഫുക് കോർട്ടിലെ ഏഴ് അപ്പാർട്ട്മെന്റ് കെട്ടിടങ്ങളിലായി പടർന്നുപിടിച്ച വൻ തീപിടുത്തത്തിന് ശേഷം മൂന്നു മാസമായി അനിശ്ചിതത്വത്തിൽ കഴിയുകയായിരുന്നു ഇവിടുത്തെ താമസക്കാർ. മിക്കവരും വിവിധ ജില്ലകളിലെ താൽക്കാലിക കേന്ദ്രങ്ങളിലാണ് ഇപ്പോൾ കഴിയുന്നത്. ഹ്രസ്വകാല താമസസൗകര്യം ഒരുക്കുന്നതിനായി സർക്കാർ വാടക ഗ്രാന്റും നൽകുന്നുണ്ട്.
ഏഴ് കെട്ടിടങ്ങളിലെയും ഉടമകൾക്ക് അവരുടെ ഉടമസ്ഥാവകാശം വിറ്റ് പണം വാങ്ങാമെന്നും അതുപയോഗിച്ച് അവർക്ക് ഇഷ്ടമുള്ളിടത്ത് താമസസൗകര്യം കണ്ടെത്താമെന്നും അധികൃതർ ശനിയാഴ്ച നടത്തിയ വാർത്താസമ്മേളനത്തിൽ അറിയിച്ചു. പണമായി വേണ്ടവർക്ക് നിശ്ചിത സർക്കാർ നയത്തിന് കീഴിൽ പകരം മറ്റൊരു അപ്പാർട്ട്മെന്റ് സ്വന്തമാക്കാനും അവസരമുണ്ടാകും.
അഫ്ഗാൻ അതിർത്തിയിലെ തീവ്രവാദ കേന്ദ്രങ്ങൾ ലക്ഷ്യമിട്ട് പാകിസ്ഥാൻ വ്യോമാക്രമണം നടത്തി
ഏകദേശം 1,700 യൂണിറ്റുകളുടെ അവകാശങ്ങൾ തിരികെ വാങ്ങുന്നതിന് ഏകദേശം 6.8 ബില്യൺ ഹോങ്കോംഗ് ഡോളർ (870 മില്യൺ യുഎസ് ഡോളർ) ചിലവാകുമെന്ന് സർക്കാർ കണക്കാക്കി, അതിൽ ഏകദേശം 4 ബില്യൺ ഹോങ്കോംഗ് ഡോളർ (512 മില്യൺ യുഎസ് ഡോളർ) പൊതു ഫണ്ടിൽ നിന്നും ബാക്കി തുക ദുരിതാശ്വാസ ഫണ്ടിൽ നിന്നും അനുവദിക്കും. ഇൻഷുറൻസ് തുക കൂടി ലഭിക്കുന്നതോടെ പൊതുഫണ്ടിന്റെ ബാധ്യത കുറയുമെന്നാണ് പ്രതീക്ഷ.
കെട്ടിടങ്ങൾ പൊളിച്ചുമാറ്റും
തീപിടിത്തമുണ്ടായ സ്ഥലത്തെ ഏഴ് കെട്ടിടങ്ങളും പൊളിച്ചുമാറ്റാനാണ് ഭരണകൂടം ആഗ്രഹിക്കുന്നതെന്ന് നഗരത്തിന്റെ ഡെപ്യൂട്ടി ഫിനാൻഷ്യൽ സെക്രട്ടറി മൈക്കൽ വോങ് പറഞ്ഞു. അവിടെ വീണ്ടും വീടുകൾ നിർമ്മിക്കില്ല. പകരം ഒരു പാർക്കോ കമ്മ്യൂണിറ്റി സെന്ററോ നിർമ്മിക്കാനാണ് പദ്ധതി. തകർന്ന കെട്ടിടങ്ങൾ നന്നാക്കുന്നത് പ്രായോഗികമല്ലെന്നും സർക്കാർ ഇടപെട്ടില്ലെങ്കിൽ ഉടമകൾക്ക് വിപണിയിൽ ആവശ്യക്കാരെ കണ്ടെത്താൻ കഴിയില്ലെന്നും അദ്ദേഹം കൂട്ടിച്ചേർത്തു.
മാർച്ചിൽ വീട്ടുടമസ്ഥരെ ബന്ധപ്പെടാൻ സർക്കാർ ലക്ഷ്യമിടുന്നുവെന്നും ഈ വർഷം മൂന്നാം പാദത്തിൽ ഉടമകൾക്ക് പണം നൽകുമെന്ന് പ്രതീക്ഷിക്കുന്നുണ്ടെന്നും അദ്ദേഹം പറഞ്ഞു, അതേസമയം അപ്പാർട്ട്മെന്റ് എക്സ്ചേഞ്ച് പ്രോഗ്രാം തിരഞ്ഞെടുക്കുന്നവർക്ക് സെപ്റ്റംബറിൽ പുതിയ വീടുകൾ തിരഞ്ഞെടുക്കാൻ തുടങ്ങാമെന്നും അദ്ദേഹം പറഞ്ഞു. താമസക്കാരുടെ താല്പര്യങ്ങൾ സർവേയിലൂടെ അറിഞ്ഞ ശേഷമാണ് ഈ പദ്ധതികൾ തയ്യാറാക്കിയത്.
