പാലക്കാട്: വോട്ടിന് പണം നല്കിയെന്ന ആരോപണത്തിൽ എൻഡിഎ നേതാക്കൾക്കെതിരെ പോലീസ് കേസെടുത്തു. കണ്ടാലറിയാവുന്ന എൻഡിഎ പ്രതിനിധിക്കെതിരെയാണ് പാലക്കാട് സൗത്ത് പോലീസ് കേസ് എടുത്തത്. ജനപ്രാതിനിധ്യ നിയമത്തിലെ വിവിധ വകുപ്പുകള് പ്രകാരമാണ് കേസ്.
വോട്ടറെ പണം നല്കി സ്വാധീനിക്കാന് ശ്രമിച്ചുവെന്നാണ് എഫ്ഐആറിൽ പറയുന്നത്. പാലക്കാട് മണ്ഡലത്തില് വോട്ടിന് വേണ്ടി ബിജെപി പണം വിതരണം ചെയ്തെന്ന് കോണ്ഗ്രസ് പ്രവര്ത്തകര് ആരോപിച്ചിരുന്നു. ഇതിന്റെ ദൃശ്യങ്ങളും കോണ്ഗ്രസ് പുറത്തുവിട്ടിരുന്നു.
കണ്ണാടി തരുവക്കുറിശി ഭാഗത്ത് എന്ഡിഎ സ്ഥാനാര്ഥി ശോഭാ സുരേന്ദ്രനൊപ്പം എത്തിയ പ്രവര്ത്തകരാണ് പണം വിതരണം ചെയ്തത്. തന്നെ വേട്ടയാടാനാണ് ശ്രമമെന്നും എല്ലാം മുൻകൂട്ടി തയാറാക്കിയ തിരക്കഥയാണെന്നും ശോഭാ സുരേന്ദ്രൻ പറഞ്ഞു. വീടുകളില് പ്രചാരണത്തിനു പോയപ്പോള് ഒരു കാര് തന്നെ പിന്തുടര്ന്നിരുന്നു.
കാര്യമന്വേഷിക്കാന് കാറിനടുത്തേക്കു ചെന്നപ്പോള് അതിലുണ്ടായിരുന്ന ചെറുപ്പക്കാരന് ലൈംഗികാധിക്ഷേപ ചേഷ്ട കാണിച്ചു. പണം നല്കി എന്നു പറയപ്പെടുന്ന സ്ത്രീയെ അറിയില്ല. തന്റെ കാറില് അവര് കയറിയിട്ടില്ലെന്നും ശോഭ വ്യക്തമാക്കി.
