അമേരിക്കൻ വിസ നടപടികളുടെ ഭാഗമായി സോഷ്യൽ മീഡിയ പരിശോധന കർശനമാക്കിയതോടെ എച്ച്-1ബി വിസ അഭിമുഖങ്ങൾ വൻതോതിൽ വൈകുന്നു. ഈ സാഹചര്യത്തിൽ നിലവിലുള്ള ജോലി നഷ്ടപ്പെടാതിരിക്കാൻ അതീവ ജാഗ്രത പാലിക്കണമെന്ന് ഇമിഗ്രേഷൻ വിദഗ്ധർ ഇന്ത്യൻ പ്രൊഫഷണലുകൾക്ക് മുന്നറിയിപ്പ് നൽകി. വിസ സ്റ്റാമ്പിംഗിനായി നാട്ടിലെത്തി കുടുങ്ങിപ്പോയ നൂറുകണക്കിന് ഇന്ത്യക്കാരുടെ ജോലിയും നിയമപരമായ പദവിയും ഇപ്പോൾ പ്രതിസന്ധിയിലാണ്.
വിസാ അപേക്ഷകരുടെയും അവരുടെ ആശ്രിതരുടെയും സോഷ്യൽ മീഡിയ അക്കൗണ്ടുകൾ പരിശോധിക്കാൻ യുഎസ് സ്റ്റേറ്റ് ഡിപ്പാർട്ട്മെന്റ് തീരുമാനിച്ചതാണ് ഈ പ്രതിസന്ധിക്ക് കാരണം. ഡിസംബർ മുതൽ ഏപ്രിൽ, മെയ് മാസങ്ങളിൽ നടക്കേണ്ടിയിരുന്ന പല അഭിമുഖങ്ങളും 2026 ഒക്ടോബർ മാസത്തേക്കാണ് മാറ്റിയിരിക്കുന്നത്.
