ഡിജിറ്റൽ ലോകത്ത് ചുവടുറപ്പിക്കാൻ ആഗ്രഹിക്കുന്നവർക്ക് സുവർണ്ണാവസരം. ആർട്ടിഫിഷ്യൽ ഇന്റലിജൻസ് (എ.ഐ) മേഖലയിൽ വിദഗ്ധ പരിശീലനം നൽകുന്നതിനായി ഗൂഗിളും യൂട്യൂബും ചേർന്ന് 15,000 സ്കോളർഷിപ്പുകൾ പ്രഖ്യാപിച്ചു. കേന്ദ്ര വാർത്താ വിതരണ മന്ത്രാലയത്തിന്റെയും ഇന്ത്യൻ ഇൻസ്റ്റിറ്റ്യൂട്ട് ഓഫ് ക്രിയേറ്റീവ് ടെക്നോളജീസിന്റെയും സഹകരണത്തോടെ നടപ്പിലാക്കുന്ന ഈ പദ്ധതിയിലൂടെ ആനിമേഷൻ, ഗെയിമിംഗ്, ഡിജിറ്റൽ സ്റ്റോറി ടെല്ലിങ് തുടങ്ങിയ മേഖലകളിൽ എ.ഐ പ്രായോഗികമായി എങ്ങനെ ഉപയോഗിക്കാം എന്നതിലാണേ് പരിശീലനം ശ്രദ്ധ കേന്ദ്രീകരിക്കുന്നത്.
ഇന്ത്യയുടെ ഡിജിറ്റൽ കണ്ടന്റ് മേഖലയെ ശക്തിപ്പെടുത്തുന്നതിന് സർഗാത്മക വിദ്യാഭ്യാസത്തിൽ എ.ഐ സംയോജിപ്പിക്കുന്നതിനുള്ള ഒരു ദേശീയ ശ്രമമാണിത്. മീഡിയ പ്രൊഡക്ഷൻ, ആനിമേഷൻ, വിഷ്വൽ ഇഫക്ട്സ്, കോമിക്സ് തുടങ്ങിയ മേഖലകളിൽ പ്രവർത്തിക്കുന്നവർക്കും ഈ മേഖലയിലേക്ക് കടന്നുവരാൻ ആഗ്രഹിക്കുന്നവർക്കുമാണ് ഇതിൽ മുൻഗണന നൽകുന്നത്.
