ലോകം നേരിടുന്ന വിവിധ യുദ്ധഭീഷണികൾക്കിടയിൽ സമാധാനം പുനഃസ്ഥാപിക്കുക എന്ന ലക്ഷ്യത്തോടെ ലെയോ പതിനാലാമൻ മാർപാപ്പയും ഫ്രഞ്ച് പ്രസിഡന്റ് ഇമ്മാനുവൽ മാക്രോണും തമ്മിൽ വത്തിക്കാനിൽ കൂടിക്കാഴ്ച നടത്തി. ഇറാൻ യുദ്ധം, മിഡിൽ ഈസ്റ്റിലെ നിലവിലെ സംഘർഷങ്ങൾ എന്നിവയെക്കുറിച്ച് ഇരുവരും വിശദമായി സംസാരിച്ചു. ചർച്ചകളിലൂടെയും നയതന്ത്ര നീക്കങ്ങളിലൂടെയും മാത്രമേ ഇത്തരം പ്രശ്നങ്ങൾക്ക് ശാശ്വത പരിഹാരം കാണാൻ സാധിക്കൂ എന്ന് കൂടിക്കാഴ്ചയിൽ ഇരുവരും വ്യക്തമാക്കി. യുദ്ധം സാധാരണക്കാരുടെ ജീവിതത്തെ ദുസ്സഹമാക്കുന്നതിൽ മാർപാപ്പ തന്റെ കടുത്ത ആശങ്ക അറിയിക്കുകയും സമാധാനത്തിനായി ലോകരാജ്യങ്ങൾ ഒന്നിച്ച് പ്രവർത്തിക്കണമെന്ന് ആഹ്വാനം ചെയ്യുകയും ചെയ്തു.
മിഡിൽ ഈസ്റ്റിലെ സംഘർഷങ്ങൾ ആഗോള സമ്പദ്വ്യവസ്ഥയെ ദോഷകരമായി ബാധിക്കുന്ന സാഹചര്യത്തിൽ അടിയന്തരമായ നയതന്ത്ര ഇടപെടലുകൾ ആവശ്യമാണെന്ന് നേതാക്കൾ അഭിപ്രായപ്പെട്ടു. അമേരിക്കയും ഇറാനും തമ്മിലുള്ള വെടിനിർത്തലിനെ അവർ സ്വാഗതം ചെയ്യുകയും സമാധാന ഉടമ്പടികൾ കൃത്യമായി പാലിക്കപ്പെടേണ്ടതിന്റെ പ്രാധാന്യം ഊന്നിപ്പറയുകയും ചെയ്തു. ലോകത്തിലെ ഭിന്നതകൾക്കിടയിൽ സമാധാനത്തിന് വേണ്ടി പ്രവർത്തിക്കുക എന്നത് ഒരു കടമയാണെന്ന് കൂടിക്കാഴ്ചയ്ക്ക് ശേഷം മാക്രോൺ തന്റെ സാമൂഹിക മാധ്യമങ്ങളിൽ കുറിച്ചു.
ഗൗരവകരമായ രാഷ്ട്രീയ ചർച്ചകൾക്കിടയിലും കായികപരമായ വിഷയങ്ങൾ കൂടിക്കാഴ്ചയ്ക്ക് ഹൃദ്യമായ അന്തരീക്ഷം പകർന്നു. കായിക പ്രേമിയായ മാർപാപ്പയ്ക്ക് ഫ്രഞ്ച് ദേശീയ ബാസ്കറ്റ് ബോൾ ടീമിലെ അംഗങ്ങൾ ഒപ്പിട്ട ജേഴ്സി മാക്രോൺ സമ്മാനമായി നൽകി. വരും ദിവസങ്ങളിൽ അൾജീരിയ സന്ദർശിക്കാനിരിക്കുന്ന മാർപാപ്പയെ ഫ്രാൻസിലേക്ക് വരാൻ മാക്രോൺ ഔദ്യോഗികമായി ക്ഷണിക്കുകയും ചെയ്തു.
