2026-ലെ ആദ്യത്തെ വലയ സൂര്യഗ്രഹണത്തിന് സാക്ഷ്യം വഹിക്കാൻ ലോകമെമ്പാടുമുള്ള വാനനിരീക്ഷകർ തയ്യാറെടുക്കുന്നു. ആകാശത്ത് സൂര്യനെ ഒരു തിളങ്ങുന്ന മോതിരം പോലെ തോന്നിപ്പിക്കുന്ന ‘അഗ്നിവലയം’ (Ring of Fire) സൃഷ്ടിക്കുന്ന ഈ അപൂർവ്വ പ്രതിഭാസം ഈ മാസം പകുതിയോടെയാണ് സംഭവിക്കുന്നത്.
സൂര്യനും ചന്ദ്രനും ഭൂമിയും ഒരേ നേർരേഖയിൽ വരുമ്പോഴാണ് സൂര്യഗ്രഹണം സംഭവിക്കുന്നത്. എന്നാൽ ചന്ദ്രൻ്റെ ഭ്രമണപഥം പൂർണ്ണമായും വൃത്താകൃതിയിലല്ലാത്തതിനാൽ ചന്ദ്രൻ ഭൂമിയിൽ നിന്ന് അല്പം അകലെയായിരിക്കുമ്പോൾ അതിന്റെ വലിപ്പം സൂര്യനേക്കാൾ ചെറുതായി അനുഭവപ്പെടും. ഈ സമയത്ത് ചന്ദ്രൻ സൂര്യനെ പൂർണ്ണമായും മറയ്ക്കാത്തതിനാൽ സൂര്യന്റെ പുറംഭാഗം ഒരു തിളങ്ങുന്ന വളയം പോലെ ദൃശ്യമാകുന്നു. ഇതാണ് വലയ സൂര്യഗ്രഹണം.
പൂർണ്ണ സൂര്യഗ്രഹണത്തിൽ നിന്ന് വ്യത്യസ്തമായി, വലയ സൂര്യഗ്രഹണത്തിൽ സൂര്യൻ പൂർണ്ണമായും മറയ്ക്കപ്പെടുന്നില്ല. പകരം ചന്ദ്രന്റെ നിഴലിന് ചുറ്റും സൂര്യപ്രകാശത്തിന്റെ നേർത്ത വൃത്തം തിളങ്ങിനിൽക്കും. ഇത് കാരണം ആകാശം പൂർണ്ണമായും ഇരുളുകയില്ല. ഗ്രഹണം കാണുന്നവർ നിർബന്ധമായും അംഗീകൃത സോളാർ ഫിൽട്ടറുകളോ ഗ്രഹണക്കണ്ണടകളോ ഉപയോഗിക്കണമെന്ന് ജ്യോതിശാസ്ത്രജ്ഞർ മുന്നറിയിപ്പ് നൽകുന്നു. ഗ്രഹണ സമയത്ത് നഗ്നനേത്രങ്ങൾ കൊണ്ട് സൂര്യനെ നോക്കുന്നത് കാഴ്ചശക്തിക്ക് സ്ഥിരമായ തകരാറുണ്ടാക്കാൻ കാരണമാകും.
എപ്പോഴാണ് ഗ്രഹണം സംഭവിക്കുക?
2026 ഫെബ്രുവരി 17-നാണ് ഈ വർഷത്തെ ആദ്യ സൂര്യഗ്രഹണം നടക്കുന്നത്. ചന്ദ്രൻ ഭൂമിയിൽ നിന്ന് അല്പം അകലെയായതിനാൽ സൂര്യന്റെ മധ്യഭാഗം മാത്രം മറയ്ക്കപ്പെടുകയും വശങ്ങൾ തിളങ്ങിനിൽക്കുകയും ചെയ്യും. അന്താരാഷ്ട്ര സമയക്രമം (UTC) അനുസരിച്ച് ഫെബ്രുവരി 17-ന് രാവിലെ 07:01-ന് ഗ്രഹണം ആരംഭിക്കും. ഇന്ത്യൻ സമയം ഏകദേശം ഉച്ചയ്ക്ക് 12:31-ഓടെയായിരിക്കും ഇത്.
ദക്ഷിണ അമേരിക്കയുടെ ചില ഭാഗങ്ങൾ, അന്റാർട്ടിക്ക, തെക്കൻ അറ്റ്ലാന്റിക്, പസഫിക് സമുദ്രങ്ങൾ എന്നിവിടങ്ങളിലാണ് ഈ ഗ്രഹണം പ്രധാനമായും ദൃശ്യമാകുക. അന്റാർട്ടിക്കയിലെ റഷ്യൻ റിസർച്ച് സ്റ്റേഷനായ മിർണി സ്റ്റേഷൻ പോലുള്ള ഇടങ്ങളിൽ അഗ്നിവലയം വ്യക്തമായി കാണാൻ കഴിയും. തെക്കേ ആഫ്രിക്ക, ദക്ഷിണ അമേരിക്കയുടെ അറ്റം എന്നിവിടങ്ങളിൽ ഭാഗിക ഗ്രഹണമാണ് ദൃശ്യമാകുക.
ഇന്ത്യയിൽ ദൃശ്യമാകുമോ?
ഈ വലയ സൂര്യഗ്രഹണം ഇന്ത്യയിൽ ദൃശ്യമാകില്ല. ദക്ഷിണാർദ്ധഗോളത്തിന് മുകളിലായി പകൽ സമയത്ത് ഈ പ്രതിഭാസം നടക്കുന്നത് കൊണ്ടാണ് ഇന്ത്യയിൽ ഇത് കാണാൻ കഴിയാത്തത്. ഇന്ത്യൻ വാനനിരീക്ഷകർക്ക് ലൈവ് സ്ട്രീമുകൾ വഴിയോ ശാസ്ത്രീയ റിപ്പോർട്ടുകൾ വഴിയോ മാത്രമേ ഈ കാഴ്ച ആസ്വദിക്കാൻ സാധിക്കൂ.
2026 ഓഗസ്റ്റിൽ ഒരു പൂർണ്ണ സൂര്യഗ്രഹണം കൂടി നടക്കാനുണ്ട്. അത് ലോകമെമ്പാടുമുള്ള ശാസ്ത്രജ്ഞരുടെയും വാനനിരീക്ഷകരുടെയും വലിയ ശ്രദ്ധ ആകർഷിക്കുമെന്നാണ് കരുതപ്പെടുന്നത്. സൂര്യരശ്മികളെക്കുറിച്ചും ഭൂമിയുടെ അന്തരീക്ഷത്തെക്കുറിച്ചും പഠിക്കാൻ ഇത്തരം ഗ്രഹണങ്ങൾ ശാസ്ത്രലോകത്തിന് വലിയ അവസരങ്ങളാണ് നൽകുന്നത്.
