അമേരിക്കയിലെ മിസിസിപ്പിയിലുള്ള ഏറ്റവും വലിയ ജൂതപള്ളിയായ ‘ബെത്ത് ഇസ്രായേൽ’ തീപിടിത്തത്തിൽ തകർന്നു. ശനിയാഴ്ച പുലർച്ചെ നടന്ന ഈ സംഭവം, ആരെങ്കിലും മനഃപൂർവം ചെയ്തതാണോ എന്ന് പൊലീസ് സംശയിക്കുന്നു. സംഭവവുമായി ബന്ധപ്പെട്ട് ഒരാളെ ഉദ്യോഗസ്ഥർ അറസ്റ്റ് ചെയ്തിട്ടുണ്ടെങ്കിലും ആക്രമണത്തിനു പിന്നിലെ കാരണം ഇതുവരെ വ്യക്തമായിട്ടില്ല.
തീപിടിത്തത്തിൽ പള്ളിയിലെ ലൈബ്രറിയും ഭരണവിഭാഗം ഓഫീസുകളും പൂർണ്ണമായും നശിച്ചു. വിശുദ്ധഗ്രന്ഥങ്ങളായ രണ്ട് തോറ ചുരുളുകളും തീയിൽ കത്തിപ്പോയിട്ടുണ്ട്. എന്നാൽ പള്ളിയുടെ പ്രധാന പ്രാർഥനാഹാളിന് വലിയ കേടുപാടുകൾ സംഭവിച്ചിട്ടില്ലെന്നും ആർക്കും പരിക്കേറ്റിട്ടില്ലെന്നും അധികൃതർ അറിയിച്ചു. കനത്ത പുകയും ചാരവും നിറഞ്ഞതിനാൽ പള്ളി ഇപ്പോൾ ഉപയോഗിക്കാൻ കഴിയില്ല.
പള്ളിക്കു നേരെയുണ്ടായ ഈ ആക്രമണത്തെ ജാക്സൺ മേയർ ശക്തമായി അപലപിച്ചു. ജനങ്ങൾ വിദ്വേഷം വെടിഞ്ഞ് ഒത്തൊരുമയോടെ നിൽക്കണമെന്ന് അദ്ദേഹം ആവശ്യപ്പെട്ടു. അന്വേഷണത്തിൽ എഫ്.ബി.ഐ ഉൾപ്പെടെയുള്ള പ്രമുഖ ഏജൻസികൾ പൊലീസിനെ സഹായിക്കുന്നുണ്ട്. പള്ളി പുനരുദ്ധരിക്കാൻ മറ്റ് ആരാധനാലയങ്ങൾ സഹായം വാഗ്ദാനം ചെയ്തിട്ടുണ്ട്.
