ചെന്നൈ: അമേരിക്കയിലെ ഉന്നത വിദ്യാഭ്യാസത്തെപ്പറ്റിയുള്ള വിവരങ്ങള് നല്കുന്ന ഔദ്യോഗിക യുണൈറ്റഡ് സ്റ്റേറ്റ്സ് ഗവൺമെന്റ് സ്രോതസായ എജ്യുക്കേഷൻ യുഎസ്എ വെള്ളിയാഴ്ച (ഓഗസ്റ്റ് 16) ഹൈദരാബാദിൽ ആരംഭിച്ച് ഈ മാസം 25ന് ന്യൂഡൽഹിയിൽ സമാപിക്കുന്ന എട്ട് വിദ്യാഭ്യാസ മേളകളുടെ ഒരു പരമ്പര രാജ്യത്തുടനീളം സംഘടിപ്പിക്കുന്നു.
യുണൈറ്റഡ് സ്റ്റേറ്റ്സിൽ ബിരുദ, ബിരുദാനന്തര, ഡോക്ടറേറ്റ് പ്രോഗ്രാമുകളിൽ പ്രവേശനം തേടുന്ന വിദ്യാർഥികൾക്ക് 80-ലധികം യുഎസ് അംഗീകൃത സർവകലാശാലകളിൽ നിന്നും കോളജുകളിൽ നിന്നുമുള്ള പ്രതിനിധികളെ നേരിൽ കണ്ട് സംസാരിക്കാൻ അവസരം ലഭിക്കും.
ഈ മേളകളില് പങ്കെടുക്കുന്നതിന് ഫീസ് ഇല്ല, എന്നാൽ രജിസ്ട്രേഷൻ ആവശ്യമാണ്. കൂടുതൽ വിവരങ്ങൾക്കും പേര് രജിസ്റ്റർ ചെയ്യുന്നതിനും സന്ദർശിക്കുക: https://bit.ly/EdUSAFair24Emb.
യുണൈറ്റഡ് സ്റ്റേറ്റ്സ് വാഗ്ദാനം ചെയ്യുന്ന വിദ്യാഭ്യാസ അവസരങ്ങളെക്കുറിച്ച് സമഗ്രമായി മനസിലാക്കുവാനുള്ള മികച്ച മാർഗമാണ് എജ്യുക്കേഷൻ യുഎസ്എ മേളകൾ. നിങ്ങളുടെ താത്പര്യം സയൻസ്, ടെക്നോളജി, എഞ്ചിനീയറിംഗ്, ആര്ട്സ്, അല്ലെങ്കിൽ ബിസിനസ് എന്നീ മേഖലകളിൽ ഏതിലുമാകട്ടെ, നിങ്ങളുടെ സ്വപ്നങ്ങൾ സാക്ഷാത്കരിക്കാൻ സഹായകമാകുന്ന ഒരു പ്രോഗ്രാം അവിടെയുണ്ടാകും.
നിരവധി യുഎസ് കോളേജുകളിൽ നിന്നും സർവകലാശാലകളിൽ നിന്നുമുള്ള പ്രതിനിധികളുമായി നേരിട്ട് സംസാരിക്കാനും കോളജ് അപേക്ഷകള്, വീസ പ്രക്രിയകള് എന്നിവ സംബന്ധിച്ച വിവരം പ്രദാനം ചെയ്യുന്ന പരിപാടികളിൽ പങ്കെടുക്കാനുമുള്ള അവസരം ഈ മേളകളിൽ പങ്കെടുക്കുന്നവർക്കുണ്ട്.
അഡ്മിഷൻ, സ്കോളർഷിപ്പുകൾ, കാമ്പസ് ജീവിതം എന്നിങ്ങനെ ഒരു യുഎസ് കാമ്പസിലെ പഠനവുമായി ബന്ധപ്പെട്ട അനവധി വിവരങ്ങൾ നേരിട്ട് നിങ്ങൾക്ക് ഈ മേളകളിലൂടെ ലഭിക്കും. യുണൈറ്റഡ് സ്റ്റേറ്റ്സിൽ പഠിക്കുകയെന്ന സ്വപ്നം യാഥാർഥ്യമാക്കുന്നതിന് ആവശ്യമായ എല്ലാ വിവരങ്ങളും പിന്തുണയും വിദ്യാർഥികൾക്കും അവരുടെ കുടുംബങ്ങൾക്കും ലഭ്യമാകുന്നുണ്ടെന്ന് ഉറപ്പാക്കുകയാണ് മേളുടെ ലക്ഷ്യമെന്ന് യുഎസ് അംബാസഡർ എറിക് ഗാർസെറ്റി പറഞ്ഞു.
ഇന്ത്യയിലെ എജ്യുക്കേഷൻ യുഎസ്എ
എജ്യുക്കേഷൻ യുഎസ്എ 175-ലധികം രാജ്യങ്ങളിലും പ്രദേശങ്ങളിലുമായി 430-ലധികം അന്തർദേശീയ വിദ്യാർഥി ഉപദേശക കേന്ദ്രങ്ങളുള്ള ഒരു യുഎസ് ഡിപ്പാർട്ട്മെന്റ് ഓഫ് സ്റ്റേറ്റ് ശൃംഖലയാണ്.
ഇന്ത്യയിൽ ഡൽഹി, ചെന്നൈ, കോൽക്കത്ത, മുംബൈ, ഹൈദരാബാദ് (രണ്ട്) എന്നീ അഞ്ച് നഗരങ്ങളിലുള്ള ആറ് കേന്ദ്രങ്ങളിലൂടെയാണ് എജ്യുക്കേഷൻ യുഎസ്എ ഉപദേശക സേവനം വിദ്യാർഥികൾക്കും രക്ഷിതാക്കൾക്കും നൽകിവരുന്നത്.
കൂടുതല് വിവരങ്ങള്ക്ക് www.educationusa.in സന്ദര്ശിക്കുക, അല്ലെങ്കിൽ india@educationusa.org എന്ന ഇമെയില് വിലാസത്തില് ബന്ധപ്പെടുക.
യുണൈറ്റഡ് സ്റ്റേറ്റ്സിലെ അംഗീകൃത പോസ്റ്റ്-സെക്കൻഡറി സ്ഥാപനങ്ങളിൽ നേടാവുന്ന ഉന്നതവിദ്യാഭ്യാസത്തെക്കുറിച്ച് വിദ്യാർഥികൾക്ക് ഏറ്റവും പുതിയതും കൃത്യവും സമഗ്രവുമായ വിവരങ്ങൾ എജ്യുക്കേഷൻ യുഎസ്എ പ്രദാനം ചെയ്യുന്നു.
