അവരുടെ മൊബൈൽ നമ്പറുകൾ അപ്ഡേറ്റ് ചെയ്തിട്ടുണ്ടെന്ന് ഉറപ്പാക്കണമെന്ന് റോഡ് ഗതാഗത, ഹൈവേ മന്ത്രാലയം (MoRTH) അഭ്യർത്ഥിച്ചു. ഔദ്യോഗിക വിവരങ്ങൾ കൃത്യസമയത്ത് ലഭിക്കുന്നതിനും രേഖകളിലെ കൃത്യത ഉറപ്പാക്കുന്നതിനും ഇത് അത്യാവശ്യമാണ്.
വാഹൻ, സാരഥി പോർട്ടലുകൾ വഴി നേരിട്ട് മൊബൈൽ നമ്പറുകൾ അപ്ഡേറ്റ് ചെയ്യുന്നതിന് ഒരു ഓൺലൈൻ സൗകര്യം നൽകിയിട്ടുണ്ട്. ഇതിനായി നേരിട്ട് ആർ.ടി.ഒ ഓഫീസുകളിൽ പോകേണ്ടതില്ല. വാഹൻ, സാരഥി പോർട്ടലുകളിലൂടെ ഓൺലൈനായി തന്നെ ഈ സേവനം ലഭ്യമാണ്. ഇത് വാഹന ഉടമകൾക്കും ലൈസൻസ് ഉടമകൾക്കും സമയം ലാഭിക്കാനും പ്രക്രിയ എളുപ്പമാക്കാനും സഹായിക്കുന്നു.
ഡിജിറ്റൽ ഇന്ത്യയിലേക്കുള്ള ചുവടുവെപ്പ്
ഡിജിറ്റൽ ഇന്ത്യ സ്വപ്നങ്ങളിലേക്ക് അതിവേഗം കുതിക്കുന്ന രാജ്യത്തിന് കുതിപ്പേകുന്ന സംരംഭമാണ് ഓൺലൈനായുള്ള മൊബൈൽ നമ്പർ അപ്ഡേഷൻ. ഇന്ത്യയുടെ ഗതാഗത മേഖല ഡിജിറ്റൽ പ്ലാറ്റ്ഫോമിലേക്ക് മാറിക്കൊണ്ടിരിക്കുന്നതിനാൽ എല്ലാ വാഹന ഉടമകളുടെയും ലൈസൻസ് ഉടമകളുടെയും കൃത്യമായ വിവരങ്ങൾ സർക്കാരിന് ആവശ്യമാണെന്ന് റോഡ് ഗതാഗത, ഹൈവേ മന്ത്രാലയം (MoRTH) അറിയിക്കുന്നു.
വാഹന രജിസ്ട്രേഷൻ, പുതുക്കൽ, ഉടമസ്ഥാവകാശം മാറ്റൽ, ഡ്രൈവിങ് ലൈസൻസ് അപേക്ഷകൾ, പെർമിറ്റ് സംബന്ധമായ ഇടപാടുകൾ എന്നിവയുൾപ്പെടെ വിവിധ ഓൺലൈൻ സേവനങ്ങൾ തടസമില്ലാതെ ഉറപ്പാക്കുക എന്നതാണ് മൊബൈൽ നമ്പർ അപ്ഡേഷൻ ചെയ്യണമെന്ന റോഡ് ഗതാഗത, ഹൈവേ മന്ത്രാലയത്തിന്റെ നിർദ്ദേശത്തിന് പിന്നിലുള്ളത്.
എന്തു കൊണ്ട് മൊബൈൽ നമ്പറുകൾ അപ്ഡേറ്റ് ചെയ്യണം?
നിങ്ങളുടെ മൊബൈൽ നമ്പർ അപ്ഡേറ്റ് ചെയ്യുന്നത് നിങ്ങളുടെ ഡ്രൈവിംഗ് ലൈസൻസിലെയും വാഹന രജിസ്ട്രേഷൻ സർട്ടിഫിക്കറ്റുകളിലെയും എല്ലാ വിശദാംശങ്ങളും പൂർണ്ണവും കൃത്യവുമാണെന്ന് ഉറപ്പാക്കുന്നു. നിങ്ങളുടെ വാഹനവുമായോ ഡ്രൈവിംഗ് ലൈസൻസുമായോ ബന്ധപ്പെട്ട അലേർട്ടുകൾ, അറിയിപ്പുകൾ, മറ്റ് ഔദ്യോഗിക ആശയവിനിമയങ്ങൾ എന്നിവ സ്വീകരിക്കാൻ ഇത് സഹായിക്കും.
മൊബൈൽ നമ്പർ എങ്ങനെ അപ്ഡേറ്റ് ചെയ്യാം
താഴെ പറയുന്ന വെബ്സൈറ്റുകൾ സന്ദർശിക്കുക:
- vahan.parivahan.gov.in/mobileupdate
- sarathi.parivahan.gov.in
- അല്ലെങ്കിൽ, മന്ത്രാലയം നൽകിയിട്ടുള്ള QR കോഡുകൾ സ്കാൻ ചെയ്തും അപ്ഡേറ്റ് പോർട്ടലിൽ പ്രവേശിക്കാം.
