ഹരിയാനയിലെ അൽ-ഫലാഹ് യൂണിവേഴ്സിറ്റി കാമ്പസിലെ സാധാരണ ഹോസ്റ്റൽ മുറി, ഡൽഹിയിലും ഉത്തർപ്രദേശിലും ഭീകരാക്രമണങ്ങൾക്ക് ഗൂഢാലോചന നടത്തിയ ഡോക്ടർമാരുടെ തീവ്രവാദ ഗ്രൂപ്പിൻ്റെ രഹസ്യ കേന്ദ്രമായി മാറിയതായി റിപ്പോർട്ട്.

ബോയ്സ് ഹോസ്റ്റലിലെ കെട്ടിടം 17-ലെ മുറി നമ്പർ 13 ആണ് “വൈറ്റ് കോളർ” ഭീകര മൊഡ്യൂളിൻ്റെ രഹസ്യ യോഗസ്ഥലമായി പ്രവർത്തിച്ചിരുന്നതെന്നും, ഇതിലെ പലരെയും അറസ്റ്റ് ചെയ്തിട്ടുണ്ടെന്നും അന്വേഷണത്തിൽ വെളിപ്പെട്ടു.

തിങ്കളാഴ്ച ഡൽഹിയിലെ ചരിത്രപ്രധാനമായ ചെങ്കോട്ടയ്ക്ക് സമീപം സ്ഫോടനം നടത്തി 13 പേരെ കൊലപ്പെടുത്തിയ ഡോ. ഉമർ നബി ഇവിടെ ജോലി ചെയ്തിരുന്നു എന്ന് കണ്ടെത്തിയതോടെ ഫരീദാബാദിലെ അൽ-ഫലാഹ് യൂണിവേഴ്സിറ്റിയും ആശുപത്രിയും ശ്രദ്ധാകേന്ദ്രമായി.

നേരത്തെ, അൽ-ഫലാഹ് യൂണിവേഴ്സിറ്റിയിൽ ജോലി ചെയ്തിരുന്ന ഡോ. മുസമിൽ ഷക്കീലിൻ്റെ വാടക കെട്ടിടത്തിൽ നിന്ന് 2,900 കിലോഗ്രാം ഐഇഡി നിർമ്മാണ സാമഗ്രികൾ പിടിച്ചെടുത്തിരുന്നു.

പാകിസ്ഥാൻ ആസ്ഥാനമായുള്ള ജെയ്ഷ്-ഇ-മുഹമ്മദിൻ്റെ വനിതാ വിഭാഗം ഇന്ത്യയിൽ സ്ഥാപിക്കാൻ ചുമതലപ്പെടുത്തിയെന്ന് കരുതുന്ന ഡോ. ഷഹീൻ ഷാഹിദും ഇതേ സർവകലാശാലയിലെ ജീവനക്കാരിയായിരുന്നു.

മുസമ്മിലും ഷഹീനും അറസ്റ്റിലായപ്പോൾ ഉമർ സ്ഫോടനത്തിൽ മരിച്ചു. യൂണിവേഴ്സിറ്റിയിൽ ജോലി ചെയ്തിരുന്ന കശ്മീർ സ്വദേശിയായ മറ്റൊരു ഡോക്ടർ നിസാർ-ഉൽ-ഹസ്സനെ കാണാതായി.

ഭീകരതയുടെ വിലാസം: റൂം നമ്പർ 13

ഹോസ്റ്റലിലെ മുറി നമ്പർ 13 കശ്മീരിലെ പുൽവാമ സ്വദേശിയായ ഡോ. മുസമിലിൻ്റേതായിരുന്നു. ഈ മുറിയിലാണ് മറ്റ് തീവ്രവാദികളായ ഡോക്ടർമാരുമായി ഇയാൾ കൂടിക്കാഴ്ച നടത്തുകയും ഡൽഹിയിലും സമീപ സംസ്ഥാനങ്ങളിലും ഏകോപിപ്പിച്ച സ്ഫോടനങ്ങൾ ആസൂത്രണം ചെയ്യുകയും ചെയ്തതെന്ന് ആരോപിക്കപ്പെടുന്നു.

അറസ്റ്റിലായ പ്രതികളെ ചോദ്യം ചെയ്തതിൽ നിന്ന്, ഡിസംബർ 6 ന് ബാബറി മസ്ജിദ് തകർത്തതിൻ്റെ വാർഷികത്തോടനുബന്ധിച്ചാണ് സ്ഫോടനങ്ങൾ ആസൂത്രണം ചെയ്തിരുന്നതെന്ന് വെളിപ്പെടുത്തിയിട്ടുണ്ട്.

സർവകലാശാലയുടെ ലബോറട്ടറിയിൽ നിന്ന് ഹോസ്റ്റൽ മുറിയിലേക്ക് രഹസ്യമായി രാസവസ്തുക്കൾ എങ്ങനെ എത്തിക്കണം എന്നതിനെക്കുറിച്ചും സംഘം ചർച്ച ചെയ്തിരുന്നതായി അന്വേഷണ ഉദ്യോഗസ്ഥർ വിശ്വസിക്കുന്നു. ഇലക്ട്രോണിക് ഉപകരണങ്ങളും, പെൻഡ്രൈവുകളും കണ്ടെടുത്ത ഈ മുറി പോലീസ് സീൽ ചെയ്തു.

മുറി നമ്പർ 13-ൽ നിന്ന് രാസവസ്തുക്കളുടെ അവശിഷ്ടങ്ങളും കണ്ടെത്തി. അമോണിയം നൈട്രേറ്റും ചെറിയ അളവിലുള്ള മെറ്റാലിക് ഓക്സൈഡുകളും കലർത്തിയാണ് സ്ഫോടകവസ്തുക്കൾ തയ്യാറാക്കിയിരുന്നതെന്ന് സംശയിക്കുന്നു. പ്രാഥമിക അന്വേഷണത്തിൽ റെഡ് ഫോർട്ട് സ്ഫോടനത്തിൽ അമോണിയം നൈട്രേറ്റ് ഫ്യൂവൽ ഓയിൽ (ANFO) ആണ് ഉപയോഗിച്ചതെന്ന് കണ്ടെത്തിയിട്ടുണ്ട്.

ഡോ. ഉമറും ഡോ. ഷഹീനും ചേർന്ന് സർവകലാശാലാ ലാബിൽ നിന്ന് ഫരീദാബാദിലെ ധൗജ്, താഗ ഗ്രാമങ്ങളിലെ സ്ഥലങ്ങളിലേക്ക് രാസവസ്തുക്കൾ മാറ്റാൻ സഹായിച്ചതായും വൃത്തങ്ങൾ പറയുന്നു. സ്ഫോടകവസ്തുക്കൾ കൂട്ടിച്ചേർക്കാൻ ഇവ ഉപയോഗിച്ചിരിക്കാമെന്നാണ് സംശയം.