ബി.ജെ.പി. അഖിലേന്ത്യാ ഉപാധ്യക്ഷൻ എ.പി. അബ്ദുല്ലക്കുട്ടി ഡൽഹി സ്ഫോടനവുമായി ബന്ധപ്പെട്ട് കണ്ണൂർ മാരാർജി ഭവനിൽ മാധ്യമങ്ങളോട് സംസാരിക്കവെ ഗുരുതരമായ ആരോപണങ്ങളാണ് ഉന്നയിച്ചത്. സ്ഫോടനത്തിന് പിന്നിൽ ഞെട്ടിക്കുന്ന വിവരങ്ങളാണ് പുറത്തുവരുന്നതെന്നും, ഇതിന് പിന്നിൽ ജമാഅത്തെ ഇസ്ലാമിയുടെയും സലഫി ഗ്രൂപ്പുകളുടെയും പിന്തുണയുള്ള ‘വൈറ്റ് കോളർ അർബൻ തീവ്രവാദികളാണ്’ എന്നും അദ്ദേഹം ആരോപിച്ചു.
ഡോക്ടർമാരും എൻജിനിയർമാരും അടക്കമുള്ള വിദ്യാസമ്പന്നരാണ് തീവ്രവാദ ആശയങ്ങളിൽ വീണുപോകുന്നത്. ഇസ്ലാമിക രാഷ്ട്രം സ്ഥാപിക്കണമെന്ന മൗദൂദിയൻ ആശയമാണ് ജമാഅത്തെ ഇസ്ലാമി ഇപ്പോഴും പിന്തുടരുന്നത്. ഇവരുടെ ആശയധാരയിൽ നിന്നാണ് ചാവേറുകളായ ഭീകര സംഘടനകൾ വളരുന്നത്. ഈ സംഘടനകളെ നിരോധിച്ചാൽ മാത്രമേ അർബൻ ഭീകരത അവസാനിപ്പിക്കാൻ സാധിക്കുകയുള്ളൂ എന്നും അബ്ദുല്ലക്കുട്ടി ആവശ്യപ്പെട്ടു.
സി.എ.എ. പ്രക്ഷോഭം അഴിച്ചുവിട്ടത് ജമാഅത്തെ ഇസ്ലാമി, സലഫി ഗ്രൂപ്പുകൾ, റോഹിംഗ്യൻ ഗ്രൂപ്പുകൾ തുടങ്ങിയവരാണെന്നും, പൗരത്വ ഭേദഗതി നിയമം (സി.എ.എ) മൂലം ഏതെങ്കിലും മുസ്ലിമിനെ നാടുകടത്തിയിട്ടുണ്ടോയെന്ന് ഇവർ വ്യക്തമാക്കണമെന്നും അദ്ദേഹം കൂട്ടിച്ചേർത്തു. വോട്ടർ പട്ടിക പരിഷ്കരണത്തിനെതിരെയും ഈ ഗ്രൂപ്പുകൾ കുപ്രചാരണം നടത്തുകയാണെന്ന് അദ്ദേഹം ആരോപിച്ചു.
വ്യാജ ആധാർ കാർഡ് ഉപയോഗിച്ച് രാജ്യത്ത് താമസിക്കുകയും വോട്ട് ചെയ്യുകയും ചെയ്യുന്ന ബംഗ്ലാദേശികളെ പുറത്താക്കണം എന്നും അദ്ദേഹം ആവശ്യപ്പെട്ടു. കൂടാതെ, വ്യാജപ്രചാരണം നടത്തുന്ന രാഹുൽ ഗാന്ധി ഒരു കാര്യം ഓർക്കണമെന്നും അബ്ദുല്ലക്കുട്ടി പറഞ്ഞു. ‘മതിയായ രേഖകളില്ലാതെ വോട്ടർ പട്ടികയിൽ പേര് വരികയും വോട്ട് ചെയ്യുകയും പാർലമെന്റിൽ ഇരിക്കുകയും ചെയ്ത ഏക വിദേശ വനിത സോണിയാ ഗാന്ധിയാണ്’ എന്നായിരുന്നു അദ്ദേഹത്തിന്റെ ആരോപണം. നരേന്ദ്ര മോദിയുടെ ക്ഷേമപ്രവർത്തനങ്ങൾ ഓരോ പൗരനിലും എത്തിയിട്ടും, എസ്.ഐ.ആർ.ന്റെ പേരിൽ ചില മുസ്ലിം സംഘടനകൾ നുണപ്രചാരണം തുടരുകയാണെന്നും അദ്ദേഹം കുറ്റപ്പെടുത്തി.
അടുത്ത തദ്ദേശ ഭരണ തെരഞ്ഞെടുപ്പിൽ ബി.ജെ.പിക്ക് നല്ല പ്രതീക്ഷയാണുള്ളതെന്നും, വികസിത ഭാരതത്തോടൊപ്പം വികസിത കേരളവും വികസിത കണ്ണൂരും പാർട്ടി ലക്ഷ്യമിടുന്നതായും അബ്ദുല്ലക്കുട്ടി വ്യക്തമാക്കി.
