മഹാരാഷ്ട്ര ഉപമുഖ്യമന്ത്രിയും എൻ.സി.പി നേതാവുമായിരുന്ന അജിത് പവാറിന്റെ മരണത്തിനിടയാക്കിയ ബരാമതി വിമാനാപകടത്തിന്റെ പ്രാഥമിക അന്വേഷണ റിപ്പോർട്ട് ഫെബ്രുവരി 28-ന് പുറത്തുവിടുമെന്ന് കേന്ദ്ര വ്യോമയാന മന്ത്രാലയം അറിയിച്ചു. സാങ്കേതിക തെളിവുകളുടെയും വിമാനത്തിന്റെ അവശിഷ്ടങ്ങളുടെയും സമഗ്രമായ പരിശോധനയ്ക്ക് ശേഷമാണ് റിപ്പോർട്ട് തയ്യാറാക്കുന്നത്. അപകടത്തിൽ അജിത് പവാറിന് പുറമെ അദ്ദേഹത്തിന്റെ സെക്യൂരിറ്റി ഓഫീസർ വിധിത് ജാധവ്, പൈലറ്റുമാരായ സുമിത് കപൂർ, സാംബവി പഥക്, കാബിൻ ക്രൂ പിങ്കി മാലി എന്നിവരും കൊല്ലപ്പെട്ടിരുന്നു.
അതേസമയം, ഈ അപകടത്തിൽ കടുത്ത ദുരൂഹതയുണ്ടെന്ന ആരോപണവുമായി അജിത് പവാറിന്റെ അനന്തരവൻ രോഹിത് പവാർ രംഗത്തെത്തിയിട്ടുണ്ട്. അപകടം നടന്ന ദിവസം ഒരു മുതിർന്ന നേതാവ് അജിത് പവാറിനെ കാണാൻ വരികയും അതുവഴി യാത്ര വൈകുകയും ചെയ്തതാണ് വിമാനയാത്ര തിരഞ്ഞെടുക്കാൻ കാരണമായതെന്ന് രോഹിത് ആരോപിക്കുന്നു. നേരത്തെ ട്രെയിൻ മാർഗം യാത്ര ചെയ്യാനായിരുന്നു തീരുമാനം. അപകടത്തിന് തൊട്ടുമുമ്പുള്ള റേഡിയോ സിഗ്നലുകളും പൈലറ്റിന്റെ സംഭാഷണങ്ങളും ലഭ്യമാകാത്തതിൽ വലിയ ഗൂഢാലോചനയുണ്ടെന്നാണ് രോഹിത് പവാറിന്റെ സംശയം.
സംഭവത്തിൽ ഉയർന്നുവന്ന രാഷ്ട്രീയ ആരോപണങ്ങൾ മഹാരാഷ്ട്ര രാഷ്ട്രീയത്തിൽ വലിയ ചർച്ചകൾക്കാണ് വഴിതുറന്നിരിക്കുന്നത്. വിമാനാപകടത്തിന്റെ കൃത്യമായ കാരണം സാങ്കേതിക തകരാറാണോ അതോ മറ്റെന്തെങ്കിലും അട്ടിമറി നടന്നിട്ടുണ്ടോ എന്ന കാര്യത്തിൽ ഫെബ്രുവരി 28-ന് പുറത്തുവരുന്ന റിപ്പോർട്ടിലൂടെ വ്യക്തത ലഭിക്കുമെന്നാണ് വ്യോമയാന മന്ത്രാലയം നൽകുന്ന സൂചന.
