തമിഴ് സിനിമയിലെ ഏറ്റവും ശക്തമായ സ്ത്രീ കഥാപാത്രം ഏതാണ് എന്ന് ചോദിച്ചാല് ഇന്നും അക്ഷരം തെറ്റാതെ ആരാധകര് പറയും അത് നീലാംബരിയാണ് എന്ന്. 1999 ല് പുറത്തിറങ്ങിയ പടയപ്പ എന്ന ചിത്രത്തില് രജിനികാന്തിനെക്കാള് ഒരുപടി മുകളില് തന്നെയാണ് രമ്യ കൃഷ്ണന് ചെയ്ത നീലാംബരി എന്ന കഥാപാത്രം. കാലിന്മേല് കാലേറ്റി വച്ച്, സര്വ്വ പ്രൗഢിയോടെയും രമ്യ കൃഷ്ണന് വന്നിരിക്കുമ്പോള്, ആ കഥാപാത്രത്തിന് പകരം മറ്റൊരു നടിയെ സങ്കല്പ്പിക്കാന് തന്നെ പ്രയാസമാണ്.
എന്നാല് കെ എസ് രവികുമാര് സംവിധാനം ചെയ്ത ചിത്രത്തില് രമ്യ കൃഷ്ണന് മുന്പ് മറ്റ് പല നടിമാരെയും പരിഗണിച്ചിരുന്നു. ലോക സുന്ദരി എന്ന ലേബലില് ശ്രദ്ധേയയായ നടി ഐശ്വര്യ റായി ആ വേഷം ചെയ്യണം എന്നായിരുന്നുവത്രെ രജിനികാന്തിന്റെ ആഗ്രഹം. വര്ഷങ്ങള്ക്കിപ്പുറം ആ കഥാപാത്രത്തെ കുറിച്ച് രജിനികാന്ത് വെളിപ്പെടുത്തിയ പിന്നാമ്പുറ കഥയാണ് ഇപ്പോള് വൈറലാവുന്നത്.
എന്നെ സംബന്ധിച്ച് നീലാംബരി എന്ന കഥാപാത്രം ഐശ്വര്യ റായി ചെയ്താല് നന്നാവും എന്നായിരുന്നു എന്റെ ആഗ്രഹം. ആലോചിക്കുമ്പോള് എല്ലാം ഐശ്വര്യ റായിയാണ് എന്റെ മൈന്റില് വന്നത്. ചെയ്യുന്നുണ്ടെങ്കില് ഐശ്വര്യ റായി തന്നെ ചെയ്യണം എന്നതില് ഞാന് പൂര്ണമായും ഉറച്ചു നിന്നു. ഓകെ സര്, നമുക്ക് ശ്രമിച്ചു നോക്കാം, അവര് വളരെ തിരക്കിലായിരിക്കും എന്ന് പറഞ്ഞ് കെസ് രവികുമാര് ശ്രമിച്ചുകൊണ്ടേയിരുന്നു.
മൂന്ന് മാസത്തോളം ഈ കഥാപാത്രത്തിന് വേണ്ടി ഐശ്വര്യ റായിയെ കാത്തിരുന്നു. പക്ഷേ അവര് ചെയ്യുന്നു എന്നും പറയുന്നില്ല, ചെയ്യുന്നില്ല എന്നും പറയുന്നില്ല. അങ്ങനെ ദിവസങ്ങള് കടന്നു പോയി. നല്ല കഥാപാത്രമാണ്, ചെയ്യാം എന്ന് പറഞ്ഞിരുന്നെങ്കില് ഒന്ന് – രണ്ട് വര്ഷം കാത്തിരിക്കാനും തയ്യാറായിരുന്നു. പക്ഷേ പിന്നീടാണ് മനസ്സിലായത് അവര്ക്ക് താത്പര്യമില്ല എന്ന്. ഇഷ്ടമില്ല എന്ന് തിരിച്ചറിഞ്ഞതിനപ്പുറം പിന്നെ അവര് തന്നെ വേണം എന്ന് നിര്ബന്ധിക്കുന്നതില് അര്ത്ഥമില്ലല്ലോ.
അതിന് ശേഷം ശ്രീദേവി, മാധുരി ധീക്ഷിത്, മീന അങ്ങനെ പലരുടെയും പേര് പറഞ്ഞു. ശ്രമിച്ചു നോക്കി. പക്ഷേ ആര്ക്കും കണ്ണില് ആ അഹങ്കാരത്തോടെയുള്ള വീര്യമില്ല. ആ ആണത്തവും പവറും ഉള്ള നടിയായിരിക്കണം. അവസാരം രമ്യ കൃഷ്ണന് ചെയ്താല് നന്നായിരിക്കും എന്ന അഭിപ്രായം വന്നു. പക്ഷേ എനിക്കവരെ അത്രയ്ക്ക് പരിചയം ഇല്ല. പക്ഷേ അവരുടെ കണ്ണികള്ക്ക് വല്ലാത്ത ഒരു പവര് ആയിരിക്കുമെന്ന് സംവിധായകന് പറഞ്ഞു. കുറച്ച് വണ്ണം കൂടിയാല് സെറ്റായിരിക്കും, ഡാന്സില് അരങ്ങേറ്റമൊക്കെ കഴിഞ്ഞതാണെന്നും പറഞ്ഞു.
ശരി, നിങ്ങള്ക്ക് അത്ര വിശ്വാസം ആണെങ്കില് നോക്കൂ എന്ന് ഞാന് പറഞ്ഞു. ആ സാരിയില് രമ്യ കൃഷ്ണന് വന്ന് നിന്നപ്പോള് തന്നെ ഞാന് കണ്വിന്സ് ആയി- രജിനികാന്ത് പറഞ്ഞു. പിന്നീട് സ്ക്രീനില് കണ്ടത് ചരിത്രം
