കൊളസ്ട്രോൾ നില പരിശോധിക്കുകയും അത് കൃത്യമാണെന്ന് കണ്ട് ആശ്വസിക്കുകയും ചെയ്യുന്നവരാണ് പലരും. എന്നാൽ കൊളസ്ട്രോൾ നോർമലായാലും ഒരാൾക്ക് ഹൃദയാഘാതം ഉണ്ടാകാനുള്ള സാധ്യതയുണ്ടെന്ന് ആധുനിക വൈദ്യശാസ്ത്ര പഠനങ്ങൾ തെളിയിക്കുന്നു. ഇന്ത്യയിലെ മരണനിരക്കിൽ വലിയൊരു പങ്കും ഹൃദയസംബന്ധമായ അസുഖങ്ങൾ മൂലമാണ് സംഭവിക്കുന്നത്.
പഠനമനുസരിച്ച് ഇന്ത്യയിലെ നാലിൽ ഒരു മരണം ഹൃദയരോഗങ്ങൾ മൂലമാണ്. ഇതിൽ 80 ശതമാനവും ഹൃദയാഘാതമോ സ്ട്രോക്കോ കാരണമാണ് സംഭവിക്കുന്നത്. കേവലം കൊളസ്ട്രോൾ പരിശോധനയ്ക്ക് അപ്പുറം നമ്മുടെ ഹൃദയത്തിന്റെ ആരോഗ്യം നിർണയിക്കുന്ന മറ്റ് പല ഘടകങ്ങളും ഉണ്ടെന്നതാണ് വാസ്തവം.
ശൈത്യകാലത്ത് ഹൃദയാഘാത കേസുകൾ വർദ്ധിക്കുന്നത് വെറുമൊരു യാദൃശ്ചികതയല്ല. തണുത്ത കാലാവസ്ഥയും പെട്ടെന്നുണ്ടാകുന്ന ശീതതരംഗങ്ങളും ഹൃദയാഘാതത്തിനുള്ള സാധ്യത ഗണ്യമായി വർദ്ധിപ്പിക്കുന്നുവെന്ന് അമേരിക്കൻ കോളേജ് ഓഫ് കാർഡിയോളജി നടത്തിയ പഠനങ്ങൾ വ്യക്തമാക്കുന്നു.
തണുപ്പ് കൂടുമ്പോൾ ശരീരതാപം നിലനിർത്താനായി രക്തക്കുഴലുകൾ ചുരുങ്ങുന്നു. ഇത് ഹൃദയത്തിലേക്കുള്ള രക്തപ്രവാഹവും ഓക്സിജൻ വിതരണവും കുറയ്ക്കാൻ കാരണമാകുന്നു. കൂടാതെ തണുപ്പുകാലത്ത് വ്യായാമം കുറയുന്നതും ഉയർന്ന കലോറിയുള്ള ഭക്ഷണങ്ങൾ കഴിക്കുന്നതും രക്തസമ്മർദ്ദം ഉയരാൻ ഇടയാക്കുന്നു. ക്രിസ്മസ്, പുതുവത്സര ആഘോഷവേളകളിൽ ഹൃദയസംബന്ധമായ മരണങ്ങൾ കൂടുതലായി റിപ്പോർട്ട് ചെയ്യപ്പെടുന്നതും ശ്രദ്ധേയമാണ്.
കൊളസ്ട്രോൾ റിപ്പോർട്ടിൽ ഇല്ലാത്ത എന്നാൽ ഹൃദയാരോഗ്യത്തെ ബാധിക്കുന്ന ചില പ്രധാന ഘടകങ്ങളാണ് അപ്പോ ബി ലെവൽ, ലിപ്പോപ്രോട്ടീൻ എ, ഹീമോഗ്ലോബിൻ എ1സി എന്നിവ. അപ്പോ ബി എന്നത് രക്തത്തിലെ ചീത്ത കൊളസ്ട്രോൾ കണികകളുടെ യഥാർത്ഥ എണ്ണം കൃത്യമായി സൂചിപ്പിക്കുന്ന ഒന്നാണ്.
അതുപോലെ ലിപ്പോപ്രോട്ടീൻ എ എന്നത് ജനിതകമായ ഒരു ഘടകമാണ്. ദക്ഷിണേഷ്യൻ വംശജരിൽ ഇതിന്റെ അളവ് കൂടുതലായി കാണപ്പെടാറുണ്ട്. മൂന്ന് മാസത്തെ ശരാശരി പഞ്ചസാരയുടെ അളവ് കാണിക്കുന്ന എച്ച്ബിഎ1സി ഉയർന്നതാണെങ്കിലും ഹൃദയരോഗ സാധ്യത വർദ്ധിക്കുന്നു. കൊളസ്ട്രോൾ നോർമലാണെങ്കിലും ധമനികളിലെ വീക്കം അളക്കുന്ന ഹൈ സെൻസിറ്റീവ് സി-റിയാക്ടീവ് പ്രോട്ടീൻ (hs-CRP) കൂടുതലാണെങ്കിൽ ഹൃദയാഘാതം സംഭവിക്കാനുള്ള സാധ്യത വളരെ കൂടുതലാണ്.
മുൻകാലങ്ങളിൽ വാർദ്ധക്യസഹജമായ അസുഖമായി കണക്കാക്കിയിരുന്ന ഹൃദയാഘാതം ഇന്ന് യുവാക്കളിൽ വ്യാപകമാകുന്നത് വലിയ ആശങ്കയാണ് ഉയർത്തുന്നത്. 40 വയസ്സിൽ താഴെയുള്ളവരിൽ പോലും ഹൃദയാഘാതം സാധാരണമായിരിക്കുന്നു. ഇതിൽ പ്രധാനമായും ധമനികളിൽ കൊഴുപ്പ് അടിയുന്ന കൊറോണറി ആർട്ടറി ഡിസീസ് തന്നെയാണ് വില്ലൻ.
നെഞ്ചിലെ ഭാരം, ഇടത് കൈയിലേക്കോ താടിയെല്ലിലേക്കോ പടരുന്ന വേദന, ശ്വാസംമുട്ടൽ, അമിതമായ വിയർപ്പ്, തലകറക്കം എന്നിവ ഹൃദയാഘാതത്തിന്റെ ലക്ഷണങ്ങളാണ്. പലപ്പോഴും ഗ്യാസ് ട്രബിൾ ആണെന്ന് കരുതി ഇത്തരം ലക്ഷണങ്ങളെ അവഗണിക്കുന്നത് വലിയ അപകടങ്ങളിലേക്ക് നയിക്കുന്നു. ലക്ഷണങ്ങൾ പ്രകടമായാൽ ഒട്ടും വൈകാതെ വൈദ്യസഹായം തേടേണ്ടത് അത്യന്താപേക്ഷിതമാണ്.
തണുപ്പുകാലത്ത് ഹൃദയാരോഗ്യം സംരക്ഷിക്കുന്നതിന് ജീവിതശൈലിയിൽ ചില മാറ്റങ്ങൾ വരുത്തേണ്ടതുണ്ട്. ശരീരഭാരം കൃത്യമായി നിലനിർത്തുക എന്നതിനാണ് മുൻഗണന നൽകേണ്ടത്. ഉപ്പിന്റെയും പഞ്ചസാരയുടെയും ഉപയോഗം കുറയ്ക്കുകയും പഴങ്ങളും പച്ചക്കറികളും ഭക്ഷണത്തിൽ ഉൾപ്പെടുത്തുകയും വേണം.
പുകവലിയും മദ്യപാനവും പൂർണമായും ഒഴിവാക്കുന്നത് ഹൃദയത്തിന്റെ ആയുസ് വർദ്ധിപ്പിക്കും. മാനസിക സമ്മർദ്ദം കുറയ്ക്കുന്നതിനായി യോഗ, ധ്യാനം എന്നിവ ശീലമാക്കണം. കൃത്യമായ ഇടവേളകളിൽ ബിഎംഐ, ബ്ലഡ് പ്രഷർ, കൊളസ്ട്രോൾ നില എന്നിവ പരിശോധിക്കുകയും ഡോക്ടറുടെ നിർദ്ദേശപ്രകാരം മാത്രം മരുന്നുകൾ കഴിക്കുകയും ചെയ്യുക. ടിഎംടി, ഇസിജി തുടങ്ങിയ പരിശോധനകൾ വഴി ഹൃദയത്തിന്റെ അവസ്ഥ മുൻകൂട്ടി മനസ്സിലാക്കാൻ സാധിക്കും.
