പാലക്കാട് നിയമസഭാ മണ്ഡലത്തിലെ ബിജെപി സ്ഥാനാർത്ഥി ശോഭാ സുരേന്ദ്രൻ ‘ വോട്ടിന് പണം’ ആരോപണത്തിൽ ജില്ലാ വരണാധികാരിക്ക് മുന്നിൽ മൊഴി നൽകി. വെള്ളിയാഴ്ച ഉച്ചയോടെയാണ് ശോഭ ഹാജരായി തന്റെ ഭാഗം വിശദീകരിച്ചത്. ഏപ്രിൽ 9-ന് നടന്ന വോട്ടെടുപ്പിന് മുന്നോടിയായി വോട്ടർമാർക്ക് പണം വിതരണം ചെയ്തു എന്ന കോൺഗ്രസിന്റെ പരാതിയിലാണ് നടപടി.
പാലക്കാട് നിയമസഭാ മണ്ഡലമുൾപ്പെടെ കേരളത്തിലെ 140 മണ്ഡലങ്ങളിലും വോട്ടെടുപ്പ് പൂർത്തിയായിക്കഴിഞ്ഞു. മെയ് 4-നാണ് വോട്ടെണ്ണലും ഫലപ്രഖ്യാപനവും നടക്കുന്നത്. തിരഞ്ഞെടുപ്പിന് തൊട്ടുമുൻപ് ഏപ്രിൽ 8-നാണ് വിവാദത്തിനാസ്പദമായ സംഭവം നടന്നത്.
ചാനലുകളിലൂടെ പ്രചരിച്ച വീഡിയോയിൽ ശോഭാ സുരേന്ദ്രൻ എത്തിയ സ്ഥലത്ത് വെച്ച് ഒരു സ്ത്രീ വയോധികയായ മറ്റൊരു സ്ത്രീക്ക് എന്തോ നൽകുന്നത് കാണാമായിരുന്നു. തുടർന്ന് അവിടെയുണ്ടായിരുന്ന കോൺഗ്രസ് പ്രവർത്തകർ ഇടപെടുകയും വയോധികയുടെ കൈ നിവർത്തി അഞ്ഞൂറ് രൂപയുടെ നോട്ടുകൾ പുറത്തെടുക്കുകയും ചെയ്തു. ഈ സമയത്ത് ശോഭാ സുരേന്ദ്രൻ തന്റെ കാറിൽ നിന്നിറങ്ങി ദൃശ്യങ്ങൾ പകർത്തിയവരോട് തർക്കിക്കുന്നതും വീഡിയോയിലുണ്ട്. തന്റെ അനുവാദമില്ലാതെ എങ്ങനെ വീഡിയോ എടുത്തു എന്നാണ് ശോഭ ചോദിച്ചത്.
ഇതിനെതിരെ കോൺഗ്രസ് തിരഞ്ഞെടുപ്പ് കമ്മീഷനെ സമീപിച്ചതോടെയാണ് അന്വേഷണം ആരംഭിച്ചത്. എന്നാൽ ഇതൊരു ഗൂഢാലോചനയുടെ ഭാഗമാണെന്ന് കാണിച്ച് ശോഭാ സുരേന്ദ്രനും പരാതി നൽകിയിട്ടുണ്ട്. തന്നെ മനഃപൂർവ്വം കുടുക്കാൻ എതിർ കക്ഷികൾ കെട്ടിച്ചമച്ച നാടകമാണിതെന്നാണ് ബിജെപിയുടെ നിലപാട്.
അന്വേഷണം പുരോഗമിക്കുന്നു
പരാതി ലഭിച്ചതിനെത്തുടർന്ന് പാലക്കാട് ജില്ലാ കളക്ടർ വരണാധികാരിയോട് അന്വേഷണം നടത്തി റിപ്പോർട്ട് സമർപ്പിക്കാൻ ആവശ്യപ്പെട്ടിരുന്നു. ഇതിന്റെ ഭാഗമായാണ് ശോഭാ സുരേന്ദ്രൻ നേരിട്ടെത്തി മൊഴി നൽകിയത്. വരണാധികാരിയുടെ റിപ്പോർട്ട് ഉടൻ തന്നെ കളക്ടർക്കും തുടർന്ന് കേരള മുഖ്യ തിരഞ്ഞെടുപ്പ് ഓഫീസർ രത്തൻ യു കേൽക്കർക്കും കൈമാറും. സംഭവത്തിൽ പോലീസ് കേസെടുത്ത് പ്രത്യേക അന്വേഷണം ആരംഭിച്ചിട്ടുണ്ട്.
പാലക്കാട് മണ്ഡലത്തിൽ ഇത്തവണ കടുത്ത ത്രികോണ മത്സരമാണ് നടന്നത്. ബിജെപി സ്ഥാനാർത്ഥിക്കെതിരെ ഉയർന്ന ഈ ആരോപണം രാഷ്ട്രീയ വൃത്തങ്ങളിൽ വലിയ ചർച്ചയായിരുന്നു. അതേസമയം, വോട്ടെടുപ്പ് സമാധാനപരമായി പൂർത്തിയായെന്നും ഇത്തരം കള്ളപ്രചാരണങ്ങൾ ജനങ്ങൾ തള്ളിക്കളയുമെന്നും ബിജെപി നേതൃത്വം പ്രതികരിച്ചു. ആരോപണവിധേയമായ വീഡിയോയിലെ ആളുകളെയും പോലീസ് വരും ദിവസങ്ങളിൽ ചോദ്യം ചെയ്യും.
