പാലക്കാട്: ചിറ്റൂർ നിയമസഭാമണ്ഡലത്തിൽ എൽഡിഎഫ് സ്ഥാനാർഥിക്കു വോട്ടഭ്യർഥിച്ച് ബിജെപി സ്ഥാനാർഥിയുടെ ഫേസ്ബുക്ക് പോസ്റ്റ്.
മണ്ഡലത്തിലെ ബിജെപി സ്ഥാനാർഥി പ്രണേഷ് രാജേന്ദ്രന്റെ ഫേസ്ബുക്ക് പേജിലാണ് എൽഡിഎഫ് സ്ഥാനാർഥി വി. മുരുകദാസിനു വോട്ടഭ്യർഥിച്ചുകൊണ്ടുള്ള കുറിപ്പ് പ്രത്യക്ഷപ്പെട്ടത്.
മിനിറ്റുകൾക്കകം പോസ്റ്റ് ഡിലീറ്റ് ചെയ്തെങ്കിലും ഇതിന്റെ സ്ക്രീൻഷോട്ടുകൾ ഇതിനോടകംതന്നെ സോഷ്യൽ മീഡിയയിൽ പ്രചരിച്ചു.
യുഡിഎഫ് തരംതാഴ്ന്ന രാഷ്ട്രീയപ്രവർത്തനമാണ് ചിറ്റൂരിൽ നടത്തുന്നതെന്നും ജനാധിപത്യത്തെ പരിഹസിക്കുന്ന കോൺഗ്രസ് നാടകത്തിനു ചിറ്റൂർ മറുപടിനൽകുമെന്നുമാണ് പോസ്റ്റിൽ പറയുന്നത്.
എൽഡിഎഫ് സ്ഥാനാർഥി വി. മുരുകദാസിന്റെ ചിഹ്നമായ മോതിരം വ്യക്തമാക്കിക്കൊണ്ട് അദ്ദേഹത്തിനു വോട്ടുചെയ്യണമെന്നും വികസനത്തിന്റെ തുടർച്ചയ്ക്കായി എൽഡിഎഫിനു വോട്ടുനൽകണമെന്നും പോസ്റ്റിൽ ആഹ്വാനം ചെയ്യുന്നു.
സംഭവം വിവാദമായതിനുപിന്നാലെ തന്റെ ഫേസ്ബുക്ക് പേജ് ഹാക്ക് ചെയ്യപ്പെട്ടെന്നും കേസെടുക്കണമെന്നും ആവശ്യപ്പെട്ട് പ്രണേഷ് രാജേന്ദ്രൻ ചിറ്റൂർ പോലീസിൽ പരാതി നൽകി.
